Олоҥхоҕо хоһулларын курдук былыр былыргыттан саха дьонугар кус быһый, ат бөҕө, кэтит сарыннаах, быыппастар былчыҥнаах, халыҥ харылаах, суон сотолоох баараҕай бухатыыр көрүҥнээх эр бэртэрэ бааллара, билигин да бааллар. Саха биллииллээх прозаига Василий Васильевич Скрябин – Идэлги Мэҥэ-Хаҥалас улууһун историятын иҥэн-тоҥон үөрэппитэ, архивтарга хараллан сытар докумуоннары, фольклор хомуурдарын чинчийбитэ. Ол түмүгэр «Мэҥэ бэртэрэ» диэн Саха сирин спордун историятын интэриэһиргээччилэргэ бэртээхэй кинигэ таҕыста. Бу кинигэҕэ Мэҥэлэр аатырбыт күүстээх, кыахтаах, быһый дьонун туһунан элбэҕи билиэххит.

Үргэл «Иккиэйэҕин үчүгэй да этэ» кинигэтигэр эбэҥки киһитэ сирдьиттээх геологтар мүччүргэннээх сырыылара ойууланар. Араас соһуччу түгэннэр, быһылааннар, дьахтардаах эр киһи истиҥ, таайтарыылаах сыһыаннара, хотугу сир хатыламмат айылҕата уус-ураннык дьүһүйүллэн ааҕааччы болҕомтотун тардыаҕа.

Үгүс сыл оҕону иитиигэ үлэлээбит детсад иитээччилэрэ Клавдия Васильева, Анна Алексеева «Кэнчээри» диэн кинигэҕэ 5-6 саастаах оҕо болҕомтотун, толкуйдуур дьоҕурун, дорҕоону чуолкайдык саҥарар үөрүйэҕин сайыннарыыга аналлаах айымньылары таҥан киллэрдилэр. Кинигэ 19 теманан таҕыста. Айымньылары иитээччи үлэтигэр, төрөппүт оҕотун тылын эрчийэригэр туһаныан сөп. Бу хомуурунньукка оҕону дьарыктыырга хоһооннор, кэпсээннэр, сценарийдар, ырыалар киирдилэр. 

Саамай кырачааннарага анаан Кэчиимэ «Чээн, сибэкки!» оскуолаҕа киириэн иннинээҕи саастаах оҕолорго дьэрэкээн ойуулардаах, дьоҕус кинигэ таҕыста. Манна кырачааннар сибэккилэр тустарынан тэттик хоһооннору нойосуус үөрэтэн, тылларын сайыннарыахтара, айылҕаны харыстыырга үөрэниэхтэрэ.  

 

    «Бичик» кыһа кинигэлэрин ааҕыҥ, сэргээҥ, доҕор оҥостуҥ!
***

Марианна Тыртыкова