Сыл аҥаарын быһа баһа суох турбут сүрүн министиэристибэбит , кэмниэ-кэнэҕэс дьэ миниистирдэннэ. Уонна буолаары буолан, олус таһымнаах, дьиҥнээх идэтийбит, билиилээх-көрүүлээх киһи ананна!
Ольга ФЕДОРОВА биографиятын президент Ил Түмэн иннигэр ааҕан иһитиннэрдэ: 
- 1962 сыллаахха атырдьах ыйын 30 күнүгэр Ньурба бөһүөлэгэр, Ленинскэй оруйуоҥҥа төрөөбүт. 
1984 сыллаахха Ригатааҕы гражданскай авиация инженердэрин институтун бүтэрэн  инженер-экономист идэтин ылбыт, 1992сыллаахха Москубатааҕы  юридический институту бүтэрбит.
1984 сыллаахха Ньурбатааҕы авиапредприятиеҕа инженер-экономист.
1984 - 1986 сс. - оруйуон хомсомуолун тэрилтэтигэр үлэлиир.
1986 - 1988 сс. - Ньурбатааҕы авиапредприятие, үлэ уонна хамнас отделын  инженер-экономиһэ.
1988 - 1989 сс. - Саха сиринээҕи ЫБЛКС инструктора;
1989 - 1993 сс. - Ньурбатааҕы авиапредприятие сүрүн экономиһэ.
1993 - 1994 сс. - Ньурба улууһун баһылыгын үпкэ уонна экономикаҕа солбуйааччыта. 
1994 - 1996 сс. - СР Президенин көмөлөһөөччүтэ.
1996 - 1997 сс. -  СР Правительствотыгар Үп, кредит, валютаҕа ресурс департаменын солбуйар дириэктэрэ.
1997 - 1998 сс. - СР Экономикаҕа уонна сабаҕалааһыҥҥа министиэристибэтигэр солбуйар миниистирэ.
1998 - 2000 сс. - СР Экономикаҕа уонна сабаҕалааһыҥҥа министиэристибэтигэр бастакы солбуйар миниистир.
2000 - 2012 сс. - "Якутскэнерго" ААО АХ генеральнай дириэктэрин солбуйааччыта.
Ил Түмэн депутата,  "Заслуженный экономист РC(Я)" бочуоттаах аат иҥэриллибитэ.
Баартыйата суох. 
...Ити тылларга суруналыыстар бэйэ-бэйэлэрин көрсө түстүлэр. Ольга Николаевна  парламеҥҥа "Сиэрдээх Арассыыйа" фракциятын салайан кэлбитэ эбээт. "Партия чилиэнэ буолбакка даҕаны фракцияны салайыахха сөп" диэн буолла. ФЕДОРОВА итиннэ даҕаны мындыр өйө көстөр. Ситэриилээх былааска ананар киһини партияҕыттан таҕыс диэн ирдииллэрэ биллэр, аны таҕыстаҕына "таҥнарыахсыт" аатырдаҕыҥ ол. Онон Ольга Николаевна "Сиэрдээх Арассыыйа" чилиэнэ буолбатаҕа - биир айдаан төрүөтүн суох оҥордо.
Ситэриилээх былааска барбытынан сибээстээн, Ольга ФЕДОРОВА депутаттыыр боломуочуйатын устуохтаах. "Сиэрдээхтэр" биир саамай күүстээх, кыахтаах киһилэриттэн маттылар, ол оннугар республика экономиката, промышленноһа үрдүк таһымнаах каадырынан байа түстэ. 
***
Депутаттар коллегаларыгар саҥа дуоһунаска тахсыылаахтык үлэлиэҕэ диэн эрэннилэр, ситиһиини баҕардылар. 
Сирэй-харах анньыһыыта суох туох да тахсыбат үгэстээх. Онон Георгий АРТЕМЬЕВ (КПРФ) президентэн, билэ-билэ, Ольга ФЕДОРОВА бу дуоһунаска ананыан иннинэ ханна үлэлээбитин, "хантан кэлбитин" президентэн сураста. Кырдьаҕас хомуньуус Егор Афанасьевыһы саҥардан кэбиһээри соруннаҕа. Анарааҥҥыта сууххайдык: "Сибилигин аҕай эттим, ханна хаһан үлэлээбитин. Субу билигин - ханна да үлэлээбэт, өйдөөн истибит буоллаххына", - диир.
Артемьев хаһааммыт санаатын тоҕо тэбиир: 
- Дьэ, сити баар! "Якутскэнерго" генеральнай дириэктэриттэн, депутат Олег ТАРАСОВТАН ыйытыахха баар! Ольга ФЕДОРОВАНЫ үлэтиттэн уһулбуттара - олохтоох каадыры сыаналаабаттара, туораталлара көстөр!
Олохтоохтору туоратар энергетиктэр дьиикэйдэриҥ диэтэҕиҥ.
ФЕДОРОВА онуоха:
- Үлэлиир болдьоҕум дуогабарбынан бүппүтэ, салалта контрагы булгуччу уһатар эбээһинэһэ суох. Куһаҕан эмиэ үчүгэйдээх. Онтон атын манна эһиги иннигитигэр бүгүн туруом суох этэ, - диэн хоруйдаата.
***
Депутаттар эбиэт иннинэ бэбиэскэлэрин эрэ бигэргэтэр түбүккэ олордулар. Маннык, атыыр оҕус алтаҕынан мунньахтаатахтарына, киэһээҥҥи астара сойууһу.
