Бу кыһын быыбардыыр уокуруктары саҥаттан тыырыы барбытын түмүгэр, Чурапчы бэйэтэ туспа уокурук буолла. Киниэхэ ыаллыы сытар Таатта улууһун нэһилиэктэрэ киирэн биэрдилэр. Таатталар да, чурапчылар да урут биир улуус - Боотурускай улуус дьоно буоллаҕа. Онон, боростуой нэһилиэнньэ бэйэ-бэйэлэрин "боотурускайдарбыт" диэн уруурҕаһаллар. 
***
Балаҕан ыйыгар бу уокуруктан баартыйалар да, биир мандат туһугар да кимнээх киирсиэхтэрэй?
1. Дархан ылгын уола дэппит - Иван Константинович  МАКАРОВ, "Сахатранснефтегаз" ААО генеральнай дириэктэрэ.
Иван МАКАРОВ Ил Түмэн депутатын мандатыгар бу иннинэҕи мунньахха - III-кэ тиксэ сылдьыбыта. Оччолорго, уокурук "Чурапчытааҕы 53-с №-дээх биир мандаттаах уокурук" диэн ааттанара. (Онтон IV-с мунньахха "Чурапчы-Таатта" диэн ааттаммыта, Афанасий МАКСИМОВ депутаттыыр). МАКАРОВ аата "Туймаада нефть" ХЭТ уматыгынан хааччыйар тэрилтэни кытары сибээстээх. Ону таһынан, "Тумааданефть" нөҥүө "Байанай" сурунаал тэрийээччитин быһыытынан биллэр. 
Иван Константинович баартыйатынан - "ньыгыл". Праймеризкэ кыттан бастакы миэстэни ылыахтаах диэн "ньыгыллар" былаанныыллар. Оччотугар МАКАРОВТАРЫН алҕаан баран биир мандаттаах уокурукка киирсиһиннэрэ ыытыахтаахтар. 
Иван Константинович аатын туһунан сибээстээх айдааннар балайдалар. Олору быыбар чугаһаатаҕын аайы быылын тэбии-тэбии оппоненнара санатыахтарын сөп. 
2. Кузьма Аполлонович ФЕДОРОВ. "САПИ" фонда ньиэпкэ бырайыактарыгар үлэлээбитэ, онтон 1996 сыллаахха "Норд Ойл" диэн уматыкка үлэлиир тэрилтэ тэрийэн үлэлэтэ сылдьыбыта, ННГК "Саханефтегаз" ААО хампаанньаҕа вице-президеннии сылдьыбыта. "ЮКОС" айдаанын саҕана өрөспүүбүлүкэ интэриэһин туруулаһар этэрээккэ сылдьыбыта биллэр. Төрүкү Чурапчы, Кытаанах. 
Кузьма ФЕДОРОВ Ил Түмэҥҥэ киирсэр сураҕын истэн баран долгуйбут дьон бааллара. Иван МАКАРОВЫ утары туруо диэн, Аполлоновыһы алы гынан, ньымааттаан, билигин кини СР ОНФытыттан кандидатуратын туруорунан эрэр дииллээр. Сүрдээх тыллаах-өстөөх киһи быһыылаах, мээнэҕэ "ылгын уолга" мэһэйдэһиэ диэн сэрэхэдийбэтэхтэрэ чахчы. Ньиэп-гаас эйгэтигэр, "бу" диэн ыйар специалистарбыт да аҕыйахтар. 
 "Ньиэп магнаттарын" кэнниттэн кимнээх иһэллэрий?
1. Николай ТУЛАСЫНОВ, Таатта Чөркөөҕүн баһылыга хомуньуус баартыйаттан барар санаалааҕа иһиллэр. Таатта улууһун баһылыгын Михаил ПРОТОДЬЯКОНОВЫ кытары тыл-тылга киирсибэттэр диэн уос номоҕо кэпсиир. ТУЛАСЫНОВ айар куттаах. Аракадий АЛЕКСЕЕВ "Айан" вокальнай бөлөҕөр ыллаан-туойан, баянистаан сылдьыбыта биллэр. Өр кэм Томпо Кириэс-Халдьаайытыгар баһылыктаабыта биллэр. Кэлин төрөөбүт сиригэр төннөн, Чөркөөҕү биллэ тупсарда, кыһалҕатын наар туруорсар уонна быһаттарар мөккүөрдээх  диэн кэпсииллэр. 
2. "Баҕар киирсэр" киһинэн өссө биир киһи аатын ааттыыллар - Валентин ОХОТИНЫ. 39 саастаах ОХОТИН Ытык- Күөл ыччата, улуус мунньаҕын депутаттарын спикерэ. Эрдэ «Туймаада-торг» эргиэн киинигэр агеннаабыт,улуустааҕы  айылҕа харыстабылын инспекторынан, улуус дьаһалтатыгар специалиһынан, "СР ОДьКХ" ГУТ Тааттатааҕы салаатыгар отдел начальнигынан үлэлии сылдьан былырыын улуус депутаттарын спикеринэн талыллыбыт. Кинини "сиэрдээхтэр" өйүөх курдуктар диэн этэллэр, ону таһынан киниэхэ "За реформу ЖКХ" общественнай хамсааһын эмиэ  күүс-көмө буолуон сөбө иһиллэр.
***
Быыбарга туруу бириэмэтэ өссө да эрдэ, чугаһаатаҕына саҥа ааттар тахсыахтарын сөп. Кэтэһэбит. 
***
Аартык.ру.