Аймалҕан да араастаах
Суббота, 19 Декабря 2015 18:48
Иван ШАМАЕВ уочараттаах куттааһына саҕаланна. Эмиэ “өллүбүт-сүттүбүт, быһынныбыт-ойуннубут”... Харбыт пластинка курдук хабарҕаҕа тураары гынна.
Иван Ивановыһы урут сэргиир, ытыктыыр киһим этэ. Ол гынан баран кэнники кэмҥэ киһибит наһаалаан барда. “Шамаев аата “Утарсыык Уйбаан” диэн буолара буолла”, - диэн биир кырдьаҕас эппитин өйдөөн кэлэбин.
Гаас-химия собуотун утарбыта өссө син өйдөнөр. Билигин 1 гектар сир босхо бэриллэрин утаран хамсаныы бөҕө буолан, биир дойдулааҕынан Госдумаҕа кытары эттэрэн, сахалары федеральнай былаас айаҕар уган биэрдэ. Аны “өллүбүт-сүттүбүт тылбыт суох буолан” эрэр диэн үөгүү бөҕө түһэрдэ. Туох ааттаах өлөрүнэн-сүтэринэн ыраланар куһаҕан биттээх киһиний бу?!
Кэлин-кэлиҥҥинэн наар федеральнай былааска бу кып-кыра ахсааннаах омугун утары туруорарынан эрэ дьарыктанан тахсар буолла! Ханна эрэ татаардар саҥа ылыллан эрэр үөрэхтээһин концепциятын утарбыттар үһү дии-дии “Вацабынан” тарҕат да тарҕат, дьону куттаа да куттаа, аймаа да аймаа... Бу уопсайынан үлэлиир киһи дуу, суох дуу?
Оскуолатын учуутала “дириэктэрбит бэлиитик буолан эрэй, кини бүппэт миитинин-пикетин, мунньаҕын тэрийэртэн соло булбаппыт” диэн этэн аһарбыттаах. Бэйэтэ да тустаах үлэтинэн дьарыктаммат, дьону да сүгүн үлэлэппэт. Уһуннук оскуола дириэктэринэн үлэлээтэ, элбэх оҕону, төрөппүтү араас хабааннаах политическэй боппуруоска кыттыһыннарда. Сорох дьон онтон дьиксинэр. Ол гынан баран, оҕом иннин быспатыннар эрэ диэн онно-манна күһэлинэн кыттыһаахтыыр. Итинник боппуруостарга оҕону, төрөппүтү кыттыһыннарары үөрэхтээһин сокуона олох утарар. Сааһын ситэ илик оҕону онно-манна кыттыһыннаран олоҕун аймыыр табыллыбатын Шамаев бэйэтэ да бэркэ билэн эрдэҕэ.
Татаардар - Россияҕа нууччалар кэннилэриттэн иккис элбэх ахсааннаах халыҥ омук. Сайдыылара, кыахтара, харчылара-үптэрэ – олигархтарын да ахсаанынан көрдөххө, еврейдэр кэннилэриттэн иккис баай омук. Аны аҥаардас исламнарын итэҕэлин ыллахха – Россияҕа иккис официальнайдык билиниллэр улахан итэҕэллээх омуктар.
Аан дойдуга исламскай итэҕэл - улахан былыргы итэҕэл ахсааныгар бигэтик киирэр. Кыахтаах, улахан судаарыстыбалар итэҕэллэрэ. Татаардар туох баар эйгэҕэ – киинэттэн, баан, гаас-ньиэп хостооһунуттан саҕалаан федеральнай былаас туох баар таһымыгар тиийэ дьонноро олороллор. Кириэмили кытары ыкса сибээстээх, билсэр кыахтаах халыҥ омук. Ол дьон кутуругар сөрөөн, быычыкаай саха омугун үтүгүннэттэрэн Иван Шамаев биһигини туохха-туохха уган, тиэрдэн биэрэ сатыырый?!! Олох дьикти, кутталлаах суолга туруора сатаан эрэр.
