Ааспыт ый саҕаланарыгар Аартык.ру Ил Түмэн депутатыттан - Алексей ШЕМЕТОВТАН  күһүҥҥү быыбарга киирсэр санаалааҕын, суоҕун сураһан төлөппүөннүү сылдьыбыта. Алексей Иннокентьевич "Якутскэнерго" АК салаа тэрилтэтин Энергосбыты салайан олорон, хайаан да быыбарга кыттар уонна кыайар санаалааҕын эппитэ.
Инникини тымтыктанан көрбүт суох. "Якутскэнерго" урукку генеральнай дириэктэрэ Константин ИЛЬКОВСКАЙ, олунньу 28 күнүгэр, дойду президенин ыйааҕынан  Забайкальскай кыраай губернаторын эбээһинэһин толорооччунан анаммыта. ИЛЬКОВСКАЙ губернаторга ананан эрэринэн сибээстээн үлэлиир хамаандатын тэринэн эрэр. Саха сириттэн икки киһи киниэхэ үлэлии барда: Федор ЛУКОВЦЕВ уонна Алексей ШЕМЕТОВ.
ШЕМЕТОВ Ил Түмэҥҥэ 9-с №дээх Пригороднай биир мандааттаах уокуруктан талыллан депутаттыы сылдьар. Балаҕан ыйыгар 42-тин туолуохтаах, Ньурбаҕа төрөөбүтэ, омугунан нуучча. "Якутскэнерго" систиэмэтигэр 1993 сылтан үлэлиир, бастаан электромонтерунан саҕалаан баран солбуйар генеральнай дириэктэргэ тиийэ үүммүтэ. Карьератын "Якутскэнергоны" ИЛЬКОВСКАЙ салайан олордоҕуна оҥостубута. Онон урукку коллегата үлэҕэ ыҥырбытыгар ШЕМЕТОВ сөбүлэнэн чымыдаанын хомунан эрэр. 
***
Ольга ФЕДОРОВА эмиэ "Якутскэенрго" АК солбуйар генеральнай дириэктэринэн үлэлии сылдьыбыта. Ааспыт Ил Түмэн сессиятыгар президент кини кандидатуратын СР Экономика сайдыытыгар уонна промышленнай политика миниистирин дуоһунаһыгар туруорбута. Депутаттар ФЕДОРОВА тустаах салааҕа миниистиринэн ананарын бары биһирээбиттэрэ.
Ол быыһыгар коммунистар депутат коллегаларын Олег ТАРАСОВЫ ("Якутскэнерго" АК генеральнай дириэктэрэ) "олохтоох каадыры туоратар" диэн улаханнык кэриэтээбиттэрэ.  
Санатар эбит буоллахха,  ИЛЬКОВСКАЙ кэнниттэн хампааннььа салалтатыгар кэлбит - Олег ТАРАСОВ Ольга Николаевнаны үлэтин дуогабарын уһаппакка уураппыта.   
***
Ольга ФЕДОРОВА кэнниттэн республика ситэриилээх былааһыгар Георгий БАЛАКШИН үлэлии баран эрэр диэн "В Якутии.ру" суруйар. БАЛАКШИН Ыччат министиэристибэтиттэн араарыллыбыт Спорт министиэристибэтигэр үлэлии баран эрэр. Кинини миниистир Дмитрий ГУЛЯЕВ солбуйааччытынан үлэлэтэр былааннаахтар.
Кэнники сылларга биллэр спортсменнартан ситэриилээх былааска улахан дуоһунаска Николай КОЛОДКО кэнниттэн боксер Георгий БАЛАКШИН кэллэ. Георгий Русланович 1980 сыллаахха Антоновка сэлиэнньэтигэр төрөөбүтэ. Эдэр политик боксаҕа Европа хас да төгүллээх чемпиона, Пекиннээҕи Олимпиада иккис миэстэлээх призера. Билиҥҥи статуһунан - Ил Түмэн РФ Федеральнай мунньаҕар бэрэстэбиитэлэ.
Бу үс дьон аны биэс хонугунан буолуохтаах Ил Түмэн сессиятыгар депутаттыыр боломуочуйалара тохтуур.
ФЕДОРОВА партията суох да буоллар "СР" фракциятын салайбыта, праламеҥҥа "эсердэр" испииһэктэринэн киирбитэ. Ольга Николаевна оннугар  "сиэрдээхтэр" тута атын киһини Ил Түмэҥҥэ киллэрбиттэрэ. Ол - Нерюнгри куорат өрөмүөннүүр собуотун дириэктэрэ Роман Анатольевич ЛИТВИНЦЕВ. Бу киһини Федот ТУМУСОВ олунньу 26 күнүгэр ыыппыт пресс-конференциятыгар суруналыыстарга сыыттаан турар. ЛИТВИНЦЕВ 60-ча үлэһиттээх собуот хаһаайынабын диэн Аартык.ру хаһыакка этэн турар.
Оттон Георгий БАЛАКШИН "ньыгыллар" испииһэктэринэн Ил Түмэҥҥэ ааспыта. Кини мандаатын "ньыгыллар" кимиэхэ биэрэллэрэ билиҥҥитэ биллибэт. 
Алексей ШЕМЕТОВ биир мандааттаах уокуруктан Ил Түмэҥҥэ талыллыбата, онон мандаата "нэһилиэстибэнэн" бэриллибэт, быыбарынан эрэ быһаарыллар. 
Таарыччы аҕыннахха, Константин ИЛЬКОВСКАЙ Кэбээйи-Дьааҥы уоукругуттан Ил Түмэҥҥэ депутат этэ. Кини иллэрээ сыллаахха Бурятияттан Госдума депутатынан талыллан барыаҕыттан ылата, кэбээйилэр уонна дьааҥылар биир мандааттаах уокуруктарыттан  депутата суох олордулар. 
***
Аартык.ру