Оччолорго интернети бэрт аҕыйах киһи туһанара. Ол да буоллар, сылтан сыл ааҕааччы ахсаана элбээн, билигин интернетэ суох күн ааспат буолла. Кэтээн көрөөччүлэр этэллэринэн, аны 5-6 сылынан интернет саамай кытыы сир олохтоохторугар син биир телевидение курдук күннэтэ туһанар эйгэ кэриэтэ буолуоҕа диилэр.
Аҕыс сыл анараа өттүгэр "В Якутии.ру" сайт тэриллэригэр икки эрэ интернет СМИ көрүҥэ баара: СИА уонна "Курсор.ру". Ону даҕаны "Курсор.ру" бэйэтэ сонуну суруйбата, атыттартан ылан хатылаан эрэ биэрэрэ. "Суруналыыһы - атаҕа аһатар" диэн этиини туттабыт. Ол гынан баран, ити этии ыйга, кыбаарталга биирдэ тахсар таһаарыылар суруналыыстарыгар соччо барсыбат. Оттон интернет-хаһыакка, кырдьык, сүүрүүнү-көтүүнү, түргэн-тарҕан хамсаныыны сэргэ, тэһэ көрөн, суруйан, тиһэн, саҕалаан-түмүктээн оҥоро охсон суруйууларгын "ыйыы" охсуохтааххын. Информацияны бултаһар "бөрө" буолуохтааххын. Лена Тихонова бэйэтэ майгытынан түргэн-тарҕан, тобуллаҕас өйдөөх, сытыы тыллаах, саҥаны барытын билэ-көрө сатыыр дьаныардаах. Ити майгыта  сонун хомуйартан саҕалаан аныгы техниканы баһылыырга тиийэ.
Кини суруйуулара олохтоохтор, күүстээхтэр, үксүлэрэ "айдааннаахтар".
Сайт үксүн кэриэтэ соҕотох киһи санныгар сүгүллэн турар. Ол да буоллар хас күн аайы сэргэх сонуннары быысталы булбакка биэрэр. Пресс-релизтэри ыйыырынан эрэ муҥурдаммакка, бэйэтин авторскай көрүүтүн күннэтэ биэрэ турар. Онон тардар. Дьэ, бу тиэмэни Лена хайдах суруйар эбит диэн ааҕааччы кэтэһэр. Билиҥҥи сайт элбэх кэмигэр индивидуальность - ураты, туспа анаарыы ирдэнэр. Ааҕааччыны ол тардар.
Саха сирин сайтарыттан аан бастаан Лена быһа репортаж оҥорбута. Видеоинтервьюлары хото туһанан эрэр. Ити сайт сайдар кыаҕын кэҥэтэр. Өссө биир сүүйүүнэн буолар, "В Якутии.ру" саамай түргэнник арыллар-сабыллар сайт. Бу аныгы бириэмэ сырсыытыгар ол улахан оруоллаах. Тихонова суруналыыс эрэ буолбатах, бэйэтэ эмиэ веб-дизайнер, саха сатаабатаҕа суох диэн тыллаах буолар. Ылла да барытыгар ылсан үлэлээн киирэн барар. Урут, саха нэс, бытаан хамсаныылаах, толкуйдаах  диир эбит буоллахтарына, аныгы саха кэми кытары тэҥҥэ айанныыр, буолаары буолан саха кыргыттара бу эйгэҕэ үүннүү-тэһииннии сылдьаллара олус хайҕаллаах.  Сотору кэминэн аныгы өйдөөх-санаалаах ыччат дьон (ордук эр дьон суруналыыстыкатын күүтэбит) көлүөнэтэ үүнүөҕэ, таһымнаах суруйуулаах уолаттар-кыргыттар интернеккэ киириэхтэрэ диэн эрэнэбит. Ханнык баҕарар эйгэҕэ көлүөнэ солбуһуктаах буоллаҕына, норуот үйэтэ уһуур, бэйэтин көмүскэнэр кыаҕа кэҥиир. Интернет диэн - сэбиргэл. Аныгы күүстээх, суоһарыылаах, дьон халыҥ халҕаһатын хамсатар кыахтаах - СЭБИРГЭЛ. Онно саха суруналыыстара, сахалыы тыыннаах, өйдөөх-санаалаах дьоно бааллара - КӨМҮСКЭЛ.
Онон,  коллегабытын Елена ТИХОНОВАНЫ "В Якутии.ру" интернет-хаһыат 8 саастаах төрөөбүт күнүнэн эҕэрдэлиибит! Сэргэх, саҥа сонуннары, суруйуулары күүтэбит. Муус устар 27 күнүгэр - СР Төрүт сокуона ылыллыбыт күнүгэр тэриллибит хаһыат салгыы сайда, туруулаһар, туруорсар күүрээнэ уҕараабатыгар баҕарабыт!
***
Туйаара НУТЧИНА,
"Аартык.ру" редактора.