Сахалар атын омуктары кытары тэҥҥэ туруулаһар биир да баай киһибит суох, туох да производствоны бас билбэппит, сирбит баайыгар хара үлэһитинэн киирэн кыттыстахпытына барҕа махтал, федеральнай былааска сыппыт да суох. Бэйэбит сирбитигэр кыайан хаһаайын буолар кыахпыт суох. Ахсааммыт, сайдыыбыт таһыма быстар мөлөх. Бэйэбит бэйэбитин улуубут, кыахтаахпыт, сайдыылаахпыт диэн төһө баҕарар этиниэхпитин сөп. Хараххытын аһыҥ – туох да кыаҕа суох кыра омукпут! Урукку улуу убайдарбыт сирдээн, судаарыстыбалаан хаалбыт өҥөлөрүн тобоҕор олоробут. Кэм - тыйыс. Биирдэ сотон ааһыахтара. Киһи утарытынан баран тугу да ситиспэт: былыр да, аны да. Шамаев татаардардыын куомуннастын. Ким да боппот. Ол гынан баран НОРУОТ аатыттан буолбакка БЭЙЭТИН аатыттан!
Татаардар аҥардастыы “бөө” диэн киэптээбиттэрин билигин Путин миэстэлэрин буллартыаҕа. Ол кутуругар кыра омук сөрөммөтө ордук. Сирияны көрдөрдүлэр эбээт – ньиэптэрин таһар массыыналар барыта “ТАТ...” диэн суруктаахтарын. Ол “Камазтар” ханна оҥоһуллалларый? Хайдах итиннэ Сирияҕа тиийэн хааллылар? Хаһан тахсыбыттарай, тугу тиэйэн таһаарбыттарай? Кураанах айаннаабатахтара чахчы.
Билигин Казаньтан быһа Турцияҕа көтөр рейстэр тохтотулуннулар. Уопсай бизнестээх татаар-турок элитэтин хаарыйар суруйуулар федеральнай СМИлэргэ бэлиэр тахсыталаан эрэллэр. Бу саҕаланыыта эрэ. “С кем ты, господин Минниханов?” ыйытыы таах мээнэ быраҕыллыбыта буолуо дуо? Туох да бу сиргэ “таах мээнэ” ХАҺАН ДА оҥоһуллубат – өссө биирдэ этэбит. Өйдөөҥ, ыыргытын кэҥэтэн, аан дойдуга буола турар событиялары кытары ситимнээн толкуйгутун улаатыннарыҥ.
“Камазтар” ислам дойдуларыгар хаһан, хайдах, туохтаах тахсыбыттарын силиэстийэлиир үлэ барда. Билигин туох баар ислам дойдуларын кытары сибээс барыта сөргүтүллүө: хаһан, хаска, кимнээх, тоҕо, төһөҕө... боевиктары ииппит-үөрэппит, үбүлээбит, үбүлүүр чиновниктары, бизнесменнэри бэрээдэктиэхтэрэ. Бэйэҕит да сэрэйэр буолуохтааххыт, ньиэп сыанатыттан Россия судаарыстыбатын экономиката, олоҕо-дьаһаҕа улахан тутулуктаах. Ону түһэрэр, харгыстыыр, “хаҥас” хараҥа ырыынакка атыылыыр суолу-ииһи, сибээһи кум-хам сабарга сорунуулаахтык уонна кытаанахтык киирсиэхтэрэ. Ити дойду стратегическай, тыыннаах хааларын, көҥүллүк тыынарын иһин охсуһуу. Путин сөпкө дьаһанар, ырааҕы эргитэн-урбатан, дириҥник толкуйдуур, сүдү улахан, хас да түгэхтээх салайааччы буолара бириэмэнэн дакаастанан эрэр.
Путин 2000 сылга былааска кэлэн баран, дойду политикатын уларыта тутар реформаларын оччотооҕу элитэ барыта утарбыта. Ол саҕанааҕы бастакы сүһүөх олигархтар – норуоту албыннаан тиэрэ байбыт араас ходорковскайдары, березовскайдары, гусинскайдары, дерепаскалары, чубайстары “миэстэлэрин” буллартаата. Дойду туох баар үбүн-харчытын, производствотын, систиэмэтин барытын атыылаһан ылбыт, арҕаа дойдуларга истиин-хоойдуун, дууһалыын атыыламмыт, киэптээбит-хааптаабыт дьону, аргыый аҕай да буоллар, тарбахтарыттан тутан баран хоннохторугар тиийэн хам ылаттаата. Путин - олох киһи киэн туттар, дьиҥнээх Россия патриота. Барыта биир кэлимсэ буолбат, ити идеология охсуһуутугар толук буолбуттар эмиэ бааллар. Син биир сэрии кэриэтэ буоллаҕа. Дьэ, итинник кэмҥэ – сүдү итэҕэллэр, улуу омуктар киирсэр кэмнэригэр биһиги шамаевтарбыт кып-кыра омуктарын ууга-уокка ас да ас... олох өйдөммөт быһыы!
