Айсен НИКОЛАЕВ, Дьокуускай куорат баһылыга:

-          Сокуон ылыллара, референдум ыытыллара  барыта бэрээдэктээх. Референдум - Төрүт сокуоҥҥа эбэтэр дойду сокуонугар быһаарыллыбытах боппуруостарга  эрэ норуот санаатын билээри эрдэттэн ыытыахтарын сөп.  Референдум боппуруостара ылыллан бүппүт Россия Федерациятын сокуонун  утары ыытыллыбат, ол – федеральнай  сокуонунан көҥүллэммэт. Правовой судаарыстыбаны тутабыт диир буоллахпытына – сокуон булгуччу бары субъектарга барытыгар тутуһуллуохтаах.

Юрий НИКОЛАЕВ, Ил Тумэн дьокутаата:

-          РФ Төрүт сокуонугар суруллубутунан  уонна “РФ гражданина быыбарга уонна референдумҥа кыттар сүрүн мэктиэлэрин туһунан” ФЗ-67 этэринэн, Россия субъегар ыытыллар референдум ыйытыга – федеральнай сокуон ханнык эмэ территорияҕа дьайарын-дьайбатын быһаарыа суохтаах.  Уһук Илиҥҥэ 1 гектар сири босхо түҥэтии туһунан сокуон – федеральнай сокуон. Ол аата, бу сокуон  ойуччу Саха республикатыгар дьайыа, үлэлиэ суохтаах диэн туруорсар боппуруостаах референдум ыытыллара Россия сокуонун кэһии буолар. Саха республиката – Россия субъега, туспа судаарыстыба буолбатах.  РФ Төрүт сокуонун 104 ыст. 1-кы чааһа этэринэн, сокуону - дойду президенэ уонна правительствота, Федерация Сүбэтин чилиэннэрэ, Госдума уонна регионнар парламеннарын дьокутааттара  көҕүлүүр бырааптаахтар. Сокуону ситэриигэ, уларытыыга Ил Түмэн үлэлэһиэхтээх.  Ол иһин, Госдумаҕа,  2015 сыл ахсынньы 18 күнүгэр “дальневосточнай 1 гектар” туһунан сокуон бастакы ааҕыытын ааһарыгар, биһиги  республикабыт парламена уонна  правительствота кыттыһан  (Уһук Илин регионнарыттан соҕотох Саха сирэ эрэ)  сокуон барылыгар элбэх  ситэриини уонна уларытыыны туруорса сылдьар.  Сокуону уларытыы – сокуон ирдэбилинэн оҥоһуллуохтаах. Сокуону сокуонунан эрэ кыайыахха сөп.

***

Aartyk.Ru

 P.S.: Ил Түмэн дьокутаатыттан Иван ШАМАЕВТАН бу боппуруоска туох санаалааҕын билээри төлөппүөннүү сылдьыбыппыт баара... киһибит, хата, үнтү үөхсэн соһутта. Атын санааны тулуйан истибэт, бэйэтэ эрэ эппитин быраапсай дииргэ үөрэммит, суруналыыстарга кырыктаммыт  дьокутааппыт быһымах  санаата улаханнык сөхтөрдө...