Былыр былыргыттан биһиги өбүгэлэрбит таҥаһы, тириини, түүлээҕи илиинэн тигэллэрэ, өссө оҕуруонан дьэрэкээн оһуор таһааран, киэргэтэн-симээн биэрэллэрэ. Билигин дьон үксэ маҕаһыынтан бэлэм таҥаһы ылан таҥнар. Ол эрэн, кэлиҥҥи кэмҥэ ыһыахха көрдөххө, сахалыы таҥаһы кэтээччи биллэ элбээбит. Өбүгэ үйэлэр тухары муспут сүдү баайын сүрэҕэр-быарыгар иҥэрэ сылдьар, талыы талба Тааттаттан төрүттээх норуот маастара Анна Акимова «Төрүт иис кистэлэҥнэрэ» диэн чаҕылхай хаартыскалардаах кинигэтигэр саха таҥаһын хайдах тигэргэ, киэргэллэрин оҥорорго үөрэтэр. Бу кинигэҕэ баар таҥас киэптэрин туһанан, сатаабат да киһи иистэниэн сөп.  

«Уран тыл уустара» сериянан Степан Федотов «Ыһыах түүн» сэһэннэр, кэпсээннэр кинигэтэ таҕыста. Олох кырдьыгын уус-ураннык ойуулуур ааптар айымньыларыгар оҕо саас ахтылҕана, сэрии ыар сыллара, ол кэннинээҕи уустук кэм, олох уонна таптал кэрэхсэбиллээхтик кэпсэнэллэр.

Михаил Попов «Бытыылкалаах харчы» бу детективнэй сэһэҥҥэ эргиэн эйгэтигэр тахсыбыт эриирдээх дьыаланы эдэр силиэдэбэтэл кыыска биэрэллэр. Киһилии сиэр-майгы диэни умнубут дьон кинини холуннаран, аатын-суолун киртитэ сатыыллар. Оттон Октябрина сүрүн сыала-соруга – уоруллубут харчыны булуу. Кини оҕо эрдэҕиттэн билэр ыалын утары силиэстийэни тиһэҕэр тиэрдиэ дуо?

Алын кылаас оҕолоругар «Бииргэ ааҕабыт» сериянан «Ыллык» таҕыста. Манна суруйааччылар оҕолорго аналлаах кылгас кэпсээннэрэ, хоһоонноро, остуоруйалара киирдилэр, маны таһынан оҕолор бэйэлэрин суруйуулара эмиэ тиһилиннэ. Кинигэ оҕо ааҕар дьоҕура сайдарыгар, билиитэ-көрүүтэ кэҥииригэр төһүү күүс буолуо.

Екатерина Чехордуна «Чэгиэн-чэбдик буолуохха» сериянан алын кылаас оҕолоругар «Чөл хайа кистэлэҥнэрэ» кинигэтэ күн сирин көрдө. Манна ойуур кыылларын, хамсыыр харамайдарын холобуругар ааптар оҕону чэгиэн-чэбдик, чэнчис буоларга, үөрэ-көтө сылдьарга, төрөппүт тылын истэргэ, дьоҥҥо үтүөнү оҥорорго, айылҕа сокуонун тутуһарга үөрэтэр. Остуоруйа алыптаах дойдутун курдук кинигэ дьэрэкээн ойуута-бичигэ хайа баҕарар оҕо болҕомтотун тардыаҕа.   

Орто уонна улахан кылаас оҕолоругар «Барыта бэйэҕиттэн тутулуктаах» диэн Александра Сидорова кинигэтэ күн сирин көрдө. Оҕо 12-13-гэр майгыта тосту уларыйар, муода диэн тас сабыдыалга түргэнник ылларар, баттаҕын от күөҕэ өҥүнэн кырааскалаан дьонун соһутар, муннун үүтүгэр, киинигэр ытарҕа кэтэ сатыыр, этигэр ол-бу тату оҥотторор, табаҕы, арыгыны барытын бэйэтэ амсайан көрүөн баҕарар дьикти сааһыгар үктэнэр. Бу кэмҥэ сиэр-майгы туһунан толкуйдатар, буортулаах дьаллыктартан сэрэтэр, үчүгэйи куһаҕантан араара үөрэтэр, кэнчээри ыччаппытын сөпкө иитэргэ сүбэлиир ис хоһоонноох «Кэскил» хаһыат суруналыыһа араас сылларга суруйбут ыстатыйалара бу кинигэҕэ киирдилэр.

 

  ***

   Марианна Тыртыкова