Эбиэт кэннэ Ил Түмэн мунньаҕар республика президенэ Егор БОРИСОВ кыттара көһүтүллэр. Президент биэс сыл сокуон оҥорбут сололоохторго бэйэтин тылын-өһүн тиэрдиэхтээх.
Биэс сыл баарын-суоҕун биллэрбэтэх депутат Юрий ДОЙНИКОВ "АЛРОСАҕа" соччото суох сыһыан олохтоммутун иһитиннэрээри мунньах бэбиэскэтигэр "Араас" диэн пууну киллэрэри туруоруста. ДОЙНИКОВ аныгыскы быыбарга эмиэ кыттар санаалаах олорор эбит. "АЛРОСАта" аһыллыбыта, атыыланан эрэр, онон алмаас генераллара парламеҥҥа наадалара бүттэ ини. ДОЙНИКОВ тылыттан иһиттэххэ хампаанньа президенэ депутат быыбардааччыларын кытары көрсүһэрин бобор эбит. Ону ДОЙНИКОВ үҥсэлиир баҕалаах олорор. Бэйэтин уйатыгар уу киирдэҕинэ эрэ "Арааһы" туруорсар депутаттар туохха наадаларый?
Ил Түмэн бүгүн 29 боппуруоһу көрүөхтээх. Ол иһигэр Виталий БАСЫГЫСОВ 5-с мунньах үтүөтүн-өҥөтүн кэпсиэхтээх.
***
Аартык.ру
Ил Түмэн V-с мунньаҕын депутаттарын тиһэх мунньаҕа
Понедельник, 24 Июня 2013 11:37
Бүгүн, бэс ыйын 24 күнүгэр, Ил Түмэн депутаттарын мунньаҕын тиһэх 44-с сессията буола турар. Депутат Владимир ФЕДОРОВ капитальнай өрөмүөҥҥэ сыһыаннаах өссө биир мунньаҕы кэлэр ыйга тэрийиэххэ диэн этии киллэрбитин коллегалара өйөөбөтүлэр. Бу дьон бары кэриэтэ күһүҥҥү Ил Түмэн быыбарыгар эмиэ кыттар баҕалаах сылдьаллар, онон быыбар хампаанньатыгар онтон да суох аҕыйах кэм хаалбытын "атыҥҥа" барыахтарын баҕарбатахтара чахчы.