Быйыл, 2015 сылга, ураты дьикти суолталаах Ытык Ыһыаҕы ыһабыт – Улуу Кыайыы 70 сылын бэлиэтиир ыһыахха Саха омук Ытык Оһуокайын Аар Дархана Сергей Зверев – Кыыл Уола 115 сааһыгар Туймаада хочотугар сүүнэ күрэх тэрийэбит.

Биһиги, Саха Сирин Оһуокай Түмсүүтэ, бэлиэтиибит – саха омук бу түргэн тэтимнээх XXI үйэҕэ  атын омуктартан итэҕэһэ суох сайда сылдьарын, научнай уонна техническай араас саҥа ньымалары төрүт ийэ өйбүтүнэн тобулан-баһылаан, аан дойду сайдыытыгар тэҥҥэ кыттыһарын. Ол быыһыыгар,  былыргы үгэстэри кытары быстыбат ситим баар буолан, Ыһыах, Оһуокай, Олоҥхо, Тойук, Хомус саҥа үйэҕэ иккис тыыннарын ыланнар, эмиэ аан дойду таһымыгар биллэн эрэллэр.

Үрүҥ Тунах кэмэ кэлбитинэн, эһиэхэ, бар дьоммор сырдык, ыраас кэскиллээх кэхтибэт санаалары, тулхадыйбат отуордаах иллээх-эйэлээх,  баай-тот олоҕу, умуллубат уонна умнуллубат тэтимнээх кыайыылары-хотуулары, саҥаттан-саҥа   ситиһиилэри баҕарабын!

Туймаада хочотун мааны Ыһыаҕар кэлэн, саха омук кылыһахтаах ырыатын-тойугун, оһуор-бичик тыллаах, оҥкуллаах-отуордаах Ытык Оһуокайын түһүлгэтигэр кэлэн сылдьыҥ, кыттыҥ-сынньаныҥ !

Уйгуну-быйаҥы түстүүр, кэскили, кэрэни үксэтэр анал күммүтүгэр -  сахам мааны дьонугар Үрдүк мэҥэ халлааҥҥа олохтоох аҕыс ахтар Айыыһыттарбыт, сэттэ иэйэр Иэйиэхситтэрбит алгыстара  арчылыы, араҥаччылыы турдун диэн Саха Сирин Оһуокай Түмсүүтүн аатыттан аман өспүн тиэрдэбин! ДОМ!
***
Аартык.ру