Эргиччи көр "сиэрдээхтэр" олорон, элбиих да элбэх общественнай хамсааһын  аатын кэчигирэтэн баран норуот депутатын кытары - Владимир ФЕДОРОВТЫЫН меморандум түһэристилэр.  
Холобур, "сиэрдээхтэр" ааттарыттан Никита ТИМОФЕЕВ эрэ баар. Жанна ЕГОРОВА "сиэрдээхтэр" испииһэктэринэн Сунтаарга аны күһүн Ил Түмэн быыбарыгар туруохтаах. Бу сырыыга кини "амплуатын" уларытан, социальнай-демократическай дьахталлар общественнай түмсүүлэрин региональнай бэрэстэбиитэлэ буолла. "Сиэрдээхтэр" фракцияларын салайааччыта - Ольга ФЕДОРОВА миниистирдии барбытын кэннэ, Ил Түмэн депутатын мандатыгар тиксибит - Роман ЛИТВИНЦЕВ бүгүн "Биһиги хотулар" ("Мы северяне") общественнай тэрилтэ бэрэстэбиитэлэ буолла. Эмиэ биир "сиэрдээх" уоттаах чилиэнэ, Мэҥэҕэ "сиэрдээхтэр" испииһэктэринэн Ил Түмэн быыбарыгар кыттыахтаах Михаил САННИКОВ аграрнай фронт ("сиэрдээхтэр" былчархайдара) аатыттан кытынна уонна бу дьону кытары быыбарга бэйэ-бэйэлэрин өйөһүөх, мэһэйдэһиэ суох буолан илии баттаста.
Координационнай Сэбиэт бэрэссэдээтэлинэн Владимир ФЕДОРОВ талылынна. Коммунистар бу меморандумҥа илии баттаһалларын-суоҕун үөһээ салалталара быһаарыахтаах. ЛДПР региональнай салайааччытын ПАРАХИНЫ нөҥүөлээн Ленскэйтэн биир Жириновскай саллаата бу холбоһукка  киирэргэ бэлэмин биллэрбит.
Саҥа тэриллибит политическэй күүс Координационнай Сүбэтин бэрэссэдээтэлэ эппитинэн, испииһэк өссө да аһаҕас, праймеризкэ хотторон кыһыйбыт "ньыгыллары" кытары күүтэллэрин эттэ. Балаҕан ыйынааҕы быыбардарга саҥа холбоһук биир киһини кыттыһан быыбарга туруоруон сөбүн эттилэр. Мандат тыырсыытын механизмын өссө толкуйдуу иликтэр эбит. Үллэстэр саҕана ар-бур саҥарсан туруохтарын сөп. "Механизмын оҥордохпутуна суруналыыстарга биллэриэхпит", - диэн Владимир ФЕДОРОВ эрэннэрдэ. Кини "Гражданскай платформа" партия чилиэнэ буолбатаҕын этэр: "Аныгыс 2017 сыллааҕы быыбарга мин партията суох буолуохтаахпын. Хаһаайыстыбанньык политическэй өҥө суоҕа ордук", - диир. 
***
Политическэй холбоһук тугу тобулан тахсарын көрөн иһиэхпит.
***
Аартык ру.