Тумууһаптар саамай тумус тутталлара - ааспыт сыл бүтэһигэр Ил Түмэн мунньаҕар сүөһү төбөтүгэр көрүллэр 10 000 солк. субсидия туһунан сокуоҥҥа уларытыы киирэ сыспытын "тохтоппуттара"  буолар.
Санатар эбит буоллахха, правительство уонна тыа хаһаайыстыбатын министиэристибэтэ көҕүлээн сокуоҥҥа уларытыы киллэрэ сатаабыттара: 10 000 көмө харчыны биэстэн элбэх ыанар ынахтаах дьоҥҥо эрэ биэриэххэ диэн. Ону Алексей ЕРЕМЕЕВ (ЕР) салалталаах парламент сис кэмитиэтэ утаран, сокуоҥҥа уларытыы киллэримиэххэ диэн этэн сокуон уруккутунан хаалбыта. Ити сокуоҥҥа уларытыыны утарбыт депутаттартан биирдэстэрэ "эсер" Василий  ТИМОФЕЕВ этэ.
"СР"-дар билигин тыа дьонугар "бу сокуону оннунан хаалларбыт биһиги эрэ" диэн түөстэрин тиҥиргэтинэллэр. Дьиҥ иһигэр киирдэххэ, кинилэр эрэ бу сокуоҥҥа уларытыыны утарбатахтара, ахсааннара да аҕыйаҕынан улахан уларытыыны парламеҥҥа оҥорор кыахтара суох. Депутаттар бары көмөлөөн утаран субсидия харчыта оннунан хаалбыта. 
"Тыа дьонугар тоҕо "эсердэр" билигин сыҥалана сылдьалларый?" - диэн тоҕоостоох ыйытыы үөскүүр. Ол төрүөтэ аны күһүҥҥү Ил Дархан быыбара.  ТУМУУҺАП саллааттарын тыаҕа ыыталаан, тыа дьонун санаатын сүүйэн бэйэтигэр "ыйааһын" эбинэр.  Төһө "ыйааһыннаах", "былчыҥнаах" да соччонон торгуйдаһар сыаната улаатар.
Оттон ТУМУУҺАП билиҥҥи сыала-соруга тугуй? ГОСДУМА депутатын мандата. Сөдүөт Сэмэнэбис өссө да үһүс төгүлүн Москваҕа барыан баҕарар. Кини Ил Дархан быыбарыгар кыайаары буолбакка, үһүс болдьох Госдума депутатынан барарыгар олохтоох былаас мэһэйдэспэтин торгуйдаһар санаалаах. 
***
Аартык.ру