Ислам итэҕэллээх чеченнэр баһылыктара татаардардааҕар улахан муударайа көһүннэ. Татаардар улахан аҥаардара төрөөбүт тылларын билбэттэр, исламнарын наһаа кытаанахтык тутуспаттар - “бааһынай” омуктар. Чеченнэргэ Путин сыһыана олох атын. Тоҕо диэтэххэ, чеченнэриҥ, дьэ кырдьык, исламы эрэ буолбакка, радикальнай исламы батыһааччылара олус элбэх. Кытаанах омук. Кинилэр Украиналары батыһан буккуллан-тэккиллэн турдахтарына - иэдээн. Чеченнэр Кадыровтара татаар Миннихановтарынааҕар муударай, сэрии алдьархайын илэ этинэн билбит киһи буолан, национальнай, итэҕэл боппуруоһун олох көтөхпөт. Бэйэтин территориятыгар федеральнай былааһы киллэрбэт да, орооһуннарбат да, ол гынан баран публикаҕа - олох Россия патриотабын диэн этэ-тыына олорор. Путин туох диэтэ да барытыгар сөбүлэһэн, өйөөн иһэр. “Россияҕа биир Президент баар буолуохтаах”, - ити Кадыров этиитин татаардарга туһаайан, Путин бу ааспыт пресс-конференциятыгар, ким да боппуруос биэрбэтэҕин үрдүнэн (!) холобур аҕалла. Кадыров теракт буолбутун кэннэ тута, туроктар сөмөлүөппүтүн суулларааттарын кытары олох сырыһыннара комментарийдаан, Россия патриота буоларын өссө биирдэ хараҕалаан этэн иһэр. Ити киитэрэй өйтөн тахсар. Оттон татаардар национальнай боппуруоһу күөртээн, аһаҕастык федеральнай былааһы утаран норуоттарын уган эрэллэр. Билигин исламистарга икки суол эрэ баар: Кадыров холобура уонна Минниханов. Чечня сылын ахсын триллионунан үбү ылар, татаардар - күллээх кокуоска. Ким тииҥ мэйиилээҕий? Кимиэнэ улар киэнин курдугуй?
Киирсэр да араастааҕын ити икки национальнай республика холобуругар да көрөбүт.
Чечня сирэйинэн утары баран тугу ситиспитэй, билигин ньуолбардаан тугу ситиһэрий? Татаардар кэһэкэнэ буолбатах омуктар, ол иһин баламаттык утары киирсэн эрэллэр. Ол дьону батыһабыт дуо?
... Киһи, наар утары, тиэрэ эргийэ сылдьара кыаллыбат, сүүйтэриилээх. Утарар – чэпчэки эрээри, туох да сайдыыга тиэрдибэт. Былыргыбытын тутан олорор кыаллыа суоҕа көстөр. Политиктарбыт бары “норуот туһугар” диир буоллахтарына – норуот туһугар саҥа сахалыы идиэйэлэри, производствоны тоҕо оҥорон, тутан-хабан таһаарбаттарый? Хас да сылга норуотун айаҕын иитэр, үлэлиир производствоны тоҕо толкуйдаабаттарый? Тоҕо наар утарылаһарга эрэ сахалар ананыахтаахтарый?!
Ити саҥа ылыллан эрэр үөрэх концепциятын өссө көрүөххэ, ырытыахха наада. Онно да бириэмэбит тиийиэ. Оттон аахпыт учууталлар Россия атын омуктарын саба баттаан, төрөөбүт тылларын чаастарын аччатыахха наада диэн модьуйуу ханан да суох диэн этэллэр. “Татаардар барахсаттар” утардылар эрэ диэн кэннилэриттэн саппай уопсар туох көдьүүстээҕий?!
