Санатар эбит буоллахха, Айаал Семенович БУРЦЕВ Дьокуускай куорат Думатыгар 13№-дээх Курашовскай уокуруктан депутат, Дума президиумун чилиэнэ уонна Бюджет-экономика политикатын, Промышленность, предпринимательство, эргиэн, транспорт уонна сибээс хамыыһыйаларын чилиэнэ, Бюджеты таҥарга үлэлиир хамыыһыйа чилиэнэ.
Айаал БУРЦЕВТАН "Аартык.ру" саҥа дуоһунаһын туһунан сураста:
- Муниципалитет үлэһитэ буолбуккуттан сиэттэрэн депутаттаан бүтэҕин дуо?
- Суох. Унитарнай тэрилтэҕэ депутат үлэтинэн тэҥҥэ дьарыктаныахха сөп. Сокуон ону утарбат. 
- "СМЭП" муниципальнай унитарнай тэрилтэ тугунан дьарыктанар тэрилтэний?
- Куорат гидротехническэй сооруженияларын көрүөхтээх-истиэхтээх.
- Быһыттары?
- Быһыттары көрүөхтээх-истиэхтээх уонна (судургу быһаардахха) халаан, улахан өһүөн кэнниттэн кэлэр уу таһымын  задвижкалары аһан-сабан уу таһымын тутуохтаах. 
- Куоракка төһө-хачча гидротехническэй тутуу баарый?
- Республика даннайынан көрдөххө 94 тутуу баар диэн. Оттон куораттааҕы баай-дуол уонна сир сыһыаннаһыыларын департаменын даннайынан 64 устуука диэн суруллар.
- Чуолкай бачча диэн этэр уустук?
- Оннук. Билигин ити тутуулары барытын кэрийэн, учуоттаан, хайдах-туох туруктаахтарын сыаналаан, техническэй пааспардарын оҥоруохтаахпыт.
- Айаал Семенович, бу муус бараары турдаҕына аһара кутталлаах дуоһунаска анаабыттар дии санаабаккын дуо? Билигин муус харда да, халаан уута халыйан таҕыстаҕына эйигин "буруйдаах моттойо" оҥоруохтара дии...
- Эппиэтинэстээх. Билэбин. Өйдүүбүн. Онон, билигин төһө сооружение баарын үөрэтиэхпит уонна туруктарынан көрүөхпүт.
- Бу иннинэ "СМЭП" ханнык структураҕа киирэр этэй?
- "СЭГХ".
- Анатолий Кырджагасовка?
- Оннук. Ол гынан баран, гидротехническэй тутуулары дуогабар быһыытынан "Сигнал" ХЭТ көрөн-истэн олорбута. 
- Бу дуоһунаска ананыы соһуччу буолбута дуу, эбэтэр...
- Кулун тутар саҥатыгар кэпсэтии барбыта. Онтон онон-манан эргийэн баран, бу муус устар 8-гар эрэ дьаһал таҕыста.
- Дойду үрдүнэн бэлиэр халаан уута улахан хоромньуну таһааран эрэр.
- Ол иһин, стратегическай суолталаах объектары көрөр-истэр анал сулууспа баар буолуохтаах диэн Айсен Сергеевич "СМЭП" тэрилтэни ойуччу тутан туспа ыытта.
- Быһаччы кимиэхэ бас бэринэр буолаҕыт?
- Тэрийээччибит - куорат баайга-дуолга уонна сир сыһыаннаһыыларыгар департамена. Куратор - баһылык солбуйааччыта. 
-  Хас үлэһиттээх буолаҕын?
- Ол объектарбыт төһөлөрө чуолкайданнаҕына, туруктара билиннэҕинэ биирдэ штатнай расписание оҥоһуллуоҕа. Офиспыт Дзержинскэй уулусса 40/1 дьиэтигэр, урут "Сигнал" ХЭТ олорбут сиригэр баар буолуоҕа.
- Сэрэйдэххэ быһыттар, ууну ыытар-тутар тэриллэр ахсааннара да чуолкайа суох буоллаҕына, туруктара мөлтөһүөр буолуо дии. Сөргүтэр үлэ хантан үбүлэниэй?
- Туруктара мөлтөх буолуо диэн мин эмиэ сэрэйэбин.  Дьокуускай куорат - республика киин куората, атын куораттардааҕар суолтата улахан. Онон муниципалитеты таһынан, республика бюджетыттан эмиэ үп көрүллүөхтээх дии саныыбын.  Ону сэргэ халаан уута дойду үрдүнэн хоромньу бөҕөтүн таһаарарынан сибээстээн, федеральнай анал программалар, бюджеккэ ыстатыйалар баар буолуохтара, ону көрөн үөрэтэн, ол программаларга киирсиэхпитин наада. 
- Айаал Семенович, сэһэргэһииҥ иһин махтанабыт. Уонна, оттон саҥа үлэҕэр ситиһиини, халаан уута этэҥҥэ ааһарыгар баҕарабыт!
- Махтал.
***
Аартык.ру