ШТЫРОВ манна кэлэн баран Мииринэйгэ бара сырытта уонна Мэҥэ Хаҥаласка.
Мииринэйгэ барара оруннаах: алмааһа, харчыта, үбэ-баайа, үүнэн тахсыбыт сирэ, тирэҕэ буоллаҕа. Оттон саха улууһугар Мэҥэ Хаҥаласка сүөһү ахсаанын үөрэппэтэҕэ, төһө үүтү ыылларыгар кыһамматаҕа биллэр. Кини интэриэһэ - тимир суол. Тимир суол тигинэччи үлэлээн сир баайын-дуолун төһө өлгөмнүк таһыахха сөбүн тургутуу.
Мэҥэ олохтоохторо Өлүөнэни туоруур муоста тутуутун ыйыталаһан көрбүттэригэр, "дойду салалтатын кытары сиэттиһэ сылдьар" бэлиитикпит муоста тутуута "кэнэҕэс былааҥҥа баарын" эрэ этэр. Аҕыс сылы быһа президент дуоһунаһыгар олорбута даҕаны ити "кэнэҕэс" кэми аҕалбата да, тиэтэппэтэ да.
Муоста тутуута - социальнай бырайыак. Саха сирин олохтоохторо Эбэ икки кытыла тиксиһэр сирэ суоҕуттан улаханнык эрэйдэнэллэр. Саас-күһүн олох тохтуурун кэриэтэ. Муоста суоҕуттан икки аҥыы арахсан олорор Илин уонна Арҕаа эҥээр олоҕо-дьаһаҕа, экономиката улаханнык эмсэҕэлиир. ШТЫРОВ онно болҕомтотун хатаабатаҕа даҕаны, хатыыр да санаата суох. "Дьон алмаастааҕар күндү" диэн эттэр  даҕаны кини барыһы сырсар киһи. Онон экономическэй барыстаах, эргитиилээх эрэ дьыалаҕа биирдэ толкуйун холбуоҕа. Кини билигин былаана диэн - хайдах эмэ гынан Уһук Илин салалтатыгар кэлэ охсуу.  
***
ШТЫРОВ салгыы республика баайын айбардыырыгар Ил Түмэн 2-с, 3-с мунньахтарыгар бэйэтин "ньадараалларын" өссө биэс сылга олордуу буолар. Парламеҥҥа бэйэтин дьонун хааллардаҕына, хайа талбыт барыстаах сокуону ыллаттарбытын курдук ыллаттара олоруон сөп.
Ил Түмэҥҥэ билигин  баартыйа испииһэгинэн уонна биир мандаттаах уокуруктан 17  барыта - 25 промышленник баар. Алмаас-бриллиант салаатыттан 12 киһи, энергетикаттан 6, хайаны байытар комплекстан 7, тутууттан 4, тырааныспартан 2 депутат олорор. Тэҥниир эбит буоллахха - агропромышленнай комплекстан биир да киһи суох. Уонна туран, тыа хаһаайыстыбата тоҕо сайдыбатый диэхпит.
Мэҥэҕэ тимир суолу тутар Ил Түмэн депутата Александр ДУДНИКОВ («Корпорация «Трансстрой-Восток» ХЭТ), биллэн турар, ШТЫРОВ саллаата. ДУДНИКОВ тимир суолу бэдэрээттэһэн тутар олохтоох тэрилтэлэргэ хамнастарын ситэ төлөөбөтүн туһунан бэчээккэ быгыалаан турар. ДУДНИКОВ солбуйааччытынан Төлөннөөх Артур - Артур АЛЕКСЕЕВ олорор. АЛЕКСЕЕВ хампаанньаҕа улахан быһаарыыны ылар боломуочуйата суох, көннөрү "олохтоох каадыр сирэйэ" диэн афиша буолан олорорун сэрэйиэххэ сөп.
"Корпорация "Трансстрой-Восток" ХЭТ олохтоох тутааччыларга хамнас төлөөбөккө эрэ, Сочитааҕы олимпиада объектарын тутуутугар балысхан сууманы кыттыһан олорорун бэйэтэ мунньахха этэн турар.
ШТЫРОВ Мэҥэҕэ сырыытын ДУДНИКОВ арыаллаата.  Бу киһи билиҥҥи Ил Түмэҥҥэ Алдан 17№-дээх уокуругуттан талыллыбыта. ШТЫРОВ былаанын олоххо киллэрсибит уонна киллэрсиэхтээх киһи быһыытынан, салгыы  мандатка киирсэрэ чуолкай.
***
ШТЫРОВ Мэҥэҕэ тахсан: «Самое большое счастье в жизни человека — это иметь возможность сделать то, что задумал, и увидеть, как задуманное сделано», — диэн Аллараа Бэстээхтээҕи тырааныспар техникумугар сылдьан эппитин көмөлөһөөччүлэрэ пресс-релизкэ тиһэн тарҕаттылар. Онон ШТЫРОВПУТ  толкуйун олоххо киллэрээри, киирбитин көрөн астынаары ытыһын сууралана сылдьар.
Ыам ыйыгар ШТЫРОВ, 60 сааһын туолуохтаах. Былаан быһыытынан манна чиэстэнэн барыахтаах. Биһиги урукку президеммтин хайа сатанарынан истиҥник эҕэрдэлээн көрсүөхтээхпит. ШТЫРОВ салайбыт республиката кинини ахтарын-суохтарын Москубаҕа көрдөрүөхтээх. Ол аныгыс дуоһунаска ананарыгар төһүү буолара саарбахтаммат этэ.
Ол гынан баран ШТЫРОВ "сахалар махталларын" наһаа ылыа суоҕун өтө сэрэйэн,  бэчээккэ аанньа ахтыллыбатын билэн,  бэйэбитин түһэрэргэ холонно. Бэйэбит да "киһи аанньа аахсыбат дьоно" буоларбытын бэйэбит "пенсионердарбытынан" үөхтэрэн көрдөрдө. Таарыччы Уһук Илини салайар дуоһунаска  чарапчыланар буолан, таарыччы билиҥҥи миниистир Виктор ИШАЕВ суолтатын эмиэ намтатан ааста.
*** 
Мэҥэлэр ШТЫРОВКА, өссө Владимир ПТИЦЫН улууһу салайан олорорун саҕана - 2006 сыллаахха "Мэҥэ Хаҥалас улууһун бочуоттаах гражданинын" аатын иҥэрбиттэр эбит. Ону субу билигин үбүлүөйүн иннинэ туттарбыттар. Махталбыт хайы-сах саҕаланнаҕа диэтэҕиҥ. 
***
Аартык.ру