Татаар бизнес элитэтэ Сирияттан, Турцияттан сылтаан, харчы кутуллар ханааллара быстан эрэриттэн ыксаан национальнай боппуруоһу күөртүүллэр. Ол иһин туох баар федеральнай былаас сокуоннай көҕүлээһиннэрин барытын утараллар, утарыахтара да турдаҕа. Харчы туһугар национальнай боппуруоһу да көтөҕөргө уот бэлэмнэр. “Торгуйся” гыналлар. Бүттэ. Ис хоһооно ол.
Татаардар бу үйэҕэ диэри - Кириэмиллиин тапсар эрдэхтэринэ, улаханнык саҥа таһааран “төрөөбүт тылларын” көмүскээбиттэрэ ханна да саараама иһиллибэт этэ. Хата, билигин кэлэн, национальнай боппуруоһу күөртүүргэ сахалары туһанаары гыммыттара алыһын! Ол аайы биһиги дьоммут чохчойо-чохчойо сүүр да, сүүр... Кииристиннэр ээ бэйэлэрэ кыахтаах омуктар. Сахалар бу сэрииттэн сүтэрэрбит суох. Биһиги итэҕэлбит буолбатах, биһиги бизнеспит буолбатах. Сордоохтор хайа да бизнеспит суох. Ол сайдыыта суохпут эмиэ да абырыыр, сорох-сороҕор.
Хаһан эрэ казах блогера Россия олигархтарын омуктарынан ырытан суруйбута баара. Бастааҥҥы олигархтарга биир да нуучча суох. Еврейдэри кытары татаардар. Бэл, ТНТ ханаалыгар көстөр бэһиэлэй уолаттар күлэллэрин-салалларын быыһыгар: “Россияҕа нуучча олигархтара суохтар”, - диэн баран Абрамович курдуктар хаартыскаларын көрдөрөн салыбыратан ааспыттара.
Татаардарга олигархтар бааллар. Ону ааһан элбэхтэр.
Аны, ити Дагестан курдук 429 тыһ. киһилээх, сахалар саҕа ахсааннаах быыкаай, сайдыыта суох баҕайы республикаттан хантан итиччэ элбэх олигарх тахсан кэлбитэ буолла диэн муодаргыыбыт. Бэҕэһээҥҥи тустууктар биир үтүө күн тиэрэ байан уһуктубуттар үһү! Сымыйа буоллаҕа дии. Ити Сардаровтарын, Керимовтарын, Магомедовтарын онтон да атыттарын – тас солотууларын хастаан көрдөххө бары еврейдэр сыдьааннара. Ол иһин биир күн сир баайдаах активтары атыылаһан ылар харчыланнахтара эбээт. Уонна туохтарынан кыра-хара омуктан ити айылаах баай дьон биирдэ ыһыллан тахсыахтарай?
Саха сирин гааһа-ньиэбэ эмиэ биир күн ити дьон илиилэригэр баран турар. Туох да түргэн үлүгэрдик. Магомедовтары Афанасий Максимов Саха сиригэр аҕалбыта диэн айдаараллар даҕаны, букатын сымыйа кэпсээн. Ол Афанасий, биһиэхэ, сахаларга эрэ оннук айылаах кыахтаах, баай-талым буолан көстөр. Анарааҥҥыларга баайынан-дуолунан, кыаҕынан хайдах да туруулаһар кыаҕа суох боростуой “дьиикэй тоҥус”.
Штыров нөҥүө Магомедовтаах киирэн “Якутгазпрому” атыыласпыттара. Ол, Саха республиката сир баайдааҕын Максимов эрэ билэригэр дылы... Аан дойду барыта билэр – тыытылла илик сир баайа биһиэхэ эрэ хаалбытын. Наадалаах буолан Штырову булан, “кэпсэтэн” ол дьонуҥ таҕыстахтара. Максимов ити оонньууга таах тиһэх толук буолбута ырылхайдык көстөр.
Аан дойдуну еврейдэр быдьаһа олороллор дииллэрэ кырдьыга оннук. Икки клан – Ротшилдьар уонна Рокфеллердар киирсиилэрэ бара турар диэн суруйаллар. Холобур, ити ньиэптээх Илиҥҥи дойдулары тоҕо америкалар ыһаллара биллэр – Ислам дойдулара былыр-былыргыттан Израили кытары өстөһөллөр. Онон еврейдэр кинилэр ньиэптэрин хайдах да хонтуруоллуур кыахтара суох. Онтон матаннар, дьэ бу Россия еврейдэрин, еврей хааннаахтарын үбүлээн, олигарх оҥортооннор ньиэби-гааһы атыылаһыннардахтара эбээт.