Ордук эриһэн баардарын биллэрэн хомуньуустары сэргэ парламеҥҥа саҥа тэриллиэхтээх "Гражданскай платформа" чилиэттэрэ - Афанасий МАКСИМОВ уонна Владимир ФЕДОРОВ чаҕылыҥнастылар. 
МАКСИМОВ биир сыл пленарканы, биллэр төрүөтүнэн көтүппүтэ, онон мунньахха спикер Виталий БАСЫГЫСОВ үөһээ тыыныар диэри көхтөөхтүк кытынна. 
***
Афанасий Николаевич "күһүҥҥү Ил Түмэн быыбарыгар анаан былаас баартыйата бэйэтин туһатыгар сокуон оҥостон эрэр" диэн "ньыгыллар" киллэрбит инициативаларын бэбиэскэҕэ киллэримиэххэ наада диэн туруоруста: "Саха республикатыгар норуот депутаттарын талар быыбар туһунан", "Саха республикатыгар муниципальнай быыбар туһунан" диэн икки региональнай сокуоннар барылларын дьүүлүн утарда.
Кинини хомуньуустар өйөөтүлэр. 
Туруорсуу хайдах сөпкө боротокуолга киирэн куоластаныахтааҕын туһунан депутаттар өр мөккүстүлэр. Вице-спикер Александр ЖИРКОВ син балайда ыйдаҥардан дьонун сааһылаан истэҕинэ, депутат Альбина ПОИСЕЕВА тыл ылааччы буолан, суолга тахсан испит дьону төттөрү хара тыаҕа хайыһыннарда. Спикердэр БАСЫГЫСОВТААХ ЖИРКОВ бэйэ икки ардыгар тугу эрэ быһаарсаллар, Виталий Николаевич:  "Буккуллан хаалыахтара" диэн депутаттарын саарбахтыыр саҥата иһиллэн ааста. Онон буккуллан-тэккиллэн син тугу эрэ тобуллулар.
Куоластааһыҥҥа туруоран да диэн, "ньыгылларыҥ" ахсааннара элбэх дьон, син биир бэйэлэрин инициативаларын көрдөрөн баран тэйэллэрэ биллэр. 
Аны, Владимир ФЕДОРОВ "техника аата техника" диэн депутаттар ахсааннарын ынахтыы аахтара сатаан биир кыһалҕаҕа түстэ.
***
Прокурор А.ПОДЛАСЕНКО сокуону кэһэн дуоһунаһыгар олорор диэн Аартык.ру суруйан турар.
Биэс сыл буола-буола прокурор регион парламенын бигэргэтиитин ааһыахтаах. ПОДЛАСЕНКО Саха сиригэр прокурордаабыта сэттис сылыгар баран эрэр. Кини бастаан дуоһунаска ананарыгар эрэ Ил Түмэн бигэргэппитэ, ол кэннэ иккистээн бигэргэтэ илик.
Онуоха прокуратура бэрэстэбиитэлэ: "СР Прокурора Хабаровскайга сылдьар, кини суоҕуна ити боппуруоһу көтөҕөр этичнэйэ суох. Субъект прокурорун РФ генеральнай прокурора Ю.Чайка болдьоҕо суох аныыр боломуочуйалаах. Эһиги (депутаттар) анаммыт прокурор кандидатуратыгар сөбүлэҥ эрэ биэрэр кыахтааххыт. Прокурор эһиэхэ отчуоттуур эбээһинэһэ суох, информация оҥоруон сөп, ол гынан баран ол эмиэ кини эбээһинэһэ буолбатах", - диэтэ. 
Быһатын, Саха сирин прокурора ананарыгар Саха сирин депутаттара, этэргэ дылы, суолтатыгар эрэ наадаҕыт диэх курдук буолла. Прокурор баҕардаҕына Ил Түмэҥҥэ кэлиэ, суох да суох... Өһүргэниэххэ сөп эрээри, дьиҥ олоххо оннук баар балаһыанньа. Ону уларытыахха наада. Ол иһин Афанасий МАКСИМОВ туруулаһар: республикабытыгар үрдүк дуоһунаска ананан кэлэр дьон кандидатуратыгар олохтоох былаас санаата учуоттаныахтаах. Аҥардастыы киинтэн соҥнонон анаммыт дьон хайдахтарын көрдүбүт. ИДьМ миниистирэ Я.Стахов федеральнай ирдэбилгэ сылдьар, прокурорбут А.Подласенко албыннаан үрдүк хамнаһы суруна сылдьыбыта арыллыбыта.
Александр ЖИРКОВ прокурордар хотугу надбавкаларын туһунан Ил Түмэн депутаттара билиэн-көрүөн баҕарар буоллахтарына, бэрээдэк быһыытынан боппуруоһу көтөҕүөххэ наада диэтэ. Итиннэ Афанасий МАКСИМОВ сөбүлэстэ, официальнай сурук-бичик парламент тустаах уорганыгар киириэҕэ диэн эрэннэрдэ.
***
Депутаттар эбиэт кэннэ отуттан тахса боппуруоһу көрүөхтээхтэр. Ол иһигэр "Саха Республикатын баһылыгын талар быыбар туһунан" сокуон барыла дьүүллэниэхтээх. 
***
Аартык.ру