Опера уонна балет театрын айдаана, Циркэ дириэктэрин түөрэҥнэтии, Эстрадабыт театрын кулукутун тоҕо тэбээһин... элбэх.

“Туймаада” хаһыат ааспыт нэдиэлэтээҕи нүөмэригэр саха киэн туттар ырыаһыта, ытыктыыр киһитэ Аркадий Михайлович АЛЕКСЕЕВ “Сиэйэ Уолу буруйа суох!” диэн интервьюта тахсыбыт. Интервью икки чаастан турар, балайда уһун кэпсэтиини суруналыыс Венера ПОПОВА сурукка тиспит.

Аркадий Михайлович олус көнө, судургу киһи, баары баарынан “сөп” да, “сөтөгөй” да дии санаабытын малтаччы этэр майгылаах. Онон  кини тыла-өһө үгүс киһини өһүргэппит да, өрүкүнэппит да буолуохтаах.

Ырыаһыт Сиэйэ Уолун кини ис сүрэҕиттэн көмүскүүрүн эрдэттэн этэр. Онон итиннэ тохтуу барбаппыт. Арай, интервью иккис чааһыгар Эстрада театрын дириэктэрэ 65 саастаах Василий Васильевич ФИЛИППОВ, бэйэтинээҕэр төһө эмэ эдэр киһини Аскалон ПАВЛОВЫ пенсияҕа ыыта сатыырын, Лэгэнтэй, Ника ааспыт быыбарга  Эрнст Березкини өйөөн карьералара моһуоктаммытын кэпсиир.  Бу, 65 саастаах кырдьаҕас дириэктэр, өссө аһара баран артыыстарын, үлэһиттэрин сутуруктуур идэлээх эбит. “Ырыаһыттары хамнастарын суотугар  “Чароит” рестораҥҥа булгуччу ыллыылларын ирдиир, аһыы-сии олорор, итирик-кутурук дьон ортотугар артыыс иитиллиэ суохтаах”, - диэн Аркадий Михайлович этэр. Ресторан таһымыгар сылдьыбыт артыыс, кырдьык,  туохха үөрэниэй?! Сөпкө этэр.

Эстрада театрын артыыстара хамнастара мөлтөҕө, дьиэлэрэ-уоттара хаарбаҕа, олорор хосторо кырыымчыга урут-уруккуттан биллэрэ. Ол гынан баран, 24 сылы быһа онно биир да култуура чунуобунньуга хараҕын хатаабатаҕа. Артыыстары саататар, аралдьытар оруолга тута сылдьаллара биллэр суол. Үбүлүөйүнэн, сыбаайбаларынан, кэлбит-барбыт ыалдьыттарга саататар оонньуур оҥостоллор. Тойону-хотуну кытары бодорустахха эрэ уһуулларын артыыстарын билэллэр, онно сөпсөспөтөхтөрүнэ бүттэ - карьера сабыллар, ордук саҥа саҕалаан эрэр дьоҥҥо кутталлаах. Ааттаах-суоллаах артыыстар син кэнсиэрдээн аһара да байбатар, айахтарын ииттинэр кыахтаахтар. Оттон эдэрдэр?

Быһайын, алҕас куорат таһыгар ыраахтан кэлбит дьону аһаталларыгар-сиэтэллэригэр түбэһэн хаалбыттаахпыт. Ыллыахтаах, “экзотиканы көрдөрүөхтээх” эдэр баҕайы кыыс-уол  уохтаах утаҕы көрдөөн ылан, репетицияланар хосторугар хантата тураллара. Тоҕо? Хорсуннарын киллэрээри, итирик дьон дьаарын тулуйаары.

...Култуура үлэһиттэрэ саҥа миниистиртэн эрэйэллэрэ, кэтэһэллэрэ элбэх. Ол гынан баран, артыыстар үөрэнэн хаалбычча Ил Дархаҥҥа сурук суруйа тураллар. Кыһалҕалаах дьон бары Путиҥҥа үҥсэллэрин курдук, быһаардаҕына кини эрэ быһаарыа диэн саха дьоно Борисовка суруйаллар.  Дойду да, республика да үрдүнэн кыһалҕа элбэх. Хас биирдии тэрилтэ дириэктэрин ууратарга Ил Дархан эрэ ороостоҕуна сатанар буоллаҕына – дьыала дьыала буолбат. Аны, биир киһини уларыттахха нэгирбит систиэмэ уларыйан кэлбэт. Култуура эйгэтин уларытарга систиэмэлээх, кэлимсэ уларытыы киллэриэххэ наада.  Владимир ТИХОНОВ ону кыайыа дуо? Кини саҕалыыр да буоллаҕына, ол саҕалааһынын олоххо киллэрэригэр хамаандалаах дуо? Министиэристибэ урукку састаабыттан биир да чунуобунньук уларытылла илик диэн истэбит. ТИХОНОВ  24 сылы быһа мунньуллубут култуура эйгэтин хоҕун-хоһоҕотун  соҕотоҕун “маврдыыра” кыаллыбат да, сатаммат даҕаны. Андрей БОРИСОВ билигин да чыына-хаана үрдүк, кини олордуталаабыт  тойоно-хотуна билигин да култуура систиэмэтин бары тутан (ыһан?) олороллор.

***

Аартык.ру