Саха сирин гааһа, ньиэбэ син биир ол былаанынан ылыллыбыт буолан тахсар. Ол онно Максимов, атын да сахалар туох да быһаарар, кэпсэтэр оруоллара букатын суох. Кыра-хара омук кыра-хара дьоно буоллахпыт. Субъект баһылыгынан - Штыровынан барыта ити дьыала быдан үөһэнэн оҥоһуллубутун туһунан сыалай кинигэ таҕыста. Оттон ити кинигэ автора төбөтүттэн ылан дуу, түһээн дуу итини суруйбатаҕа биллэр. Информацияны түүннэри билэ-көрө сытар уорганнар таһаартарбыттара сэрэйиллэр. Ол аата Штыров республикаттан “аҕата ыалдьан” президениттэн уурайан барбыт дьыалата буолбатах – кимэ-туга, кимниин куомуннаспыта биллэн барарга күһэлиннэҕэ.
Бу маннык улахан омуктар киирсиилэригэр Максимов өҥөтө диэн тугуй? Кини өҥөтө – кыра норуотун санаатын бөҕөргөппүтүгэр сытар. Аан дойдуну талбыттарынан айбардыыр улахан омуктартан чаҕыйбакка, кинилэр диэтэх дьону утары барбытыгар сытар! Дьэ, итинтэ баҕас олох хорсун быһыы! Саха ньоҕой, оҕото өссө ньоҕой дииллэринии, тоҕус сылы быһа ньоҕойдоһон туран, тостубакка утарылаһа сылдьара хорсун быһыы буолла. Ол иһин дьон-норуот Афанасийы сөбүлүүр. Ол кини “сиэбитэ-аһаабыта” , үлэлээбитэ дуу, үлэлээбэтэҕэ дуу олох оруолу оонньообот – кини адьырҕа омуктардыын утарыласпыта ол кылаабынай кылаата. Онон бүттэ.
Билигин сир баайын хостуурга кыттыһыан баҕарар саха уолаттарыгар Афанасий хорсун, балабыай быһыыта элбэх санааны иҥэриэн сөп - төрөөбүт дойдуга ХАҺААЙЫН буоларга дьулуһууну.
***
Онон, ити Иракка, Ливияҕа, Ираҥҥа, Афганистаҥҥа, Сирияҕа бара турар сэрии төрүөтэ - Саха сиригэр быһаччы сыһыаннааҕын умнумуохха наада. Ислам дойдулара бэйэлэрэ – “бензаколонкалаахтар”, еврейдэр - туспа.
Саха сирин гааһын-ньиэбин чуҥнуу бастаан утаа туроктар эмиэ сыбыытаабыттара диэххэ сөп.
Холобур, Дьокуускайга араас омуктар кэлэн оскуола аһар идэлэнэ сылдьыбыттара. Бу маннык дьаһаныы – бэйэ култууратын, сыаннаһын соҥнооһун,тэнитии буолар: сыыйа-баайа бэйэҥ култуураҕар оҕолору кыра саастарыттан чугаһатаҕын, иитэҕин. Били, Орда кыаҕын нуучча наложницалара өһүлбүттэрэ дииллэринии, ким оҕоҕо чугас, ким оҕону иитэр – ол кэскили түстүүр. Оҕоҕо ханнык сыаннаһы иҥэрэҕин да оннук сыаннастаах киһи үүнэн тахсар. Ол иһин омуктар оскуолаларга харчы бөҕө куталлара, учууталлыы кэлэллэрэ. Онтон эмискэ ити оскуолалар сабыллан хаалбыттара.
Туроктар “бырааттыы түүр” омуктарыгар сахаларга эмиэ сыбыытаан бөҕө. Түүр түмсүүтэ, Курултай, конгресс дии-дии сүүрэкэлээбит, бөрө тириитэ иилинэ-иилинэ “Хаан тардыыта” дии-дии сырыы бөҕөтө сылдьыбыт дьоннордоохпут. Саха-Анатолийскай колледж аһыллан саха уолаттарын ылан үөрэппиттэрэ, ыччаттарбытын Гази аатынан университекка Анкараҕа таспыттара.
