Көрсүһүүгэ барыта 70-ча киһи курдук кэлбит. Үксүлэрэ астыйбыт баттахтаах, урут оруйуон, республика салалтатыгар уонна общественнай үлэҕэ дьаныардаахтык үлэлээбит ытык нүһэр кырдьаҕастар буоллулар. Төһө да куоракка олохсуйбуттарын иһин улуустарыгар туох-ханнык үлэ-хамнас барарын истэ-билэ, сорохторо сүбэ-ама буолан кыттыһа олорор дьон буоллахтара. Онон Борис ПОПОВ ааспыт сылга туох оҥоһуллубутун, билигин тугунан дьарыктана сылдьарын кэпсиирин болҕойон олорон иһиттилэр, иҥэн-тоҥон сурастылар.
ПОПОВ кулубанан талыллан баран Дьокуускайга олорор биир дойдулаахтарын кытары бастакы көрсүһүүтэ диэн буолла. Дьон маны хайҕаата, кэнэҕэс да билсэ-көрсө турарыгар эттэ, күүс-кыах баарынан төрөөбүт улуустарын туһугар сүбэ-соргу буоларга бэлэммит диэтилэр.
***
Ньурбаларга эрэ сыһыаннаах буолбатах, уопсайынан да сахаларга баар көстүү: хойох хостоһуу, бэйэ-бэйэни сирэй-харах анньыһыы баар. Бу да сырыыга баһылык икки уонна биир ытык кырдьаҕас, инньэ быыбартан сылтаан тыл-тылга киирсибэтэх мөккүөрдэрэ күөдьүйэн истэҕинэ, хата "Ньурбакаан" түмсүү чилиэнэ Розалия ЛЬВОВА "хаар маҥан баттахтаах дьон бэйэ-бэйэҕитин кытары иирсимэҥ, ыччаккытын харыстааҥ, олох салҕанар, быыбар кэнниттэн быыбар сахсаана ааһыахтаах" диэн тыл эппитин мустубут дьон улаханнык өйөөн - айдаан кэмигэр умулунна. Оннук да буолуохтаах, саастаах өттүлэрэ "эн-мин" диэн иирсэн тохтоотохторуна эрэ ыччат дьон бэйэ-бэйэни ытыгылыы үөрэниэхтэрэ. ***
Көрсүһүүгэ биһиги сайтпыт эмиэ ахтылынна. "Ньурбакаан" түмсүү салайааччыта Алевтина НИКОЛАЕВА: "Аартык.ру" диэн дьонун-сэргэтин туһугар ис сүрэҕиттэн кыһаллар, дьиҥ сахалыы сайт баар. "Ханнаҕытый хаҥыл хааннаах Ньурба ньургуннара?" диэн аһара үчүгэй, оруобуна кэмигэр турбут проблеманы көтөҕөр ыстатыйа таһаарбыта. Мин бу ыстатыйаны - дууһа кыланыыта диэн ааттыыбын", - диэн эттэ.
***
Биир саха намыын хотуна улууска каадыр боппуруоһун көтөхтө: "Бу манна кэлэн олорор кырдьаҕастар бэйэлэрин кэмнэригэр улуус, республика салалтатыгар үлэлээбит ахан дьон. Борис Николаевич, бу дьонтон "Кырдьаҕастар сүбэлэрин" тэрийэн каадыр боппуруоһугар үлэлэһэриҥ буоллар. Оччоҕо түбэһиэх дьон дуоһунаска ананаллара тохтуох, улуус аатын түһэн биэрэллэрэ суох буолуо этэ", - диэтэ.
Aныгыс күһүн буолар быыбарга Ньурба быыбардыыр уокуругуттан Ил Түмэҥҥэ уонча кандидат турар санаалаах сылдьар. Уон киһи улууһу уон аҥыы хайытыаҕа. Эрдэ сүбэлэһэн, дьиҥинэн кандидаттар ахсааннарын аҕыйатыахха, быыбарга сиэрдээхтик, дьоннорун харыстаан киирсэллэрин курдук модьуйсуохха да баара.
***
Көрсүһүүгэ элбэх түс-бас, олохтоох-оруннаах тыл этилиннэ. Тиһэҕэр дьон-сэргэ баһылык общественноһы кытары көрсөрүн салгыы ыыта турдун диэн баҕардылар. "Ньурбакааннар" бу бэйэлэрин общественнай тэрилтэлэрин иһинэн эмиэ общественнай приемнайда ас диэн сүбэлээтилэр. "Салайааччыбыт Алевтина Алексеевна НИКОЛАЕВА ылсан үлэлэһиэ этэ" дииллэр. Баһылык түмсэр сир наадатыгар сөбүлэстэ. Оннугар тиийэн ырытыах, толкуйдуох буолла.
***
Борис ПОПОВ дьокуускайдар баҕа санааларын аахсыа диэн эрэнэбит.
***
Аартык.ру