Санатар эбит буоллахха, "Вести Якутии" хаһыакка суруналыыс Виктория ГАБЫШЕВА ХИФУ ректорын научнай үлэтэ атын киһи үлэтин, туох да ыйыыта-кэрдиитэ суох устан ылыллыбытын туһунан бэчээттээбитэ. Егор Афанасьевич "республикаҕа үгүс үтүөнү оҥорбут дьону соруйан суоһараары итинник олоҕо суох сураҕы тарҕаталлар" диэн эттэ. Ону таһынан, соторутааҕыта эмиэ "була сатаан баһааҕырдаары президент джип-массыынатын суоппара "наар суол  быраабылатын кэһэрин" саралаан тарҕатыллыбыт информация сымыйатын" ыйда. "Мин суоппарым 30 сыл ыстаастаах, сүрдээх көнө киһи. Миигин таспыта 14 сыл буолла. Ити сымыйа сурах тарҕанар кэмигэр кини уоппускаҕа сылдьыбыта. Ол кэмҥэ солбуйбут киһи билигин үлэлээбэт. Уонна ити суруйар түбэлтэлэригэр суол быраабылатын кэһии суох", - диэн муос-таас курдук эттэ.
Президент Москубатааҕы пресс-конференциятыгар  үктэтиилээх боппуруоһу кимнээх бэрдэрбиттэрин туһунан туоһулаһыыга, Егор Афанасьевич "тэрийээччилэрэ кимнээҕэ биллэр, биллэр буоллаҕа" диэн эрэллээхтик хоруйдаата. "Аартык.ру" "бэйэҕит суруйбуккут дии, тоҕо иккистээн күөдьүтэҕит" диэн сэмэлээтэ. 

Президент бэс ыйын 17 күнүгэр дуоһунаһыгар анаммыта лоп-бааччы 3 сылын туолла. Бу кэмҥэ кини саамай улахан ситиһиитинэн олох-хамнас туруктаах буолбутун аахта, уонна общественность кириитикэлиир эрэ оруолтан көһөн, былааһы кытары бииргэ үлэҕэ-хамнаска кыттыһар, бэйэтин олоҕун бэйэтэ оҥостор  санааламмытын ааттаата. Холобур быһыытынан Тиксии ахтылынна. Тоҥмут бөһүөлэк олохтоохторо бастаан олус абатыйан былааһы сирэй-харах анньа тоһуйбуттар. Онтон киһилии кэпсэтии кэнниттэн, бэйэлэрэ эмиэ ылсан үлэ хаамыытын хонтуруоллаан, кыттыһан, көмөлөһөн киирэн барбыттар. Итини таһынан, урукку улахан, баараҕай бырайыактарынан эрэ үлүһүйүү тохтоон, нэһилиэнньэ "кыра кыһалҕаларын" быһаарарга былаас сирэйинэн хайыспытын эттэ. Ол иһигэр дьиэ-уот боппуруоһа, арыгыны утары охсуһуу о.д.а.
Суруналыыстар ПОДГОЛОВ уонна КУРКУТОВ миниистирдэриттэн уһуллубуттарын умнубатылар. Сымыйаччы, албын-көлдьүн, итириксит тойоттор кинилэр суолларын батыһыахтара диэн президент суостаахтык эттэ. "Саарбахтаамаҥ!" - диэн буолла. Бу уһуллубут миниистирдэр кини иннинэ тахсыбыт каадырдар, кинилэр "үүнэллэригэр-сайдалларыгар" Барыыһап кыттыгаһа суоҕун эттэ. Икки баһа суох министиэристибэни кэнэҕэс ким салайыаҕын  эппэтэ. "Көһүтүҥ", - диэн буолла. Каадыр политиката сөптөөхтүк баран иһэригэр санаата саарбахтаабат эбит. 
"Пилотнай проект" салгыы үлэлиэхтээх, быйыл аҕыйах суума көрүлүннэ, эһиил ити суума уларыйыан сөп.
"ЯТЭК" гааска монополист тарыыбын эмиэ үрдэтээри оҥостубута кыаллыбатах. Хампаанньа баһылыгын Зиявудин МАГОМЕДОВЫ кытары Егор БОРИСОВ көрсүбүтүн түмүгэр ити сүөргү дьыала тохтотуллубут.
"АЛРОСА" АК акцията атыыланнаҕына "РИК" ААОҕа киириэхтээҕин эттэ. "РИК" ААОну депутаттар да ситэри кыайан отчуоттаппаттар диэн сорох суруналыыстар саарбахтаан эрдэхтэринэ, президент ол саарбахтыыр санааны кум-хам тутта: "РИК" араас уорганнарынан толору хонтуруолланар, бастатан туран, правительствонан!" - дэннэ.
2015 сыл ахтылынна. "Собянин быыбарга барда диэн эрдэ ыыта сатаамаҥ!  Мин хаһан да чэпчэки суолу талбатаҕым, 2015 сыл бэс ыйын 17-гэр диэри президенинэн анаммытым, оччоҕо диэри олоруом!" - диэтэ. Быһата: "Не дождетесь!" - диэн буолла.

"Тыа сирин сылын" туох эмэ түмүгүн сыл бүтэһигэр көрүөххүт диэн президент эрэннэрдэ. Былырыын кураан дьыл буолан, от, уматык тиийбэтэ аралдьытан, аһыҥа буулаан, уот туран "Тыа сирин сылыгар" эрдэ олохтоохтук бэлэмнэнэр кыаллыбатах. Ол иһин субу билигин киһи баҕарбытын курдук үтүө түмүк, түргэн-тарҕан уларыйыы көстүбэт.  Тыа сирэ - саамай көнтөрүк, түргэнник уларыйан биэрбэт салаа.  Аҥаардас тыа хаһаайыстыбатын эрэ буолбакка тыа сирин барытын хабан уларытыы киллэрдэххэ көдьүүстээх буоларын өйдөөн, ол иһин бүтүн ТЫА СИРИН сыла биллэриллибит. 
Ону таһынан, элбэх оҕолоох ыалларга сир түҥэтигэ, Өлүөнэни туоруур муоста тутуута, прессаны кытары сыһыан, Ньурбаҕа үрдүк күүрүүлээх линия тутуута таарылыннылар.
"Муоста тутуллара бүтэһиктээхтик быһаарыллынна, сыаната 40 млрд, бачча сууммаҕа бэдэрээччит көстүө" дэннэ. Ньурбалар уоттарыгар үп-харчы тиийбэт, дьиҥинэн Сунтаар-Өлүөхүмэ линиятын сэргэ тардыллыахтааҕа хаалбыт, ол да буоллар федеральнай программаҕа бу бырайыак киирэ сыһыаҕар эрэл кыыма баар эбит.  Президент, правительство мунньахтарыгар "дьиэлэригэр курдук" сылдьыан баҕалаах суруналыыстар баҕалара туолар кыаҕа суоҕун өссө санатта.
Оттон Сталиҥҥа памятник туруорбут дьон туһунан санаата судургу буолла: Ленин болуоссатыгар турбута эбитэ буоллар кырдьык ылсыахха баара, ону - ким эрэ бэйэтэ бас билэр тиэргэнигэр тугу баҕарар туруорара көҥүл. Сталины ким эрэ хайгыыр, оттон репрессийэҕэ хаарыллыбыт 40 мөл. сиэртибэ сыдьааннара биһирээбэттэрэ чуолкай.   
***
Саха республикатын президенэ сонуну тарҕатар идэлээхтэи кытары уочараттаах көрсүһүүтүттэн тэттиктик билиһиннэрдэххэ ситигирдик.  
***
Аартык.ру