Кэбээйи-Дьааҥы биир мандаттаах уокуругуттан Ил Түмэн быыбарыгар кыттар баҕата ханнан эрэр Мэхээлэ ЭЭБИРИСТЭП урукку партиятын тойоно Сергей НЕВЕРОВ "КоммерсантЪ" хаһыакка быйыл ыам ыйын 21 күнүгэр биэрбит интервьютугар өлөрдүү өһүргэммит. НЕВЕРОВ: "Будучи депутатом Госдумы, он [Эверстов] сел в вертолёт и улетел на охоту, в то время как этот вертолёт требовался для санавиации. Мы тогда подвергли его жёсткой критике, а потом расстались с ним", - диэн эппит.
Узбекистан уонна Россия олигарха Алишер УСМАНОВ бас билэр "КоммерсантЪ" издательскай дьиэтин кумааҕы бородууксуйатын корреспондена сүрүн "ньыгылтан" ЭЭБИРИСТЭП партийнай билиэтинэн тамнаммытын ыйыппытыгар итинник хардарбыт. Онто да суох айдааны сырса сылдьан сонордоон булан буккуллар Ылдьыыс ону сыыска-буорга түһэрбэккэ хабан ылан Дьокуускай суутугар "дьоһуммун, чиэспин, суобаспын киртитэллэрин, ааппын алдьаталларын көмүскээҥ" диэн үҥэ-сүктэ сатаабыт. Ол гынан баран судьуйа Марианна ОКОНЕШНИКОВА сүрэҕэ тоҥ буолан биэрбит. "Үҥсэр киһиҥ олорор сиригэр баран үҥүс!" - диэбит. 
ЭЭБИРИСТЭП Москуба суутугар улуу "ньыгылы" кытары сууттаһарыгар тыһа тиийбэтэ чахчы. "Дьэ, атаҕастааҥ эриҥ, ЭЭБИРИСТЭП да уулуссатыгар күн тыгыаҕа, кустук оонньуоҕа" диэн конфиденциальнай источникпыт эмиэ бөтүөхтээн кэллэ. Уонна элик бэрдэ ЭЭБИРИСТЭП аграрийдары кытары куомуннаһан "Үөкүйэ" маҕаһыын Макаарабын кытары түүннэри мунньахтаабытын туһунан кэпсээн кэҕиҥнээтэ. Өссө Ылдьыыс тойоно Бээчэ ЫСТЫРЫАП ылгын уолун "ГыПы" баартыйаҕа сыыттыы сатыы сылдьар сураҕын тиэртэ. Быыпсай дархаммыт үбүлүөйдээн баран үргүлдьү оннооҕу уһун киһини кытары көрсөн илии охсуһа сатаабытын этэн баран источникпыт олоп-чолоп көрдө уонна эргичис гынан баран тугу да билбэтэх киһи курдук дьалты хааман хантарыҥныы турда.
***
Аартык.ру