Санатар эбит буоллахха, Александр АКИМОВ "ньыгыллар" ыытар праймеризтэригэр биир мандаттаах уокурукка кандидат.  Кинини сэргэ "ньыгыллар" Айсен ТИХОНОВЫ уонна Николай ОБОЮКОВЫ туруорбуттар. ТИХОНОВ 1981 сыллааҕы, "Якутия" авиахампаанньа ААО генеральнай дириэктэрин сүбэһитэ. Оттон ОБОЮКОВ Кутана нэһилиэгин баһылыгын солбуйааччыта, 1987 сыллааҕы төрүөх.
Эдэр дьоннору кытары эр-бур эрийсэри Александр АКИМОВ:
- Кииристиннэр ээ, үөрэнниннэр, - диир.
АКИМОВ бэйэтин кыаҕар эрэнэр. Сунтаартан былаас үрдүкү хаттаҕаһыгар саамай муҥутаан үүнэ сылдьыбыт киһи кини эрэ буоллаҕа.
- Владимир ПАВЛОВ баар этэ дии, - биһиги санаппыппытыгар дьонун сыымайдыыр.
- "Сахамебель" дириэктэрин этэҕин дуо?
- Кинини. Владимир Гаврилович партия Дьокуускай куораттааҕы комитетыгар I-кы сэкиритээрдээбитэ... онтон, кырдьыга уураппыттара. Уонна  Иван МАТВЕЕВ баар этэ, эмиэ Горкомҥа, - урукку СР вице-президенэ Сэбиэскэй кэми ахтар.
- Дойдугар Сунтаарга баран кэллиҥ?
- Туох баар нэһилиэктэри барытын кэрийэн, икки нэдиэлэ буолан кэллим. 
- Умнубатахтар дуо?
- Саастаахтар, кырдьаҕастар өйдүүллэр, арай, эдэр өттө умна сыспыт быһыылаах. Тойбохойдор... уопсайынан, бары аһара үчүгэйдик көрүстүлэр. Санаам көтөҕүлүннэ.
- Дьон туох кыһалҕалаах быһыылааҕый?
- Иһэр уу боппуруоһун туруорсаллар. Тыа хаһаайыстыбатын кыһалҕата сытыы. Үрдүк күүрүүлээх уот линията кэлбит эрээри, трансформатордар эргэрбиттэр, онон кыайан тарҕаммакка турар. Дьон күүстээх уоту холбонор механизм ситэтэ суоҕуттан эрэйдэммиттэр. 
- Туттарбыт дьиэҥ-уотуҥ төһө бэркэ тураллар?
- Барытын кэрийэн көрдүм. Бары бэркэ үлэлии-хамсыы тураллар.
- Стадион...
- ...стадион, сылы быһа үлэлиир манеж, оскуолалар, спортивнай оскуола уопсай дьиэтэ, музыка оскуолата...
- Баһаам тутууну ыыттарбыт буолуохтааххын? 
- Спортивнай оонньууларынан сибээстээн элбэх тутуу барбыта. Улахан күрэхтэһиини, тэрээһини ыытыы диэн - улууска социальнай объектары, суолу-ииһи тутуу, сибээһи киллэрии буоллаҕа. Онон, ити сорохтор, республика таһымнаах спортивнай, культурнай тэрээһиҥҥэ аһара элбэх үп баранар, аҕыйатыахха диэн этэллэрэ сыыһа. Итинник тэрээһиннэрэ суох тыа сиригэр социальнай объектары кэлимсэ, биирдэ барытын тутан таһаарар кыаллыбат. Ол иһин дьиэни-уоту, суолу-ииһи сөргүтэргэ республиканскай таһымнаах күрэхтэһиилэр, тэрээһиннэр олус наадалар. 
- Сунтаарга партия испииһэгин иһигэр улахан киирсии Александр УАРОВ уонна Михаил НИКИФОРОВ икки ардыгар баран эрэр. НИКИФОРОВЫ эйиэхэ мэһэйдэһиэ диэн испииһэккэ киллэрбиттэр дииллэр. 
- Михаил Викторович хара маҥнайгыттан испииһэккэ киирсиэхтээх этэ. Биир мандаттаах уокурукка турар диэн кэпсэтии суоҕа.
- Эн хайаларыгар санааҥ сытар: УАРОВКА дуу, НИКИФОРОВКА дуу?
- Ону хаһыат нөҥүө этэрим олуона соҕус буолуо. Куоластааччы билиэҕэ. УАРОВ 20-ччэ сылы быһа Ил Түмэҥҥэ депутаттаата, ол иннинэ хоту учууталлаабыта. НИКИФОРОВ улууска баһылыктаабыта.
- Александр Константинович, бу билигин праймериз кэнниттэн Москубалыыр буоллаҕыҥ?
- Оннук.
- Уонна хаһан кэлэҕин?
- Ыһыахха.
- Чэ, этэҥҥэ буол, ситиһиилэри!
- Махтал.
***
Аартык.ру