Эдьигээнтэн сылдьар Зоя Тимофеевна АПОЛЛОНОВА - табаһыт ааттааҕа 5 км сүүрдүүгэ кимиэхэ да иннин биэрбэккэ биэтэккэ бастакынан кэллэ. Ол үөрүүтүгэр  «Сахатранснефтегаз» хампаанньа Аполлоновтар дьиэ  кэргэттэригэр, табаһыкка саамай наадалаах аныгы көлөнү - "Бураны" бэлэхтээтэ.
"Буран" ылар сертификаты хампаанньа аатыттан генеральнай дириэктэр солбуйааччыта, Ил Түмэн депутата Валерий ИВАНОВ туттарда.
Зоя Тимофеевна табаларын олус таптыырын, харыстыырын,  истиҥник сыһыаннастахха саамай эрэллээх доҕор буолалларын туһунан этэр. "Ханнык да ыарахан кэмҥэр табалар түҥнэри хайыһыа суохтара" диир. АПОЛЛОНОВТАР дьиэ кэргэттэр таба сүүрдүүтүгэр өрүү кытталлар эбит. Ол гынан баран ыал ийэтэ Дьокуускайга аан бастаан күрэхтэһиигэ кыттыбыт. "Былырыын Эдьигээҥҥэ ыытыллыбыт таба күрэҕэр эмиэ "Буран" ылбыппыт", - диэн Зоя Тимофеевна кэпсиир.
Аныгы табаһыт олоҕо-дьаһаҕа ыараханын туһунан биһиги корреспондеммытыгар  хоту улуус олохтоохторо кэпсииллэр.
- Мин удьуор табаһыппын. Таба - биһиги норуоппут төрүт дьарыга. Ол иһин табаны иитии - сүттэҕинэ, биһиги норуот быһыытынан эмиэ симэлийэбит. Ону өйдөөн туран, төрүт дьарыкпытын  көлүөнэттэн көлүөнэҕэ биэрэ сатыыбыт. Ол уустук. Бүгүҥҥү табаһыт хамнаһа - 5000 солкуобай, ити өссө табаҥ ахсааныттан тутулуктаах. Холобур биһиги ыал түөрт оҕолоохпут, икки сиэннээхпит. 300 табалаахпыт. Соҕотох кыыспыт устудьуон. Омскайдааҕы авиационнай колледжка үөрэнэр. Уолаттарбыт хаһаайыстыбаҕа көмөлөһөллөр. Биллэн турар, харчы наада, ол иһин атын үлэҕэ эмиэ харчылаһа сатыыллар.  Иккилии-үстүү ыйга Эдьигээҥҥэ киирдэхпитинэ квартира куортамнаһабыт. Икки хостоох квартира иһин ыйга 8 тыһ. төлүөххэ наада. Эбэҥки ыччата ол иһин табаҕа сыстыан баҕарбат. Харчыта суох буоллаҕа, - Зоя Тимофеевна хомойор.
- Бөрө мэнээктээбит диэн баара, хайдаҕый?
- Быйыл 50 табабытын бөрө тарта. Сатанарынан бултуу сатыыбыт.
- Дьокуускайга табаҕытын тугунан аҕаллыгыт?
- Биһиги общинабыт Эдьигээнтэн 300 км тэйиччи олорор. Онтон "Урал" массыынанан Дьокуускайга диэри үс хонук айана. Сарсын дьиэбитигэр аттаныахпыт. Хата, кураанах илиилээх барбатыбыт! Үөрүүбүт улахан! - диэн хоһуун табаһыт үөрэр. 
 
*** 
Бэҕэһээ, кулун тутар 18 күнүгэр, Республика табаһыттарын слета түмүктэннэ. Бу улахан тэрээһин аатырбыт табаһыт, Социалистическай үлэ дьоруойа И.К.Спиридонов 100 сааһын туоларыгар анаммыта.
***
Сардаана БАРАБАНОВА,
Аартык.ру