Син биир АХШ Госдеп ньыматынан исламистар эмиэ үлэлэрин - оҕоттон, ыччаттан саҕалаабыттара, биллэр дьону кытары “культурнай сибээс” олохтообуттара, предпринимателлэри кучуйбуттара, артыыстары ыҥырбыттара. “Дом торговли” эргиэн киинин бастакы этээһигэр турецкай дубленка бөҕөтүн аҕалан симэн кэбиспиттэрэ уонна бэйэтин да сыанатааҕар чэпчэкитик атыылаабыттара. Тоҕо? Сүрүн сыалларын саптынаары.
Онтон көрдөхтөрө-иһиттэхтэрэ буолуо, сахалар сайдыыта, туох да политикаҕа, экономикаҕа дьайар кыахпыт суоҕун уонна төттөрү тыас хомуммуттара. Онтулара да эмиэ үчүгэй. Онно кыттыспыппыт буоллар, бу сэриилэртэн сылтаан, татаардар курдук хайыыбытыттан ылларыах этибит.
Үөрэхтээһин салаатыгар бэрээдэктиир үлэ барыыта - эмиэ бу дойду идеологиятын бэрээдэктиир үлэ биир тиһигэ буолар. Ити саҥа концепцияны “Аартык.ру” экспертэргэ биэрэн ырыттаран, үөрэттэрэн көрүөҕэ. Шамаев этэрин курдук сатахха туохтан “өлөрбүтүн” билиэхпит.
Кистэл буолбатах, Россия үөрэҕин таһыма олус түстэ. Ыччаппыт билиитэ-көрүүтэ суоҕа киһини сөхтөрөр. Барыта проамериканскай акаарытыҥы аҥала оҕолору иитии бара турар. Дьиҥнээх олохтон тэйбит халлааны таһыйа сылдьар үөрэхтээхпит.
Американскай үөрэхтээһин стандарта – потребителлэри иитии. Толкуйдуур, бэйэтин санаатын этинэр киһини ииппэт, көрүнньүгү сырсар киһини – шоумены иитэн таһаарар. Билигин учуутал да, оҕо да сертификат, диплом, кумааҕы туһугар үөрэтэр, үөрэнэр. Тоҕо диэтэххэ, үөрэхтээһин систиэмэтэ бэйэтэ оннугу ирдиир.
"Сахатытыы" диибит да сахалыы тылбаастаммыт учебниктары ити айдаарар политиктар ылан көрүҥ эрэ. Бу саха оҕотун саха тылыттан тэйитии диверсиятын курдук оҥоһуллубут учебниктар.
Аныгы төрөппүт буолуохтааҕар, саастаах төрөппүт даҕаны өйдөөбөт гына тылбаастаммыт учебниктар. Холобур: үһүөнньүк, остуолбук, бөгүүрэ, аһыыба, солунньах, чэрчил, тэҥнэһимии, төрдүөнньүк... Физикаҕа, геометрияҕа, химияҕа туох баарын айбыт ааптар бэйэтэ эрэ өйдөөн эрдэҕэ. Оттон киһилии – үс муннук диэтэххэ тоҕо табыллыбатый? Бу маннык “–ынньыктыы” сылдьыбыт оҕо нууччалыы тылынан ЕГЭни хайдах туттарар? Барыта ЕГЭ түмүгүттэн олоҕо быһаарыллар буоллаҕына? Хас оҕо ити кутталтан бэйэтин олоҕун быһынна?!
Тиһэҕэр маннык учебниктарынан үөрэммит саха оҕото нууччалыы да, сахалыы да билбэт биоробот буолан тахсар. Иван Шамаев үөрэх систиэмэтигэр хас сыл үлэлээтэ? Тоҕо бу сахалыы учебниктар тылбаастарыгар үлэлэспэтэ, санаатын эппэтэ? Аны ити утарбыт химиятын собуотун оннугар тоҕо бэйэ – саха дьоно толкуйдаабыт, үлэлиир кыахтаах “Базальт. Саҥа технологията” ТОР проегын, сир-буор аннынан буолбакка, аһаҕастык, дорҕоонноохтук кэмигэр өйөөбөтө? Егор Жирков проега ТОРга киирбэтэҕин эрэ кэннэ биирдэ кэлэн “наадалаах проект” диэн симиктик эттэ? Оттон баары баарынан, хара маҥнайгыттан албаһырбакка “Заречье” оннугар “Базальты” өйүөххэ диэн дьону хамсатыах этэ буоллаҕа.
