Ол эрээри бу күн документальнай киинэ көһүннэ – «Танда - Өбүгэ ситимэ» диэн.  Киинэ ааптара – Иннокентий Иннокентьевич Готовцев,  өр сылларга Саха сирин киинэтин салаатын салайбыт киһи, билигин «Дабай» студия салайааччыта.

Саха киһитэ арҕаһыттан тэһииннээх диэни мин маннык өйдүүбүн: ханна да сырыттар, төһө да ыраах сырыттар саха дойдутун кытары ыкса ситимнээх. Ол ситим – дойду ахтылҕана – баарын Иннокентий Готовцев киинэтин көрө кэлбит, тобус толору саал туоһулуур.

Уус-Алдан Байаҕантайа – сахалар былыргыттан олохсуйбут, ууһаан-үөскээн олорбут ытык кэрэ сирдэрэ. Танда үрэх Байаҕантай, Тиит –Арыы,  Бээрийэ уонна Түүлээх нэһилиэктэрин ситимниир. Инньэ гынан былыр үс улуус – Байаҕантай,Бороҕон, Дүпсүн – Тандаттан тардыылаахпыт дэһэллэр эбит. Ол эрэн  бу Танда  сэлиэнньэтэ эрэ, үрэх анал аатынан ааттаммыт.

Иннокентий Готовцев киинэтин тухары Танда үрэх, үйэлэр, көлүөнэлэр тыыннаах ситимнэрэ буолан устар.

Тандалар киэн туттар дьонноро, таптыыр сирдэрэ, ытыктыыр үрэхтэрэ – бу киинэгэ биир оһуор буолан, дьон сүрэҕин көрбүтүнэн киирдэ.

Онон доҕорбун Иннокентий Иннокентьевиһы табыллыбыт үлэтинэн эҕэрдэлээн туран, аны Сахабыт сирин киэҥ уорҕатыгар тэнийэ сытар Үс Байаҕантай туһунан киинэтин салгыырын баҕарабын.