***

“Баҕарбыкка баҕа да баҕалаах”диэбиккэ дылы, былаас туһугар төлө мөхсө сылдьааччылар, быыл да саҕаны сыыска-буорга түһэрбэккэ хабан ылан үлүннэрэн үрдүк суукка үҥсээри өрүсүһэн барбыттар. “Тыл ыытта, ыыстаата, суоҕунан уоруйахтаата”, - диэн, Тумууһап обургу уолугунан тыынан, эҕэ-дьаҕа тыллардаах ытыс саҕа ыстатыйаны эрийэ түһээт тиэтэллик, дойду муҥур кэмитиэтигэр кэдэрийэ-кэдэйэ тэбинэн тиийээт, өрөспүүбүлүкэ бэрисидьиэнин бэгэччэгиттэн харбатаары, уруккутун аахсаары сайабылыанньа суруйбут: “Бэдэрээлинэй таһымнаах бэриэт сылдьар эрэти, ханнык эрэ субуйуок баһылыга Барыыһап үөспүн-ааппын субуйаары туруммутун боччуйуҥ, суукка-саакка туруоруҥ!”

Москубалар уолуйбуттар: “Дуума курдук толкуйдаах дьоһун дьону дьокутааты хайалара хараардарый?!” Силиэстийэ кэмитиэтэ суһал-тиэтэл быһаарыынан, сайабылыанньаны көрөргө  дьаһал ылан бараннар, Саха сирин кэмитиэтигэр тэлигирээммэ охсубуттар, сорудах биэрэр сололоммуттар.

Күлүгээни тутуохтаах, уоруйаҕы уорбалыахтаах, өлөрүөхсүтү өһүөхтээх Силиэстийэ уоргана, быыбар иннинээҕи сахсаан сахсырҕатын ылҕаан күнүн-дьылын бараабыт, хаарыан кэмин сүтэрбит. Сатахха, бары даҕаны тустаах туоһу буолааччылар сүгүн-саҕын эппэккэ, иэмин-дьаамын биэрбэккэ эрэйдээбит эбиттэр. “Уол буоллаҕына кыыс, кыыс буолбатаҕына уол” диэбит курдук киэлилээх, мунаах соҕус бутуурдаах хоруйдары  тутаннар уоргаттары сордообуттар.

***

Икки улахан дьоннорбут, хайалара даҕаны кирси кэрбэһэн бүппэттэрэ, эйэ-дэмнээх сүбэни ылсан-бэрсэн испэттэрэ барыбытын даҕаны сорго-муҥҥа тэбэрин хаһан өйдүүр үөлээннээхтэрий?! Өс-саас ситиспэккэ, бэлиитикэнэн оонньообокко норуоттарын туһугар өркөн өйдөрүн, сүҥкэн кыахтарын түмэн, или-эйэни туругурдан үлэлээбэтэхтэрин баҕаһын... Хайалара даҕаны норуотугар ытыктанар инникигэ сирдиэхтээх ТЫМТЫК уота кэриэтэ баардаах-банаардаах  дьоммут буоллахтара эбэтээ!

***

***