Сахабыт дьоно сомоҕолоһон биһиги кыһалҕабытын өйдөөн, «Урааҥхай» диэн ыччат дьон түмсүүтэ Дьокуускайтан кэлэн бэс ыйын 1 күнүгэр, Оҕо көмүскэлин күнүгэр, субуотунньук тэрийдилэр. Бырааһынньык буолуохтааҕар — ардаҕы билиммэккэ күргүөмнээхи үлэ, көхтөөх субуотунньук буолла. «Урааҥхайдар» түмсүүлэрин салайааччылара — Дьокуускай куорат мэриятын Гагаринскай уокуругун баһылыгын солбуйааччыта Петр АНДРЕЕВ, суруйар идэлээх талааннаах икки кинигэ ааптара Тургун ПОПОВ барыта 25 киһи буоланнар үлэлиир, үөрэнэр ыччаттар, спортсменнар, саха туйгуннара, ол иһигэр эстрада сулуһа Лэгэнтэй уонна СӨ Уопсастыбаннай палаататын чилиэнэ, «Сомоҕолоһуу» хамсааһынтан Валерий ЛУКОВЦЕВ кэлэннэр үлэлээн: элбэх мебели, араас малы, хаптаһыны тиэйэн ыскылаакка тастылар, детсад уһаайбатын ыраастаатылар. Ону таһынан оҕолорго гуманитарнай көмө  аҕаллылар.

Уопсастыбаннай түмсүүлэр бу тахсыыларыгар «Үөкүйэ», ИП «Аква VS»   тэрилтэтиттэн Константин Семенович Макаров, Станислав Иванович Сивцев, «АлмазкредитСервис» тэрилтэтиттэн Анатолий Никитич Харитонов уонна Монреаллааҕы олимпиада аатырбыт үрүҥ көмүс призера Александр Николаевич Иванов өйөбүл, көмө оҥорбуттар. С.А.Новгородов аатынан «Бичик» национальнай кинигэ кыһата нэһилиэк, оскуола библиотекаларыгар уонна оҕо саадыгар кинигэ биэриэхтээх.

Биһиги нэһилиэк олохтоохторо, Үөдэй нэһилиэгин баһылыга Ядреев С.В., «Чуораанчык» оҕо саадын сэбиэдиссэйэ Черноградская Ю.Ю., тирэх хаһаайыстыба салайааччыта Шестаков И.Н., профсоюзнай бэрэссэдээтэл Саввина М.И., үлэһиттэр Эверстова Н.В., Афанасьева Т.Н., Винокурова Л.Д., Посельская М.В., Андреева А.Д., Зырянова Н.А., Иванова В.В., Зырянова М.Д., Яковлева С.Д., Эверстова Г.М., Колесова Н.В., Эверстова К.Н., Николаева А.Д., уо.д.а. ыарахан кэмҥэ күүс-көмө буолбуккутугар улахан махталларын тиэрдэбит. Тус бэйэҕитигэр дьолу-соргуну, сахалыы уруйу баҕарабыт.