Егор БОРИСОВ республика олохтоохторугар туһаайан  ыҥырыы таһаарда: биир сүбэнэн-соргунан, этии киллэрэн, ырытыһан-дьүүллэһэн  бу сокуону түмсэн оҥоруоххайыҥ диэн.

Тыа хаһаайыстыбата биһиэхэ – көннөрү экономика салаата эрэ буолбатах. Бу, биһиги, – төрүт олохпут, омук быһыытынан өйбүт-санаабыт, аан дойдуну анаарыыбыт, майгыбыт-сигилибит, сиэрбит-туоммут силистэнэн-мутуктанан, тирэнэн-чиргэллэнэн тахсыбыт эйгэтэ. Ол ону өйдүүр буолан Егор Афанасьевич, атын ханнык да саҥа суруллар сокуоннартан ойуччу тутан, бары сүбэнэн сокуон оҥорорбутугар  ыҥырда.  Биһигиттэн ураты биһиги бырааппытын көмүскүүр, олохпутун оҥорор сокуону - ким да, хаһан да оҥорон биэриэ суоҕа. Саха олоҕун - саха оҥорор эрэ кыахтаах.

-       Ханнык да бэйэлээх сокуон 100 бырыһыан санаа хоту уһулуччу буолар кыаҕа суох. Ол иһин, хайа кыалларынан, сокуон туһата улааттын диэн, элбэх киһи санаатын этэригэр ыҥырабын, - диэн кини норуотугар илдьиттээтэ.

Саха сирэ промышленнай сайдыы боруогун атыллаан эрэр. Сир-уот, олох-дьаһах балысханнык уларыйаары турарын бит-билгэ кэрэһэлиирин ааһан, илэ олох көрдөрөн эрэр. Онон, субу билигин – улахан уларыйыылар ааннара дэлэйдик аһыллыан иннинэ, өлүмнэһэн, хайыҥ охсунан тыабыт сирин олоҕун, экономикатын, социальнай сайдыытын – сокуонунан күрүөлээн-хаһаалаан, араҥаччылаан, тула өттүттэн төгүрүччү көмүскээн ылыахтаахпыт.

Бу сокуон хайдах оҥоһулларыттан, ылылларыттан бүтүн норуот дьылҕата тутулуктаах. Төһө элбэх киһи сүбэтин холбуур да, соччонон дьайыылаах сокуон буолуоҕа. Сокуон хайдах сурулларыттан - кэнэҕэс сайдыыбыт түөрэҕэ хайа диэки хайыһара быһаччы тутулуктаах. Ол иһин, сокуон оҥоһуутун кураанах, быстах куолуга кубулуппакка, албын-түөкүн угаайы оҥостубакка, норуот инники дьылҕатыгар барытыгар дьайарын бары  дьэҥкэтик өйдөөн, ис-хаан сүҥкэн эппиэтинэстээхтик, дьоһуннаахтык сыһыаннаһан, түмсэн үлэлэһиэхтээхпит. Кэнчээри ыччаппыт туһугар мээнэ тылбай-өспөй кыккыраччы тохтуохтаах, атааннаһыы уурайыахтаах. Кэпсэтии, этии барыта сүнньүннэн, олохтоохтук уонна оруннаахтык барыахтаах.  

Сокуон – быстах кэми хаппат, уһун болдьохтоох буолуохтаах диэн Ил Дархан этэр уонна улуус, нэһилиэк баһылыктара, тэрилтэ салайааччылара бу ыҥырыыны ылынан,  дьоннорун-сэргэлэрин кытары сокуон барылын дьүүллэһиэхтээхтэр.  

Егор БОРИСОВ ыҥырыытыгар эппитинэн, тыа хаһаайыстыбатын сайдыытыгар анаммыт сокун барылын тиһэх тиэкиһин Ил Түмэн алтынньыга көрүөхтээх. Эһиил сокуон олоххо киирэр механизмнара толкуйданыахтаахтар.

***

Владислав ТАКЫРОВ,

“Аартыкка” анаан.
 Докумуон барыла -http://www.egorborisov.ru/obraschenija-prezidenta/4216-obraschenie-glavy-rsja.html