Аартык.ру корреспондена Родион ФЕДОРОВЫ кытары кэпсэтэ сырытта. Онно кини кэпсээбитинэн,  олунньу 20  күнүгэр, СР Үрдүкү суута Мэҥэ Хаҥалас улууһун суута таһаарбыт уурааҕын көтүрбүт. Үрдүкү суут быһаарыыта 10 хонук иһинэн оҥоһуллан, силигэ ситэн туттарыллыахтаах, ол эрэ кэнниттэн информация сайтка бэчээттэнэр.
- Родион Иннокентьевич, улуус суутугар тугу үҥсүбүккүтүй?
- Билэргит курдук, былырыын алтынньыга Аллараа Бэстээх бөһүөлэгин баһылыгын быыбарыгар кыттыбытым. Быыбар сокуон кэһиилээх барбытын туһунан мин кэтээн көрөр дьонум биллэрбиттэрэ. Ол курдук, букатын көспүт, бөһүөлэккэ олорбот дьон аатынан куоластааһын диэн,  хаһаайыттар билбэттэринэн кинилэр дьиэлэригэр туора дьону регистрациялаан баран  куоластаппыттара диэн, быыбардыыр учаастакка кэргэнниилэр үлэлээбиттэрэ диэн... хара баһаам этэ. Быыбар түмүктэммитин кэннэ быыбардааччы ахсаанын учуоттуур кинигэни көрдөрүҥ диэн ТИКтан көрдөспүппүт. Ону биэрбэтэхтэрэ. Мин ону суукка үҥсүбүтүм. Улуус суута үҥсүүбүн ылымматаҕа, "сөпкө көрдөрбөттөр" диэн быһаардаҕа. Улуус суутун быһаарыытын СР Үрдүкү суутугар ааһыммытым. Үрдүкү суут судьуйата Мэҥэ Хаҥалас улууһун суутун быһаарыытын олунньу 20 күнүгэр көтүрдэ уонна учуот кинигэтин биһиги көрөр бырааптаахпытын бигэргэттэ.
- Оччотугар  билигин Мэҥэҕэ тахсаҕыт уонна ол кинигэни ылан көрөҕүт уонна?
- Уонна куоластааһын атын дьон аатынан, суох дьон аатынан барбыт буоллаҕына...
- ...Быыбар түмүгэ автоматически дьиҥэ суоҕунан ааҕыллар...
- Оннук. Ол гынан баран билигин эрдэттэн кинигэни көрө иликпитинэ сабаҕалыыр, таайар бырааппыт суох. Барыта кэмигэр көстөн иһиэҕэ.
- Тоҕо сууттаһа сатыыгыный? Бэстээххэ баһылык буолуоххун олус баҕараҕын дуо?
- Мин прецедент оҥоруохпун баҕарабын. Мантан антах быыбардар да буолуо турдахтара. Онно маннык толоос ньыманан дьон куолаһын бутуйуу, санаатын утарыы, конституционнай быраабын кэһии тахсыбатын диэн санааттан сууттаһабын.
- Хайҕаллаах. Чэ, син биир быыбарга сокуону кэһии тахсыбыта буолуо диэн сэрэйэбин. Сууттаһыаҥ, кыайыаҥ... Онтон иккистээн быыбар ананнаҕына кыттаҕын?
- Көрөн иһиэхпит. Мин сыалым-соругум - Аллараа Бэстээх холобуругар быыбарга гражданин куоластыыр быраабын толоостук кэһии аныгыскыга тахсыа суохтаах диэн көрдөрөргө дьулуһабын. Оттон ханнык быыбарга мин кыттарым туһунан кэпсэтии - бэйэтин кэмигэр тахсыаҕа.
- Родион Иннокентьевич, ити утарылаһар дьоҥҥун - В.Птицыны, Н.Старостины кытары биир бииргэ атах тэпсэн олорон кэпсэппэккит дуо? Эйиэхэ тахса сылдьыбыттара дуу?
- Улуус быыбарын кэнниттэн суох.
***
Гаврил ПРОКОПЬЕВ,
Аартык.ру