Хайдах эрэ билэр баҕайы, ханна эрэ истибит куолаһым... Тохтоотум. Эргиллэн көрдүм. Сыаналаах күндү түүлээх саҥыйаҕын түүтүн кумалаан өттүк баттанан ытарҕата эйэҥэлии турар дьахтарга хараҕым кэтилиннэ. Но! Дьокуускай куорат улахан дьиэтин биир тутаах хотуна хоноччу туттан баран кыбдьырына турар эбит... Муҥутуур Москуба куоракка кэлэн кими ити айылаах күргүйдүүр эбитий диэн дьиктиргээтим. 
Хотун хардаҕаһы ыйыстыбыт курдук чоноччу туттан туран силбиэтэнэр:
- Хамнаан ис! Киһини буһаран өлөрөөрү гынна! Эчи, бытаанын эҥин! Эрэй да буолар эбит... - "муҥнаммыт" хотун үөһээ тыынан эппэҥэлиир.
Атах таҥаһа кэчигирээн турар долбууруттан саһархайдыҥы кугас өҥнөөх, хобулуктаах саппыкыны туппутунан биир дьахтар кэлэн хотун иннигэр сөһүргэстии түстэ. Салҕалас илиилэринэн саппыкы молниятын сыыйа тардан сүөрэн баран, күннэтэ үрдүк дуоһунаска үктэнэр чараас чулкулаах мааны  атах  иннигэр үҥүлүттэ. Ыксабылыгар буолан саппыкытын иһиттэн хордуонун хостооботох быһыылаах, хотун атаҕын уган иһэн кытаанахха кэтилиннэ, айакалаата-ойоколоото уонна атаҕынан силэйэн саппыкыны киэр элиттэ.
- Оо, алҕас, алҕас... билигин - дьахтар киэр элитиллибит саппыкыны төттөрү аҕалла, титирэс  илиитинэн  хортуонун хостоото.
Дьахтар чачаххай баттаҕа көлөһүнүттэн илийэн сүүһүгэр, чанчыгар ибили сыстыбыт. Сэрэйдэххэ, хотуҥҥа элбэх саппыкыны төттөрү-таары таспыт быһыылаах... Хаһан ылыллыбыта умна быһыытыйбыт саҥыйаҕын тэллэҕин сиргэ сөһүргэстииригэр хомуна да сатаабат. Хайдах эмэ гынан хотунун санаатын таптарбын ханнык диэн баҕарара көстөр.
Бу айылааҕы көрбүччэ тумнан ааһа барыахпын саараатым, бутик иһигэр киирэн хотуҥҥа уун-утары тиийдим.
- Хайыа, ... ...на дорообо, - аргыый сыыйабын.
Хотун миигин эрэ манна көрүөм дии санаабатах барахсан, бастаан, чочумча дөйүөрэн турда, онтон сибилигин аҕай муунньары тардыллан турбут сирэйэ тэнийдэ. Мичик гыммыта буолла. Хардарда. Симитиннэ. Атаҕынан дьахтар илиитин киэр хаһыйа сатаата. Анарааҥҥыта буһуу-хатыы буолан олорон кэлэр-барар киһини көрөр да кыаҕа суох, хотунун атаҕын "бултаһарын" тохтоппот. Мин да, хотун да аллараа тиритэ-хорута олорор дьахтары көрбөппүт үһү.
Кэмниэ-кэнэҕэс дьахтар саппыкыны кэтэртэ быһыылаах, молниятын үөһэ тардар тыаһа иһилиннэ.  
***
Сотору соҕус буолан баран ол саппыкы кэтэрдибит дьахтар додо курдук дуоһунаска анаммытын иһиттим.
***
Хас биирдии киһи ыралаах, баҕалаах, сыаллаах-соруктаах. Ол гынан баран, ону ситиһэр суол дьон дьоҥҥо араас буолар.
***
Аартык.ру