Ыам ыйа 9 сынньалаҥ күнэ уонна "Аартык.ру" ыйытыга

Вторник, 23 Апреля 2013 23:16
Оцените материал
(2 голосов)
Орто туруу дойдуга күрүлэс күн ыймахтаах Ыам ыйа кэлэн иһэр. Саас! Сүрэх эппэҥниир, санаа көнньүөрэр, олох суугунуур, айылҕа тыыллаҥныыр. Тула өттүм тула күөх!

Сааскы бырааһынньыктарга толору 9 күн сылаабытын таһаарыахпыт ини дуу - 1 Маай бырааһынньыга сэрэдэҕэ түбэһэр буолан, субуруччу 5 күн сынньанабыт. Онтон ыам ыйын 6, 7 уонна 8 күннэрэ тиийэн кэлэллэр. Син сүөдэҥнэһэн үлэлиир дьон үлэлэригэр тахсыахтаахтар. Өрөгөйдөөх Кыайыы күнэ чэппиэргэ түбэстэ. Онон эмиэ субуруччу 9, 10, 11, 12 чыыһылаларга өрүүбүт. Дьэ, онтон сатамматах сыыппараҕа - 13 чыыһылаҕа үлэлии тахсабыт.
***
Ыраата барбакка "Аартык.ру" аара ааһан иһэр дьонтон бачча айылаах күҥҥэ ким тугунан дьарыктанар былааннааҕын ыйыталаста.
Милена уонна Гоша, оскуола оҕолоро, 9-10 кылаастар:
- Дьоҕотторбутун кытары айылҕаҕа шашлыктыы тахсабыт.
- 9 күнү быһа туох этэ эт буолар?
- Бастаан кылааһынан, онтон компаниянан, онтон төрүттэрбитин уонна аймахтарбытын кытары даачаҕа тахсан шашлыктыыбыт. Эти маҕаһыынтан ылыахпыт! Маҕаһыын эрэ элбэх.

Лена СОЛОВЬЕВА, орто саастаах, бюджет үлэһитэ:
- Таҥас сууйуом, түннүктэрбин сотуом... дьиэбин бэрийиэм...
- 9 күнү быһа?
- һэ-һэ, ол быыһыгар дьүөгэлэрбэр ыалдьыттыам.
- Дачаҕа тахсыбаккын?
- Дачам суох ээ. Өрүс уҥуор барыахпын сырыыта эрэйэ бэрт. Муоста хаһан тутуллара буолла, ээ?
- Ити ыйытыы риторическэй буолбута ыраатта, доҕор.

Лев МАЛЫШЕВ, урбаанньыт:
- Кустуу барабын!
- Эрдэтин дуу?
- Эс! Дьон көрбүттэрэ ыраатта!
- Дьууппалаах куһу бутуйдуҥ ини...
- Өлүөхүмэҕэ өссө 12-скэ ыппыттара.
- Дьууппалаах кустар төгүрүк сыл ыталлар...
-
 Кустуу диибин ээ, кыыстыы буолбатах. Ол гынан баран кыыстыы да барар бэрт буоллаҕа! - салбанар.

Надежда НИКОНОРОВА, пенсионер:
- Ээ, ханна барыахпыный. Дьиэҕэ олорор буоллаҕым. Оҕолор күүлэйдии барыахтара, сиэннэрбин көрүөм. Биир эмэ күн оһуохайга ыыталлар ини... Парадтыахпыт. Дачаҕа тахса сылдьыахпыт. Күн сылааһа абырала бөҕөтө.
- Рассада үүннэрдиҥ ини?
- Үүннэрэн турабын да, хайдах эрэ нуоҕай баҕайы. Биэрэспин мыына сылдьабын. Хайдах эрэ сиэмэ түбэспит. Оҕонньорбор этэ сатыыбын да, кыһаммат. Онон сиэмэ айдаана.

Павел СЕМЕНОВ, ырыаһыт буолбатах, устудьуон:
- Эт хаарыйан сиэхпит! Таптыыр кыыспын кытары күүлэйдиэм. Утуйуом.
- ?
- Суох-суох, боруоста утуйуом диибин... Көннөрү утуйабын! Соҕотоҕун... Кыыспынаан буолбатах... Суох, кыыспынаан утуйуохпун сөп. Оттон утуйан кэллэҕим дии... короче, киһини үнтү бутуйдуҥ. Секса суох... утуйабын...
- ?!
- Суох оттон секс баар, только ити күннэргэ бэйэм утуйабын, һа-һа, чэ айака! Ыйытан бүт!
- ?...
 
Виолетта ВАСИЛЬЕВА, дьиэ хаһаайката:
- Наһаа өр  сынньалаҥҥа тугу гыныахпыный? Ханна эрэ барыахпын баҕарабын, дьиэ кэргэнинэн.
- Ханна?
- Мааҕыын СМС кэлбитэ, Анталияҕа чартер көтөр диэн. 54 тыһыынча диэн этэ. Икки киһиэхэ бэрт дии. 
- 9 күҥҥэ 54 тыһыынчаны "бэрт" диир дьиэ хаһаайката дьоллоох дьахтар буолуо.
- Оччолооҕу барыыр инибит... Баран муораҕа сөтүөлээн кэлиэхпит этэ. Бырааһынньыкка эрэ дьиэ кэргэн барыта мустар буоллаҕа.
- Оннук ээ. 
***
Онон, соҕуруу дойду итии байҕалын кытылыгар да буоллун, биир хостоох дьиэҕэ да буоллун - саамай сүрүнэ диэн - эһиги аттыгытыгар чугастык, истиҥник саныыр дьоҥҥут баар буоллун. 
***
Аартык.ру

Комментарии 

#1
Бааска 24.04.2013 00:07
).
#2
Мааны Мааппа 24.04.2013 09:44
Ой бу хозяйка курдук буолбут киьи)
#3
соколов 24.04.2013 14:31
=)
#4
Мирон 25.04.2013 00:04
бэрт керудьуес устудьуоннар бааллар эбит)
#5
Петровна 30.04.2013 01:13
учугэй баҕайы ыйытыгы толкуйдаабыккыт ). киьи санаата кетеҕуллэр.

Добавить комментарий

Защитный код
Обновить

Aartyk.ru