Билигин аан дойдуга саамай биллибит Apple хампаанньатын iPhone төлөпүөннээх, iPad планшеттаах дьон AppStore киирэн, электроннай кинигэ хачайдыыр кыахтаннылар. Бастакы сонун бырайыагынан ити платформаҕа «Биэбэйчээннэрим» диэн оҕолорго аналлаах кинигэ таҕыста. Оҕо сенсоры тарбаҕынан баттаатаҕына, анимационнай ойуу көстөр, диктор ис киирбэх куолаһа хоһоон ааҕан биэрэр. Электроннай кинигэ остуоруйа кэпсиир, оҕону дьарыктыыр, аралдьытар, саататар нээньэни да солбуйар. Бастакы туһанааччылар бу саҥа сүүрээни үрдүктүк сыаналаатылар уонна тус санааларын маннык үллэстэллэр: ааптар Ykt1233 электроннай кинигэни өр күүттүм диэн суруйар, лайк туруорар уонна еPub, PDF форматы күүтэрин, iBooks хачайдыан баҕарарын биллэрэр. Gennady Higelman: «Бэрт хоһоон, чаҕылхай ойуу, сэргэх куолас, кыыһым олус сөбүлээтэ, онон оҥорон таһаарааччыларга махтанабыт, өссө да саҥаны күүтэбит!» Winfact 1993 туйгуннук сыаналаан, биэс сулуһу кэчигирэччи туруоран кэбистэ.

AppStore баар электроннай кинигэ бастаан утаа босхо хачайданар, онон, кытаатыҥ, киириҥ, ааҕыҥ, сэргээҥ, сыаналааҥ! Инникитин Android платформаҕа смартфоннарга барыларыгар электроннай кинигэни киллэрэр былаан баар, оччоҕо PlayMarket киирэн, ким баҕарар сахалыы электроннай кинигэлэри ааҕар кыахтаныа. 
***

Марианна ТЫРТЫКОВА.