Ол курдук, "Аартык.ру" редакциятыгар сонун киирбитинэн, Ньурба быыбардыыр уокурукка депутакка кандидаттар ааттара маннык буолбут:
1. Анатолий НИКОЛАЕВ. Ил Түмэн 2-с ыҥырыылаах мунньаҕар депутаттыы сылдьыбыта, урукку "Сир" баан генеральнай дириэктэрэ, билигин "Нерюнган" ХЭТ - көмүс хостуур артыал актыыбын бас билээччи. Ньурбаттан төрүттээх. Авиатехник, экэнэмиис үөрэхтээх. Ньурбатааҕы авиаэтэрээккэ Ми-8 бөртөлүөккэ техниктаабыт, онтон РСФСР Үбүн министиэристибэтин Иркутскай уобаластааҕы управлениетыгар контролер-ревизордаабыт, 1989 с. Саха сирин уобаластааҕы хомсомуолун кэмитиэтигэгэр "Саас" ГПО бухгалтер-экономистаабыт,  «Северфильм» холбоһукка кыл. бухгалтердаабыт.  1990 с. "Аэрофлот" бааҥҥа солбуйар управляющай, 1992 с. – "Сир" баан правлениетын председателэ. 1997 с. "Сахакредитбанк" президенэ этэ. 
Билигин Ньурба ыччатын Нерюнгрига илдьэн  артыалга үлэлэтэн үрдүк хамнастыыр. Элбэх ыччат Күндээдэттэн тиийэн көмүс хостуур.  Ньурбатааҕы ГОКка 5 киһи сылга үлэҕэ киирэр эбит буоллаҕына, "Нерюнгаҥҥа"  50 киһи үлэлии барар. 
2. Василий КУРНЕВ. "АЛРОСА-Нюрба" ААО генеральнай дириэктэрэ. "Ньыгыл", партия Ньурбатааҕы политсүбэтин сэкиритээрэ. 1957 сыллаахха Ленскэй оруйуонугар, Орто Наахараҕа төрөөбүт. Урут кыра кэмҥэ "Алмазы Анабара" ХЭТ эрдэҕинэ генеральнай дириэктэр солбуйааччыта этэ, бириискэ дириэктэринэн сылдьыбыта. Ол иннинэ Анаабырдааҕы хайаны байытар кэмбинээккэ генеральнай дириэктэрдээбитэ. КУРНЕВ  Ил Түмэн депутата Валерий КОЛОДЕЗНИКОВ оннугар "АЛРОСА-Нюрба" ААО генеральнай дириэктэринэн анаммыта. Василий Тарасович "ньыгыллар" быыбар иннинээҕи праймеризтэригэр кыттар санаалааҕын этэллэр. Праймеризкэ кини кыттан баран, кылааб "ньыгыл" Глушко былаанынан,  Николай ФОМИҤҤА "хотторуохтаах" дииллэр.
3. Николай ФОМИН. Эдэр-эрчимнээх "ньыгыл" байыаһа. Тобуллаҕас өйдөөх, сытыы-хотуу уол дииллэр. Ньурбаттан төрүттээх. Ил Түмэн иһинэн үлэлиир Ыччат парламенын спикерэ. ФОМИН инники икки киһи курдук көмүһүнэн-алмааһынан мохсуо бырахсар кыаҕа суох эрээри, сааһын кыаҕынан эдэрдэри угуйуон сөп.
4. Антонина ГРИГОРЬЕВА. ХИФУ пединститутун дириэктэрэ. Билиҥҥи Ил Түмэн мунньаҕар "ньыгыллартан" депутат. Ньурбаттан төрүттээх, СГУну бүтэрэн баран наука, үөрэх өттүгэр үлэлээбит киһи. Депутат быһыытынан биэс сыл устата 5 сокуону көҕүлээн ыллаттарбыт. 
5. Мария ХРИСТОФОРОВА. "Ситим" медиа бөлөх генеральнай дириэктэрэ, Саха сирин саамай элбэх хаһыатын, сурунаалын бас билээччитэ. ХРИСТОФОРОВА уонча сыллааҕыта "Ситим" медиа бөлөҕү тэрийэн "Молодежь Якутии" уонна "Кыым" хаһыаттар брендэрин атыылаһан сөргүппүт киһи. Өскөтүн "МЯ" тираһа өнүйбэтэх буоллаҕына, "Кыым" билиҥҥи туругунан 30-тан тахса тыһыынча экземплярданна. Мария Николаевна Ньурбаҕа сыһыана диэн - аҕалаах ийэтэ ньурбалар, оттон бэйэтэ Дьокуускай Сайсарытыгар төрөөбүт. "Ньыгыллар" испииһэктэригэр миэстэ көстүбэтэҕинэ, ХРИСТОФОРОВА бэйэтин бэйэтэ (самовыдвижение) кандидакка туруорунуон сөп дииллэр. 
6. Владимир ПРОКОПЬЕВ. Улуус урукку баһылыга. Биир эрэ болдьох үлэлээбитэ. Улууска кулубалыы барыан иннинэ СР баайга-дуолга миниистирин бастакы солбуйааччытынан үлэлээбитэ. Дьиҥинэн, ууну-уоту ааспыт киһи, улууһугар тиийэн үүнэн-күлүмүрдээн өрө тахсыахтаах этэ да, туохха эрэ табыллыбата. Кинини кытары дьаһалтаҕа үлэлээбит дьон Владимир Михайлович элбэхтик үлэлээбитэ дииллэр. Баҕар, олохтоохтор ситэри сыаналаабатахтара дуу. ПРОКОПЬЕВ 2-с Ил Түмэҥҥэ депутаттыы сылдьыбыта. 
***
Итини таһынан, Ньурба быыбардыыр уокуругуттан Ил Түмэҥҥэ депутакка кандидатынан урут эмиэ мандакка тиксэ сылдьыбыт устуоруйалаах, билигин Булуҥҥа баран олорор Анатолий АНТОНОВ кыттыан баҕарталыыр диэн сурах кэлэр. Ону таһынан, "Бичик" кинигэ кыһатын дириэктэрин - Август ЕГОРОВЫ "дойдугуттан тур" диэн этии киирэ сылдьыбыт дииллэр. Август Васильевичтан хардатын сураспыппытын: "Суох, турбаппын", - диэн эттэ.
Оттон улуус баһылыгын быыбарыгар кыттан баран Борис ПОПОВКА кыайтарбыт, улуус депутаттарын мунньаҕын спикерэ Сергей ЕВСЕЕВ Ил Түмэн быыбарыгар кыттар баҕатын өссө биллэрэ илик. "Толкуйдуур", - диэн этэллэр.  
***
Билиҥҥи Ил Түмэнтэн  Григорьеваттан  уонна Колодезниковтан ураты ньурбаҕа "сыттаах" депутаттар ситэриилээх былааска үлэлии бардылар.  Георгий БАЛАКШИН спорт миниистирин солбуйааччытынан барда, Алексей ШЕМЕТОВ Забайкальеҕа, Ольга ФЕДОРОВА СР экономикаҕа сайдыытын уонна промышленноска политикатын министиэристибэтин салайа бардылар. 
***
Билигин да быыбар ыраах. Өссө да саҥа ааттары истиэхпит диэн кэтэһэбит.
***
Аартык.ру