Ол этии бу нэдиэлэ бэнидиэнньигэр иһилиннэ. Мэхээлэ ЭЭБИРИСТЭП суруналыыстары мунньан олорон "ньыгыллар" кэлэр ыйга, күһүҥҥү быыбарга киирсиэхтээх кандидаттарын туруоруохтахтарын эттэ. Өрөспүүбүлүкэ салалтата бүтүннүү көһө сылдьан улуус ахсын быыбар иннинээҕи "буору нүөлсүтэрин" кэпсээтэ. Баартыйа салалтатын кириэ-хоруо тылынан аҕаата. "Москубаттан политтехнологтан кэлэн үлэлээн бидилитэ" сылдьалларын аҕынна. Былаас кандидаттарын өйөөн бюджет харчыта баранан эрэрин быктарда. "Ньыгыллар" киһилэрин өйөөбөккө буолан, нэһилиэнньэтин кытары "үлэлэспэтэх" баһылыктары былаастан туораталыыр үлэ барарын санатта. Ол, арааһа, "ЭЭБИРИСТЭП киһитэ" диэн ааттанар Кэбээйи улууһун баһылыга ТЕРЕХОВ астаапкаҕа барбытын хаарыйыы быһыылаах.  
Ылдьыыс аһара түһэн "ньыгыллар" баһылыктарын Миитэрэй КУЛУСКУОНУ дуоһунаһыттан ууратарга уонна "дьиҥнээх лиидэри таларга" этии киллэрдэ. Баартыйабыттан аны батынабын диэтэ уонна атын "ньыгыллары" эмиэ "ньыгылтан" аккаастанарга ыҥырда.
***
Мэхээлэ Ылдьыыс хаһан эрэ бэйэтэ бу баартыйа атаҕар турарыгар сүүрэн-көтөн тэрийсибит өҥөтүн наар ахтар буолара. Кини баартыйаттан тахсар айдаанын оппозиция бэлиитиктэрэ үөрэ-көтө иһиттилэр, арай, коммунистар салайааччылара Виктор ГУБАРЕВ "ЭЭБИРИСТЭП баартыйа салалтатыттан туораабытыттан кыһыйар" диэтэ, оттон "ньыгыллар" бэйэлэрэ сөрү диэн сөҕөн баран сөтөллөн кэбиспиттэр. 
***
Аартык.ру