Дойду 38 регионуттан кинигэ бэчээттиир кыһалар Москваҕа кулун тутар 26-30 күннэригэр Бүтүн Россиятааҕы быыстапкалыыр кииҥҥэ «Книги России» быыстапка-дьаарбаҥкаҕа мустан, араас омук тылынан 100 000 тахса кинигэни дьон дьүүлүгэр таһаардылар. Регионнар кыһаларыттан «Бичик» бастакынан бэйэтин үлэтин туһунан билиһиннэрэр, кинигэлэрин сүрэхтиир чиэскэ тигистэ. СР Бэчээккэ уонна телерадиовещаниеҕа департаменын салайааччыта Филипп Пестряков, кыһа дириэктэрэ Август Егоров уонна СР Суруйааччыларын сойууһун бэрэссэдээтэлэ Иван Мигалкин Сахабыт сирин бэчээтин бүгүҥҥү туругун, саҥа таһаарыылар туһунан кэпсээтилэр.
Бу быыстапкаҕа Крым кинигэ бэчээттиир кыһалара анал ыалдьыт быһыытынан, болҕомто ортотугар сырыттылар. Сергий Радонежскай 700 сылыгар, Россияҕа бастакы кинигэ бэчээттэнэн тахсыбыта 450 сылыгар, улуу суруйааччылар Михаил Лермонтов, Тарас Шевченко 200 сылларыгар үбүлүөйдээх тэрээһиннэр ыытылыннылар. Быйыл Культура сылыгар Россия нэһилиэнньэтин кинигэни ааҕарга сыһыарарга, дьон өйүгэр-санаатыгар духуобунай баайы иҥэрэргэ дойду баһылыга Владимир Путин тус бэйэтэ сорудахтаан турар.
Быыстапкаҕа кэлбит дьон «Любимые сказки народов России» дьэрэкээн ойуута кими баҕарар үөрдэр гына чаҕылхайын, сиэдэрэйин, мандарын, омуктар таҥастарын, майгыларын худуоһунньук Екатерина Садовникова, Анна Сивцева ааҕааччыга табатык тиэрдибиттэрин бэлиэтээтилэр. АСКИ (Кинигэ таһаарааччылар түмсүүлэрин) президенэ Константин Чеченев, вице-президенэ Олег Филимонов, Москватааҕы Бэчээт университетын профессора Борис Ленскэй, Национальнай республикалар бэрэстэбиитэллэрэ ити бырайыагы үрдүктүк сыаналаатылар. Татаардар, башкирдар, чуваштар, удмуртар о.д.а. остуоруйа кинигэтин ылан, бэйэлэрин дойдуларыгар атыылыах, тарҕатыах буоллулар.
«Библио-Глобус» диэн Москваҕа уонна Уралга саамай улахан розничнай маҕаһыыннардаах тэрилтэ «Бичик» таһаарар кинигэлэрин сэргэ «Хаамыска, хабылык, тырыыҥка» бырайыагын бэркэ сэҥээрдэ. Билигин аан дойду үрдүнэн айылҕа ыраас матырыйаалыттан оҥоһуллубут эко-этно оонньуурга дьон интэриэһэ улахан диэн менеджер Наталья Озерова эттэ. 3000 кв.м киэҥ-куоҥ маҕаһыыҥҥа киирэн, аныгы сенсорнай экраҥҥа ааптар, кинигэ, кыһа аатын баттаан, туохха наадыйбыккын чопчу булан ылар эбиккин. Маннык улахан маҕаһыыннаах, киэҥ розничнай ситимнээх тэрилтэ «Бичик» кинигэлэрин атыылыырга сөбүлэһэрин биллэрдэ. «Библио-Глобус» тэрилтэттэн Наталья Озерова уонна Россиятааҕы государственнай библиотекаттан Тамара Лаптева сахалар биһиэхэ кэлэн, бэйэҕит национальнай таҥаскытын, ырыаҕытын-тойуккутун көрдөрүҥ, кинигэлэргитин ааҕааччыларбытыгар кэпсээҥ диэн ыҥырдылар. Культура сылыгар бэйэ норуотун уратытын, төрүт үгэстэрин, духуобунай уонна литературнай баайын дойду тэбэр сүрэҕэр билиһиннэрэр тоҕоостоох түгэн көстүбүтүн Республика салалтата өйөөтөҕүнэ ити кыаллыан сөп.
«Биһиги Россия ааҕааччытын киэҥ араҥатыгар анаммыт кинигэлэри таһаарарга болҕомтобутун уурабыт. Аҥаардас краеведческай, этнографическай кинигэлэринэн дойду маассабай ааҕааччытын интэриэһиргэппэккин. «Любимые сказки народов России» дойду үрдүнэн кинигэ таһаарааччылар саамай улахан быыстапкаларыгар биир идэлээхтэрбит биһирэбиллэрин ылан, араас регионнарынан тарҕаныа. Инникитин саҥа бырайыактары олоххо киллэрэн, ыырбыт өссө кэҥээн иһиэ диэн эрэллээхпит. Мантан салгыы «Бичик» кинигэлэрин Москваҕа, ону тэҥэ национальнай республикаларга көрөр-ааҕар, атыылаһар кыахтаныахтара. Онон, улахан ситиһии үрдүк чыпчаалыгар, Россия киэҥ ырыынагар тахсарга бастакы үктэли дабайан кэллибит!», -- диэн ааҕааччылары кытта кыһа дириэктэрэ Август Васильевич үөрүүтүн үллэһиннэ.
***
Марианна Тыртыкова