Норуот көнө, ол эһиги эргитиилээх-урбатыылаах политическэй оонньуугутун өйдөөбөт. Көнөтүк, аһаҕастык этиэх этигит. Билигин ол собуот да мэлигир, базальт да сыта суох. Икки куобаҕы сырсан биирин да туттарбатыгыт.
Саха норуота - дьадаҥы омук. Ити үөһэ ахтыллыбыт политиктар - Иван Шамаев да, Афанасий Максимов да бэйэлэрин оннуларын политика эйгэтигэр булан сылдьаллар. Сахалар саатар итинник эйгэҕэ, бэйэ испитигэр, дьонноох буолуоххайыҥ. Хайдах эргиччи туга да, кима да суох олоруохпутуй. Эһигини бары сыаналыыбыт, билинэбит. Ол гынан баран наһаалаамаҥ! Дьон олоҕунан оонньуургутун тохтотуҥ, норуоккутун оннук-маннык угаайыга укпакка, арыый уһуну-киэҥи толкуйдааҥ, табаарыс политиктар!
***
Aartyk.Ru
Комментарии
Хайа ба5арар омукка кини курдук дьон олус наада.
Нууччалыы эттэххэ, кини - индикатор, сигнализатор опасности.
Оннук устройстволар шахталарга, самолеттарга, аныгы массыыналарга энин булгу баар буолуохтаахтар.
Туох эмэ куттал суоЬуон себун эрдэттэн сибикилиир, тууйэр, таайар, турулуен тардар индикатордара суох омук алдьархай кэлбитин хойутаан ейдуур, бабат диир, соро5ор эстэр.
Троя5а оннук индикатордар бааллара - Кассандра уонна Лаокоон, олору истибэтэхтэрэ, саба санарбыттара, ол тумугэр Трояны сэриилээн ылан кул-кемер онорбуттара.
Ол Троя кэбин кэппэт туЬугар Самаайап курдук итинник хорсуннук туохтан дьаахханарын, туохтан сэрэнэрин этэр-тыынар, туруорсар киЬилээхпит - ол биЬиги омукка олус туЬалаа5ын ейдуе этибит...
Ким эрэ кигиитинэн суруйбутун, атыыламмытын натурально кесте сылдьар дии. Кыбыстыбаккын дуо? Харчыга биирдэ атыыланыахха сеп, потом не отмоешься!
собирая вокруг себя простой народ.
обычно такие дела кончаются плачевно!
"Кыра-хара омук кыра-хара дьоно" - бу бүтүн омугу сэнээһин! Сахалыы суруйбут саха буолуо, хайалара бэйэтин сэнэнэ олороруй?
Ааптар аатын тоҕо суруйбата???
Табаарыьа Егор Жирковка утуену оноробун диэн тёттёру онордо. Ити биллэр. Тута базальты ёйуёххэ диэбитэ буоллар ордук хотуулаах буолуо этэ.
Ис натура5ын дьэ кердербуккун. "Э5эрдэлиибит".
Источник: aartyk.ru . Угаайыга киллэрэр элбэх ахсааннаах, сайдыылаах, баай омугу сахалар сырсан тугу да туьамматтар. Сделают крайними. Ейдеехтук киирсиэххэ наада а не тупо в лоб идти.
Кенетунэн эттэххэ татардарын килиэккэ5э хаайыллыбыт хаар барса буоллахтара, биьиги инкубатор куурусса5а кубулуйан бутэн эрэр хотой курдукпут.
киьи эрэммэт, итэгэйбэт. Биьиги борустуой дьон, хаьан багарар Иван Шамаев курдук дьону быдан ордоробут. Кини сыыьар да буоллагына, элбэх киьини толкуйдатар, уьугуннарар, онтон ырытыллан,дьиц чахчы кырдьык тахсар. Кини ким да кэннигэр саспат, дьицнээх туруулаьааччы, кырдьык иьин охсуьааччы буолар.