Саха президенэ  "урукку былааска" көйгөтүллэ сылдьыбыт политиктары бэйэтин тула түмэрин кэтэһэр киһи элбэҕэ. Бастаан утаа Егор Борисов "оппозициялары" кытары биирдии-биирдии кэпсэтэлээбит сурахтааҕа. Интеллигенция бэрэстэбиитэллэрин эмиэ сирэй көрсүтэлээбитин туһунан интервьютугар элбэхтик ахтыбыта. Ол "көрсүһүүлэр" улахан түмүгү аҕалбатахтара. Баҕар, сомоҕолоһуох дьону, түбэһэ  быыбардар кэлэн сиэтэхтэрэ буолуо. Оттон быыбардар хайдах курдук ааспыттарын бэйэҕит билэ-көрө сырыттаххыт.
Ньургун Тимофеев аатыгар эрэ" Президент сүбэһитэ" буолара дуу, эбэтэр дьиҥнээхтик тыла-өһө  иһиллэр киһи буолара дуу... Дьиҥинэн, Москубаҕа алмааска улаҕалаах толкуйдаах омуктары кытары 10-ча сыл бииргэ үлэлээбит сыаналаммат уопуттаах ээ. "Кинилэр диэтэх дьон албастарын тугун эмэ кудьуйан ылбыт" буолуохтаах.
Тимофеев 1996 - 2005 сс.. - Москубаҕа АЛРОСА АК тааһы батарар тэрилтэтин солбуйар генеральнай дириэктэринэн үлэлээбитэ. Уопсайынан даҕаны, Ньургун Семенович 1991 сылтан 2005 сылга, парламеҥҥа спикердии кэлиэр диэри, алмаас бизнеһигэр буспут-хаппыт киһи. Ити эйгэ иһин-биэтэһин ымпыгар-чымпыгар диэри сыныйан билэрин киһи саарбахтаабат даҕаны. Бу АЛРОСА аһыллар, атыыланар кэмигэр олохтоох сүбэ-ама биэриэн сөп.
Киһи орто дойдуга төрөөн баран кыаҕа-талаана, өйө-билиитэ обществоҕа, дьонугар-сэргэтигэр туһалаатаҕына эрэ санаата дуоһуйар. Кыаҕын кыайан таһаарбат киһи араас дьайга умса-төннө түһэрэ үгүс. Онон "төбөлөөх уолаттар" дойдуларын тустарыгар үлэлииллэригэр кыах бэриллэн иһэрэ үчүгэй буоллаҕа эбээт.
 
***

Өссө биир оппозиционер-дьокутааты Эрнст Березкины даҕаны былааска чугаһатыы син баран эрэр курдук. Кини кэргэнэ Любовь Березкина үп миниистирэ Валерий Жондоров солбуйааччытынан ананна.