Дойду муҥур дуоһунастаах тойоно кэргэниттэн арахсыбытын кэннэ, тойон-хотун харыыта суох арахсан, саппай уопсан барыахтаах.
Былыр да, аны да киһи баһылыгын үтүктэрэ кэмэ суох: таҥаһыттан-сабыттан, туттар-хаптар хамсаныытыттан, тыл этэр куолутуттан, олох олорор сиэриттэн - барытыттан түһэрэн ылан куоппуйалыыр майгылаах. 
Дьиэ кэргэн института ССРС саҕаттан өрө тутуллан (кэнники кэмҥэ көрүнньүк да буоллар) кэлбит эбит буоллаҕына, аныгы Россияҕа дойду президенэ 30 сыл ыал буолан олорбут олоҕуттан бэс ыйын 6 киэһэтигэр аккаастанна.
Путиннар "Россия24" каналга арахсыы - "иккиэннэрин быһаарыыта" буоларын эттилэр. Видеоҕа көрдөххө, эр киһитинээҕэр дьахтара ыгылыйбыт, сирэйигэр-хараҕыгар аймаммыт санаа саспыт көрүҥнээх. Ол аата Путиммыт  "Кабаевалыын сыбаайбата, икки оҕото" кырдьык буолан тахсар дуо? Оччотугар узбектар астык күтүөттэммиттэр диэтэҕиҥ, ордук гимнастка тренерин кэргэнэ олигарх Алишер Усманов күнэ өссө күндээрбит. Баҕар Азия кыыһын таптаан, президеммит "Евразийскай сойуус" диэн идиэйэлэммитэ буолаарй? 
Президент арахсыбытын кэнниттэн, премьергэ сыыттыыр артыыскалара эмиэ Медведевтэри араартыыра дуу...
***
Путин арахсыбытын туһунан планета барыта ырыта олорор.  Ким эрэ дьахтарын көҥүлгэ ыыппытын хайҕаата, ким эрэ тиһэх сиэр-майгы института үрэлиннэ диэн айманна. 

Оттон аныгы аан дойдуга судаарыстыбалар баһылыктара төһө арахсыбыттарай? Бу туһунан "Русский пионер" сайт суруйбут. Онно бастакынан Францияҕа президеннээн олорбут Николя Саркозины ахтыллыбыт.
Саркози уруккуттан даҕаны дьахтары уйбат киһи эбит - үстэ ойохтоно сылдьыбыт. Ону даҕаны сокуон хараҕынан. Бастакы кэргэниттэн Мари-Доминик Кюльоли диэн корсиканкаттан икки уолламмыт. Мэр буолан баран Сесилия Мартены ылбыт, биир уолламмыт. Онтон президент буолан баран итальянканы Карло Брунинылыын холбоһор.
Франция историятыгар бастакы арахсыбыт президент уонна президеннии олорон уруу тэрийбит киһи - Саркози.

Италияҕа Сильвио Берлускони дьууппаны халтай аһардыбат премьер-миниистир этэ. Бу киһи эдэр сааһыттан кэрэ кыргыттар күрэхтэрин тэрийэр дьаллыктаах эбит. Бастакы кэргэнэ Карла-Эльвира Далл Ольо киниэхэ кыыһы уонна уолу төрөппүт. Онтон Бердускони артыыс Вероника Ларионы кытары холбоспут, үс оҕоломмуттар, 30 сыл олорбуттар. Арахсыы төрүөтэ 18 саастаах модель буолбут. Вероника - дьиҥнээх итальянка бастакынан арахсарга сайабылыанньа биэрбит уонна күҥҥэ 100 тыһ. евро ылар курдук суутунан уураахтаппыт. Уопсайынан Берлускони дьахтара суох халтай хаампат  кыыбаҕалаах сурахтаах.

Швеция премьер-министрэ Ханс Перссон 2003 сыллаахха кэргэнэ Анникаттан арахпыта. Перссоннар ыал буолан 8 сыл олорбуттар, уопсай оҕолоро суох эбит. Иккиэн атын-атын киһиттэн улахан оҕолордоохторо. Анника эрин "былааска талаһар, онуоха мин мэһэйдээбэппин" диэн арахсыыны быһаарбыт. 

Швеция иккис арахсыспыт премьер-миниистирэ Фредрик Рейнфельд кэргэнэ Филиппаны кытары 20 сыл олорбуттар, ол тухары 3 оҕоломмуттар. 
Англияҕа Принц Чарльз уонна Диана Спенсер 1996 сыллаахха арахсыбыттара. 

Германия канцлера Гельмут Коль кэргэнэ Ханнилораны кытары 40 сыл олорбуттара. Ханнилора күн уотугар аллергиялыыр ыарыылаах эбит, онтун тулуйбакка бэйэтигэр тиийинэн өлбүт. Коль кэргэнэ, доҕоро, көмөлөһөөччүтэ  өлбүтүгэр сүрдээҕин аймаммыта дииллэр. Онтон Коль  74 сааһыгар 2004 сыллаахха 40 саастаах Майка Рихтери кытары билсибит. Бу дьахтары 2008 сыллаахха кэргэн ылбыт.  
***
Путиннар икки оҕолоро улахаттар, иккиэн Россияҕа олороллор диэн төрөппүттэр эппиттэр. 

***
Аартык.ру