Бу үйэҕэ туох да туора тылы ыһыктыбакка биэс сылы быһа ньимийэн олорбут "алмаас генерала" тиһэх сессийэҕэ тоҕо уоһа өһүлүннэ?
Киэһэлик биллибитинэн, ДОЙНИКОВ "АЛРОСАттан" ууратыллыбытын туһунан докумуонунан илдьит туппута сылтах буолбут эбит. Дьокутааттар коллегаларын этиитин  өйөөбөтөхтөрө - "АЛРОСА" кирин-хоҕун хасыһартан туттуммуттара. Онон ДОЙНИКОВ үлэтэ суох хаалбыт хомолтотун бэйэтэ соҕотоҕун ыйыста сатаан баран Аһаҕас сурук суруйан суруналыыстарга тарҕатта.  
Хаһан баҕарар, хаһаайына уларыйан эрэр дьиэҕэ тиһэх баайы-дуолу үллэстии барар.  "АЛРОСА" АК президенэ Федор АНДРЕЕВ икки Ил Түмэн дьокутаата буолан олорбут алмаасчыттары уураталаата: В.ПОТРУБЕЙКАНЫ уонна бу Ю.ДОЙНИКОВЫ. Ким төһөнү ыһа-тоҕо, хоро таста сатаабытын билбит суох. (Дьиҥинэн, биһиги сирбитигэр үлэлиир тэрилтэ иһин-хоойун билэрбит туох да куһаҕана суох буолуохтаах этэ). Бука улахан салааһыннаах иһити былдьаһан урут бииргэ үлэлээн кэлбит дьон икки ардыгар "ар-бур" таҕыстаҕа. Хампаанньа акцията атыыланарыгар харчы оонньотуон баҕарар дьон элбэх, олор тустарынан сиһилии информациятын ууратыллан өһүргэс буолбут дьон тилэри дакылааттаан биэрэргэ бука бэлэм сырыттахтара. 
***
Санатар эбит буоллахха, ДОЙНИКОВ даҕаны, ПОТРУБЕЙКО даҕаны ааспыт биэс сыл устата өрөспүүбүлүкэ туһа диэн кирсилэрин быспыттарын өйдөөбөппүт. Саҥата суох кэҕиҥнэс "генераллар" буолан кунуопка баттааччылар этэрээттэрин хаҥата  сылдьыбыттара.
"АЛРОСАттан уурайбыт дьон аныгыс парламеҥҥа киирэр суоллара быһыллар. Бэйэлэрэ да дьокутаат мандаатыгар улаханнык дураһыйбат дьон буолуохтаахтар. ПОТРУБЕЙКО даҕаны, ДОЙНИКОВ даҕаны өрөспүүбүлүкэҕэ үйэлэрин моҥуохтара диэни киһи итэҕэйбэт - бу бары барбыт, барар, барыахтаах дьон. 
ДОЙНИКОВ "АЛРОСАҕа" уонунан үрдүк таһымнаах "профессионаллар" ууратылыннылар диэн Аһаҕас суругар суҥхарар. Кини иллэрээ сыллааҕыта эмиэ, президеннэрэ АНДРЕЕВ бирикээһинэн, бастакы вице-президентэн намтатыллан көннөрү вице-президент буолбута. ДОЙНИКОВ үлэтин контрагынан "АЛРОСАҕа" өссө да 2015 сыл балаҕан ыйыгар диэри үлэлиэхтээҕэ. 
***
Аартык.ру
.