Забайкалье саҥа салайааччытын быһаарыытын сорох олохтоох блогердар: "Закончилось татарское иго, началось якутское..." диэн сыаналаабыттар (http://zabinfo.ru/99600).  Биллэн турар, "варягтарга" сыһыан ханна баҕарар тыҥааһыннаах буолар.
Биир дойдулаахпыт Федор ЛУКОВЦЕВ урут "Эрэл" государственнайа суох пенсионнай фонда толорооччу дириэктэринэн үлэлээбитэ (1995-2006 сс.). Билигин фондаҕа -  Попечителлэр сүбэлэрин председателэ.
ЛУКОВЦЕВ 1990 сс.  "СПС" партия чилиэнэ этэ. Онтон икки сыллааҕыта олигарх Михаил ПРОХОРОВ "Кырдьыктаах дьыала" партиятыгар киирэн иһэн, ПРОХОРОВ туоратыллыбытыгар эмиэ партияттан тахсыбыта.
Федор Юрьевич иллэрээ сыллаахха Константин ИЛЬКОВСКАЙ Госдумаҕа депутатынан талыллар быыбарыгар дьаныардаахтык үлэлэспитэ биллэр. Оччолорго кини Сибиир уонна Уһук Илин Государственнайа суох пенсионнай фондаларын ассоциациятын президенинэн бэлиэр  талыллыбыт кэмэ этэ. ЛУКОВЦЕВ Госдума быыбарыгар агитациялыыр бэлэм ситимнээх буолан, ИЛЬКОВСКАЙГА улаханнык көмөлөспүтэ диэн этэллэр. Онон ИЛЬКОВСКАЙ махтала дуоһунаһынан эргийэн кэлбит диэн сыаналыахха сөп.
***
Федор Юрьевич ЛУКОВЦЕВ 1968 сыллаахха Дьокуускайга төрөөбүт. ИЛЬКОВСКАЙГА үлэлии баран эрэр Алексей ШЕМЕТОВ курдук, эмиэ балаҕан ыйыгар (19 күнэ) төрөөбүт күннээх - 17 чыыһыла. Кэргэннээх, үс оҕолоох.
***
Саха сиригэр төрөөбүт-үөскээбит, үлэлээбит-хамсаабыт каадырдар атын региоҥҥа үрдүк дуоһунаска бараллара үчүгэй бөҕө буоллаҕа. Ол гынан баран,  Илья МИХАЛЬЧУК  Архангельскай уобаласка губернатордыы барарыгар эмиэ хас да киһини сырыһыннаран барбыта. МИХАЛЬЧУК даҕаны, ИЛЬКОВСКАЙ даҕаны Саха сириттэн В.ШТЫРОВЫ кытары сатаспатахтарыттан сылтаан барбыттара. Губернатор дуоһунаһыгар В.Путин ыйааҕынан  анаммыта, ананна. 
МИХАЛЬЧУК хамаандатыгар үлэлии Дьокуускайтан Сергей МОЛЧАНСКАЙ, Валерий ПОПОВ, Александр ДЪЯЧКОВСКАЙ,  Андрей МАКСИМОВ, Ирина КОНДРАШОВА, Борис БУБЯКИН,  Екатерина НИКИТИНА барсыбыттара.
Илья Филиппович Архангельскайга "Якут-зы! Вон из области!" дэниэр диэри үлэлээбитэ. Кинини кытары барсыбыт дьон улаханнык өнүйбэтэхтэрэ, сорох-сорохторугар холуобунай дьыала кытта тэриллибитэ.
ИЛЬКОВСКАЙ хамаандатыгар киирбит уонна киириэхтээх дьоммут, МИХАЛЬЧУК каадырдарын кэбин кэппэттэрэ буоллар ханнык.
***
Быһаарыы: Забайкальскай кыраай РФ саамай эдэр субъега. Агинскай Бурятскай АУо уонна Чита уобалаһа холбоһон биэс сыллааҕыта Забайкальскай кыраай буолбуттара. 1 мөл. 107 тыһ. киһи олорор, үксэ нууччалар - 90 бырыһыан, бүрээттэр - 6 бырыһыан, уонна атын омуктар. Кыраайы ИЛЬКОВСКАЙ иннинэ татарин Равиль ГЕНИАТУЛИН салайбыта, быйыл салайар болдьоҕо бүппүтэ. Ол иһин блогердар "татарское иго" диэн ГЕНИАТУЛИН салайбыт кэмин ааттыыллар. 
*** 
Аартык.ру