Ханнык баҕарар норуот ыра санаатын, ымыы гынан иитиэхтээбит сырдыкка баҕатын сэһэн-сэппэ гынан, уостан уоска тиһэн көлүөнэттэн көлүөнэҕэ тиэрдэр. Манчаары диэн ким этэй? Туох этэй? Ороспуой дуу, Дьоруой дуу? Тоҕо үс үйэ кэриҥэ ааспытын да кэннэ, норуот кинини тоҕо умнубатый?

Батталлаах үйэбит эргийэн кини аата ааттанар дуу, эбэтэр норуот дьоруойдарга наадыйар баҕата хаһан да хамматын туоһута дуу?

Соторутааҕыта Николай Федорович Борисов - Николай Уус "Манчаары Баһылай - юрист көрүүтүнэн: докумуоҥҥа олоҕурбут сэһэн" диэн бэрт дьикти кинигэтэ бэчээттэнэн таҕыста. Былыргы үйэлэртэн киһи аймах юристары көмүскүүр уонна буруйдуур өрүттэргэ арааран, дьиҥи көрдүүр ньыманы тобулан аныаха диэри туһанар. Ол сиэринэн суруйааччы, юриспруденция ветерана Н.Ф.Борисов-Николай Уус холуобунай дьыаланы, фольклору уонна прокурор, поэт М.А.Александров "Якут Манчары" диэн драматическай поэматын сэргэ тутан оҥорбут ырытыыта Манчаары уустук, үгүс мөккүөрдээх, утарсыылаах уобараһын сонуннук, саҥалыы арыйда. 
Николай Уус Мэҥэ Хаҥалас Дьабыылыттан төрүттээх. Үөрэҕинэн, идэтинэн өр кэмнэргэ силиэдэбэтилинэн. прокурорунан, судьуйанан үлэлээбитэ. Бастакы уус-уран литератураҕа холонуута 1981 сыллаахха "Өймөкөөн тыатыгар" диэн кэпсээнинэн саҕаламмыта. Онтон ыла 20-ччэ кинигэлэри айан таһааттарда. 
Николай Федорович төрөөбүт улууһун бочуоттаах олохтооҕо, РФ уонна СР үтүөлээх юриһа, милиция туйгуна. бочуоттаах меценат. СР кырдьаҕастарын Ытык Сүбэтин президиумун чилиэнэ, СР ааһыныы боппуруостарыгар хамыыһыйатын бэрэссэдээтэлэ, Ис дьыала миниистирин сүбэтин чилиэнэ.

Кинигэ "Медиа-холдинг" ААО иһинэн бэчээттэнэн таҕыста. Кинигэ киоскаларыгар атыыланар, сэһэн ааҕааччыга тиийимтиэ, хомоҕой тылынан сурулунна.

"Илбис кыыһа эркиннээхтэр, 
Итир былыт албастаахтар, 
Хара хамсык дьайыҥнаахтар, 
Хааннаах хабала кэпсэтиилээхтэр,
Тимир уобуруччу өйдөөхтөр
Үрүдүбүтүгэр үөскээбиттэр..."

(Манчаары ырыатыттан быһа тардыы).