Уонна «маннык буруйдартан сиэттэрэн, биири эрэ этиэҕи баҕарыллар-- кытаатан, бэйэбит эрэ оҕолорбутугар буолбакка, аттынааҕы ыалларбыт оҕолоругар эмиэ болҕомтолоох буолуоххайыҥ. Иһэр-аһыыр, айдааннаахтык олорор дьон оҕолорун ордук кэтээн көрүөххэ наада буолуо. Оҕо сирэйигэр-хараҕар, тутта-хапта сылдьарыгар хайдах олохтооҕо, туруктааҕа син удумаҕаланар буолуохтаах. Оҕону кырбыыр, атаҕастыыр, куһаҕаҥҥа кучуйар чахчылары биллэргит эрэ, уталыппакка, быраабы араҥаччылыыр уорганнарга (бастакынан – участковайга) биллэриэххэ наада. Кэмигэр миэрэ ылыллан, оҕо олоҕун быыһыахха сөп» диэн түмүктээбитим.

Онуоха баара, ыаллар оҕолоругар болҕомтолоох буолуохтааҕар, бэйэлээх бэйэлэрин оҕолорун атаҕастыыр, кырбаан инбэлиит оҥортуур, өлөртүүр икки атахтаах сиэхситтэр бааллар буоллаҕа-а! Олох охсууларыттан, ыарахаттарыттан саамай көмүскүөхтээх-харыстыахтаах, дурда-хахха буолуохтаах чугас киһи кыһыл илиитинэн оҕотун дьылҕатын быһаарара диэн – киһи өстөөҕөр да баҕарбат дьыалата!

Икки нэдиэлэ анараа өттүгэр Ньурба куоракка тахсыбыт иэдээн республика олохтоохторун барытын аймаата. Итирик аҕа буолуохсут 5-тээх кыысчаанын өйүн сүтэриэр, балыыһаҕа киириэр диэри төбөҕө электрическэй быанан, илиитинэн дэлби кырбаан тутуллубута. Ийэлэрэ уонна 7 саастаах улахан кыыстара кыракый барахсаны көмүскэһэн, аҕаларын тохтото сатаабыттар да, кыыллыйбыт баҕайы ону истиэ баара дуо! Оҕо барахсаны ол күн Ньурба балыыһатын хирургия салаатыгар киллэрбиттэр, кыракый эрэйдээх комаҕа сытар этэ.

Оттон бэҕэһээ биллибитинэн, кыракый барахсан сырдык тыына быстаахтаабыт... Бигэргэммэтэх иһитиннэриинэн, ийэтэ эрэйдээх соһуччу саба бүрүүкээбит иэдээн ыарын уйбакка, эмп иһэн, бэйэтигэр тиийинэ сатаабытын, быраастар быыһаабыттар.

Силиэстийэ уорганнара сиэхсиккэ бастаан РФ Холуобунай кодексатын 111-с ыст. 2-с чааһын «б» пуунунан холуобунай дьыала тэрийбиттэрэ. Ол эбэтэр, кыра саастаах оҕо олоҕор кутталлаах, доруобуйатыгар ыарахан эмсэҕэлээһини оҥоруу иһин. Кыысчаан өлбүтүнэн, ити ыстатыйата ыараан биэрэрин бэҕэһээ иһитиннэрдилэр. Муус устар 16 күнүттэн бу өлөрүөхсүт хаайыллан олорор. Сокуон хараҕынан кытаанахтык эппиэттээтэр ханнык диэн баҕалаахпын.

Сокуоннай саастарын ситэ илик оҕолору буруйу оҥоруу дьайыыларыттн көмүскүүр, быыһыыр сыалтан РФ Силиэстийэлиир кэмитиэтин Саха сиринээҕи управлениетыгар «Оҕоҕо куттал суоһуур» диэн төлөпүөн үлэлиирин иһитиннэрэбин: 8 (4112) 40-32-37 – бу нүөмэргэ эрийэн, оҕону атаҕастааһын чахчыларын биллэрэргитигэр көрдөһөллөр. Хас биирдии иһитиннэрии регистрацияланыаҕа уонна сокуонунан ирдэниллэр болдьох иһинэн көрүллүөҕэ диэн мэктиэлииллэр. 
***

Вера МАКАРОВА,
"Саха сирэ".