Бу кэлиҥҥи кэмҥэ президеммит итэҕэһин-быһаҕаһын хостуур суруйуулар бэчээккэ утуу-субуу тахсар буоллулар. Сурах быһыытынан, киин сиртэн бүтүн политтехнологтар көһөн кэлэн республика салалтатын "технологиялыы" олороллоро иһиллэр. Онно президент Егор БОРИСОВ "сымыйа рейтиниттэн" саҕалаан "Кыым" хаһыаты салайар Мария ХРИСТОФОРОВА куһаҕан менеджеригэр тиийэ, правительство солбуйар бэрэссэдээтэлэ Анатолий СКРЫБЫКИН "хоруупсуйа хоруола буолбутугар" тиийэ суруйуулар дэлэйдилэр. Онуоха ытаһа буолан, бэйэбит дьоммут президент анаабыт каадырдарын тура-тура "саралаан", өйдөммөт балаһыанньаны үөскэтэллэр. Ол аата бары куомуннаһан "сии-аһыы" олордохторо диэн санааҕа тиэрдэр. "Бэйэбититтэн саҕалаан эрээппитин ыраастаныахтаахпыт, АТЫТТАРГА холобур буолар курдук" диэн бириинсиптэһэн бэйэ-бэйэни түһэрсии, аныгы сиэмэх үйэҕэ - үктэтии уонна үктэнии буолар. Бэчээт - күүс. Тыл - ох. Биир өттүнэн, суруналыыс киһи идэтин сиэринэн общество итэҕэһин - бааһын-искэнин ыйан биэриэхтээх. Иккис өттүнэн, эмиэ да аҕыйах ахсааннаах норуот бэрэстэбиитэлэ буоларын быһыытынан, саха суруксута идэтин бириинсибигэр  олуллан хаалар. Итини билэ-билэ ньимийэн олоруохтааххыт диэн эппэппин эрээри, ханнык баҕарар информация кэннигэр ханнык эрэ күүстэр туралларын сэрэйэр кэм үүннэ диэн этиэхпин баҕарабын. Тыала суохха мас хамсаабат. Биир киһи "хараардыллар" буоллаҕына, ол күлүк киниэхэ эрэ буолбакка атын (чуолаан кинини анаабыт дуоһунастаах киһиэхэ) эмиэ түһэр. Ону учуоттуохха, атын күүстэр интэриэстэригэр ытаһа буолумуохха наада диэн этиэхпин баҕарарым сөптөөхтүк өйдөннөр ханнык.  
 "Кыым" норуот хаһыата дэммит буоллаҕына, кини миссията киэҥ, далааһыннаах буолуохтаах этэ. Кини - ИДЕОЛОГИЯНЫ оҥоруохтааҕа. Бары да сэрэйэбит, бу хаһыат иккистээн тыын ыларыгар кини кэннигэр ким турбутун. Ол гынан баран, билигин саамай эппиэтинэстээх кэмҥэ кини туруорбут каадырдарын  тура-тура "боломуочуйатын үрдэтэрин" суруйуу, атын күүстэргэ эгэ эрэ буоллаҕа. 
Информация араас. Ханнык сыалга тахсыбытын таайыахха уонна сөптөөхтүк туһана сатыахха. 
***
Туйаара НУТЧИНА,
Аартык.ру