"Кулун тутар 20 күнүгэр Мэҥэ Хаҥалас улууһун баһылыга Николай Прокопьевич СТАРОСТИН Дьокуускай куоракка суруналыыстары кытары көрсүһүүтэ буолла.

Улуус баһылыга оройуонун олоҕуттан кылгастык билиһиннэрэн баран, боппуруостарга эппиэттээтэ. Мин бастакынан эрдэттэн бэлэмнээн аҕалбыт боппуруостарбын биэртэлээтим.

    АДь: - Быйыл күһүн ыытыллыахтаах СР Судаарыстыбаннай Мунньаҕар Мэҥэ Хаҥалаһы үс гына хайыттыгыт. Эн норуотунан талыллыбыт баһылык быһыытынан, бу хайытыы буолуон иннинэ нэһилиэктэриҥ олохтоохторун кытары сүбэлэспитиҥ дуо? Хайдах быһыылаахтык кинилэр санааларын биллиҥ? Референдум ыыттыҥ дуу? Тугу гынныҥ?

   НС: - РФ уонна СР быыбары ыытар сокуоннарыгар олоҕуран, дьоммун кытары сүбэлэһэн баран, бу боппуруоска илии баттаабытым. Бу араарыы түмүгэр Мэҥэ Хаҥалас интэриэһин көрөр үс депутат баар буолуоҕа. Онон бу араарыы биһиэхэ барыстаах.

    ***

    АДь: - Саха сиригэр киэҥник биллибит, биир бастыҥ үлэлээҕинэн аатырбыт «Дойду Ситимэ» диэн общественнай тэрилтэни тоҕо икки аҥыы хайыттыгыт? Бу кимиэхэ барыстааҕый?

    НС: - «Дойду ситимэ» кыайан үлэлээбэтэҕэ, ол иһин салалтатын уларытан, Птицыны туруордум.

  *** 

АДь: - СР президенэ быйылгы сылы Тыа сирин сылынан биллэрдэ. Ол эрээри Мэҥэ Хаҥаласка сыыппаралары көрдөххө, Бүтэйдээххэ, Табаҕаҕа, Төхтүргэ, Томторго, Бөкөҕө, Хаптаҕайга сүөһү ырыганнаан охтуута дэлэйбит. Аҥаардас Бөкөҕө Карамзиннар хаһаайыстыбаларыгар сүөһү күн аайы кэриэтэ өлө турар. Тыа хаһаайыстыбатын уонна аска-үөлгэ политикатын министерствотыгар сүөһүнү аһылыгынан хааччыйыы, тиэйии-таһыы үлэтэ хаһааҥҥытааҕар да тэрээһиннээхтик ыытылла турар. Манна эбии ханнык быһаарыыны биэрэҕин?

    НС: - Сүөһү дороххой аһылыгын бэлэмнээһиҥҥэ 40 тыһыынча тоннаны бэлэмниэхтээх былааммытын миэстэтигэр 30 тыһыынча тоннаны бэлэмнээтибит. Онтон 10 тыһыынча тонна аһылыгы Намҥа, Кэбээйигэ, Ньурбаҕа баран бэлэмнээтибит. Тиэйии-таһыы үлэтигэр 500 тонна от тиэллэрэ хаалла. Тыһыынчаттан ордук тонна оту атыыластыбыт. Бурдук, уотурба кэлэ турар. 40 тонна тууһу аҕаллыбыт. Онон сүөһүнү-аһы иитиигэ үлэ ыытыллар.

  ***   

АДь: - СР президенэ Е.А. Борисов этэринэн, Аллараа Бэстээҕи спутник куорат оҥоруохтаахпыт. Манна 20 тыһыынча киһи тастан үлэлии кэлэрэ күүтүллэр. Бу дьону олохсутууга ханнык дьаһаллары ылан эрэҕит? Эн быһаччы көрүүлэриҥ? Бу сахалар олорор атын улуустарын эмиэ интэриэһиргэтэр боппуруос.

     НС: - Бэстээххэ дьону олохсутууга анаан, олорор дьиэлэр тутуллуохтара. 30, 24, 23, 26 кварталларга дьиэлэр тутуллуохтара. Кыра этээстээх дьиэлэри баар гыныахпыт. Онно анаан СР бюджетыттан үбү көрөргө былаанныы сылдьабыт.

     ***

АДь: - Мэҥэ Хаҥалас улууһун дьаһалтата «Туймаада» хаһыаты кытары сууттаһан тоҕо хоттордо? РФ президенэ В.В. Путин уонна СР президенэ Е.А. Борисов дьаһалта баһылыктарын, депутаттары, судаарыстыбаннай чиновниктары аһаҕастык кириитикэлээн иһиҥ, дьону кытары кэпсэтэ, кинилэр кыһалҕаларыгар эппиэттэһэ үөрэнниннэр диэтилэр. Эн аадырыскар кириитикэҕэ сыһыаныҥ хайдаҕый? Эн, СМИ нөҥүө этиллэр норуот санаатын тууйар санаалааххын дуу, хайдаҕый?

    НС: - Мэҥэ Хаҥалас улууһун хараардар олоҕо суох элбэх ыстатыйа «Туймаада» хаһыакка таҕыста. Мин салгыы сууттаһар былааннаахпын. «Туймаада» хаһыат эппиэтинэһи сүгүөх кэриҥнээх".

    ***
Аартык.ру