Бастатан туран, праймеризкэ куоластыы кэлэр "выборщиктары" таҥар үлэ айдааннаахтык саҕаламмыта. Үөһэттэн түспүт  "Глушко испииһэгэр" киирбит кандидаттары кытары  олохтоох дьаһалтаҕа чугас кандидаттар, ону сэргэ тэлэһийэн баран "дойдуларыгар төннүбүт"  кандидаттар выборщиктар иһин охсуспутуттара. Ким кыайбытын ый эргэтигэр билиэхпит.
Үс сыл анараа өттүгэр СР вице-президенинэн анаммыт Дмитрий ГЛУШКО былаас көрүдүөрүгэр атаҕын тыаһа иһиллибэт бэйэтэ бу кыһыҥҥыттан саҕалаан силлиэлэнэн-холоруктанан эрэр. Вице-президент, "Биир ньыгыл Арассыыйа" олохтоох политсүбэтин сэкиритээрэ Дмитрий ГЛУШКО уобараһыгар киирэн Ил Түмэн аныгыс састаабын испииһэктээн кырылаппытын кэпсииллэр. "Бөө" диэбит саха политиктарын, Ил Түмэн "дьарҕа депутаттарын" олбохторугар хам баттаталыыр буолбута ыраатта. Дьарамай саннылаах физкультура учуутала Ил Түмэни кимиэхэ бэлэмниирий?

***

Егор БОРИСОВ - Саха республикатын бүтэһик президенэ. Кини кэнниттэн талыллар президент - Субъект БАҺЫЛЫГА (Ил Дархана) диэн ааттаныахтаах. "Вице-Ил Дархан" дуоһунаһа көтүрүллэр. Оччотугар Дм.ГЛУШКО "үлэтэ суох" хаалар. Дьэ, саҥа тыыллан-хабыллан эрэр политик былаас көрүдүөрүгэр күөгэйэр күнүгэр туораан хаалыан сөп. Ол иһин ГЛУШКО политсүбэ сэкиритээрин дуоһунаһын толору туһаныан баҕарар. Ол толору туһанарыгар киниэхэ тирэх наада. Тирэҕэ кимий? Сенатор В.А. ШТЫРОВ буолуон сөп.
ШТЫРОВ Уһук Илин салалтатыгар чугаһыы сатаата да тыһа кылгаһа бэрт буолан кыаммата диэхн этэллэр. Онон, кини хаалар дуоһунаһа - Федерация Сүбэтэ, билиҥҥи дуоһунаһа. Билигин сенатордар ФС субъект баһылыгын кытары быыбарга бииргэ талыллыахтаахтар.  Ил Дарханы норуот таларын дуу, эбэтэр ингуштар курдук парламеҥҥа талларалларбытын дуу аныгыс Ил Түмэн депутаттара быһаарыахтаахтар.  "Ньыгыллар" баҕаларынан Ил Дарханы Ил Түмэн талыахтаах. Ол иһин Ил Түмэн быыбара өлө-сүтэ саҕаланна.

ШТЫРОВ Ил Түмэҥҥэ бэйэтин "генералларын" ол иһин киллэрэ сатыыр. Ол дьон Ил Дарханы талыахтара, ону сэргэ ШТЫРОВЫ сенаторынан талыахтара. ГЛУШКО урукку президени кытары куомуннаспыт бадахтаах, ол иһин "ньыгыллар" быыбарга кыттар испииһэктэригэр Штыров саллааттарын кытары саҥа "Глушко саллааттарын" хото киллэрэ сатаан эрэллэр.
 
***

Аартык.ру