Улахан ыһыахтары төрүт көрүҥэр түһэрэр кыаллыбат даҕаны. Ол гынан баран, Чурапчыга ыһыллыбыт Олонхо ыһыаҕар дьон ыһыахха сыһыана уларыйан эрэрэ көһүннэ. Алгыс кэмигэр атын сиргэ тыас-уус, муусука тохтоон, туох баар киһи болҕомтото барыта Алгыс ыытыллар сиэригэр-туомугар хатанна. Бу олус үчүгэй бит. Үс Хатыҥ ыһыаҕар да буоллун, атын ыһыахтарга да буоллун, тэрийээччилэр эмиэ Алгыс оҥоһуллар кэмигэр атын аралдьытар тыаһы-ууһу тохтотуохтарын сөбө. Биллэн турар, араас дьону, араас омугу күүскүнэн күһэйэн туохха эрэ, кимҥэ эрэ итэҕэтэр кыаллыбат, ол гынан баран баран бастаан бобон, хааччахтаан даҕаны  Алгыска ытыктабыллаах сыһыаны олохтуохха сөбө буолуо. Хас биирдии итэҕэл курдук, биһиги итэҕэлбит муҥутуур көстөр дьайыыта эмиэ убаастаныахтаах. Онтон дьон кэлин бэйэтэ да сыыйа үөрэнэн, Алгыска боччумнаахтык сыһыаннаһыах этэ. Уустук, киһи эт өйүнэн быһааран  биэрбэт кэмэ. Сир планетатын иччилээбит икки атахтаахха ханнык эрэ чааһа илиһиннэ, эт-хаан сылайыыта буолбатах, ордук эмоциональнай турук салҕан эрэр. Бу сир энергиятыгар эмиэ дьайар. Бүтүн киһи-аймах санаата, өйүн, дууһатын туруга  - планета саныыр санаата, өйө-туруга буолар. Күннээҕи түбүккэ тугу эрэ күннэтэ сүтэрэн эрэбит. Бүтүн киһи-аймах туругун син биир тута уларытар кыаллыбат, онон хас биирдии киһи бэйэтин өйүн-санаатын, духуобунаһын, этин-сиинин сааһыланан, дьаһанан олоруох тустаах. Онно ыһыах Алгыһа тирэх, күүс буолуох этэ. 
***
Аартык.ру