Санатар эбит буоллахха, Максимов, Чикачев уонна Пахомов көҥүллэрин туруорсар Аһаҕас сурук СМИгэ, интернеккэ тахсыбыта. Илии баттааһыны тэрилтэлэринэн, дьиэлэринэн сылдьан хомуйбаттар. Баҕалаах дьон бэйэлэрэ кэлэн илии баттыыллар. Бэчээккэ Аһаҕас сурук тахсаатын кытары офиска олус элбэх киһи улуустартан эрийэн сууттаммыт дьону өйүүллэрин биллэрбиттэр. Билигин даҕаны тиһиги быспакка күн аайы дьон офиска кэлэ турар диэн этэллэр. Ол иһин «ыстаапка» дьуһуурустуба тэриллибит.

Көҕүлүүр бөлөх этэринэн, Афанасий Максимовы уонна кини биир идэлээхтэрин өйөөн ордук эдэр дьон - эдэр специалистар, устудьуоннар кэлэллэр эбит. Кинилэр дьокутаат Афанасий Максимов көнө сүнньүлээҕин, дьон туһугар элбэҕи оҥорбутун, оҥорор кыахтааҕын, соруйан сойуолаһан туран киһини хаайары утаран кэллибит дииллэр.

Саамай элбэх илии баттааһын Дьокуускайтан, Тааттаттан, Чурапчыттан, Горнайтан, Бүлүү улуустарыттан киирбит. Ону сэргэ Амма, Өймөкөөн, Мэҥэ Хаҥалас, Үөһээ Дьааҥы, Ленскэй улуустар олохтоохторо илии баттааһыны хомуйбуттар.

Тоһоҕолоон бэлиэтээтэххэ, Афанасий Максимовы, Игорь Чикачевы уонна Игорь Пахомовы өйүүр илии баттааһын билигин даҕаны түмүктэнэ илик.