Манна улуустар бэрэстэбиитэллэрэ, араас тэрилтэлэр түһүлгэ тэринэн дьону кытары алтыһан, Айыыларга сүгүрүйэн алгыс ылар кэмнэрэ. Саха төрүт үгэһин, итэҕэлин кэрэһитэ – Ыһыах – аныгы кэмҥэ диэри улаханнык ис тутула, ис хоһооно уларыйбакка тиийэн кэлбитэ, биһиги сахалар кэм-кэрдии ыгыытын тулуйарбытын, ис турукпутун дьалкытан кэбиспэккэ тута сылдьар  кыахтаахпытын туоһулуур. Ис туруга бөҕө норуот инникитэ кэскиллээх, сайдар кыахтаах, күн сиригэр бэйэтин миэстэтин буларыгар эрэл улахан. Аан дойду уларыйыытыгар баранан хаалбакка, аныгы сайдыыга тэҥҥэ хаамсан иһиэхтээхпит. Онно дьону бэлэмнииргэ, өйү-санааны уларытарга – нэһилиэк, улуус баһылыктара улахан эппиэтинэмтээхтэр. Саҥа саҕалааһыннары өйүөхтээхпит, үлэлиэн баҕарар дьоҥҥо усулуобуйа тэрийэн, дьиэни-уоту үксэтэн, суолу-ииһи, сибээһи тупсаран – саха норуота дьиҥнээхтик өйдүүн-санаалыын, олохтуун-дьаһахтыын аныгы кэмҥэ хаалсыбатын курдук үлэни салгыы ыытан иһиэхтээхпит.

Ыһыах курдук норуоту түмэр, сомоҕолуур тэрээһин  үйэлэртэн үйэлэргэ суолтата уларыйбатын! Уруй буоллун Сахабыт сирин бары олохтоохторугар! 
***
Аартык.ру