Кэлиҥҥи кэмҥэ бу академияҕа иккис төгүлүн эдэр дьон олоҕо маннык түмүктэннэ диэн кырдьаҕас үлэһиттэр кэпсииллэр. Хас да сыллааҕыта кыыс оҕо таптыыр киһититтэн ыарахан буолан баран, киһитэ кэргэн ылбатаҕыттан сылтаан үөһээ этээстэн ыстаммыт. 
News.Ykt.Ru суруйарынан, ДьГТХА проректора  Надежда Мурукучаева быстахха былдьаммыт уол бэйэтигэр тиийинэр санаата суоҕун, ол күн иннинэ кинини көрсөн кэпсэппитин эппит. 
Бу уол уопсайга хоммотох, хоһугар сарсыарда кэлбит. Бииргэ олорор уола кэпсииринэн, сүргэтэ тостон хоһугар киирбит. Хайдах-туох балаһыанньаҕа түннүгүнэн ыстаммытын дуу, "көмөлөспүттэрин" дуу билигин силиэстийэ быһаара сылдьар.
***
Санатар эбит буоллахха, "Аартык.ру" академияны кытары сэргэстэһэ турар "Парадокс" түүҥҥү кулууп уонна "Олоҥхо" диэн ресторан ыччат олоҕор, өйүгэр-санаатыгар хоромньуну аҕаларын, үөрэнэр кыһа таһыгар ыаллыы итирдэр тэрилтэ баара сиэрэ суоҕун суруйан турар. Сатахха, ДьГТХА ректора 20-ччэ сылы быһа ректордыыр уонна депутаттыыр Леонид ВЛАДИМИРОВ салайар. Оттон түүҥҥү кулуубу уонна рестораны "Комдрагмет" ГУТ нөҥүө  эмиэ Ил Түмэн депутата Карл ВАСИЛЬЕВ салайар. Биир депутат клиеннары биэрэр, биир депутат олору арыгылатар. ВЛАДИМИРОВ уонна ВАСИЛЬЕВ иккиэн "ньыгыл" партия байыастара. 
***
Академия үлэһиттэрэ кэпсииллэринэн, студеннар түүҥҥү кулуупка сылдьан үөрэхтэрин куоттараллар, итирэн баран охсуһан ботуойдаһаллар. Дьаһалта түүннэри күүлэйдиири бопсубат эбит. "Студент эрдэ сэрэтэн баран түүн кэллэҕинэ, ааны аһан биэрэбит, таһырдьа хонноруохпут дуо", - дииллэр. 
***
Аартык.ру