Саҥа Дьыл кэнниттэн, Дьокуускайга туох баар Кэбээйи нэһилиэктэрин баһылыктарын ыҥыртаан, "СР ОДьКХ" хонтуоратыгар мунньан кэпсэтии тэриллэ сылдьыбыта. Мунньах, дьоҥҥо киэҥник биллэриллибитинэн - ааспыт сыл түмүгүн таһаарыы уонна үүммүт сылга туох үлэ барыахтааҕын торумнааһын диэн этэ. Оттон дьиҥ ис-иһигэр киирдэххэ, балаҕан ыйынааҕы быыбарга Кэбээйи-Дьааҥы биир мандаттаах уокуругуттан Ил Түмэҥҥэ былаас кими көрүөн баҕарарын иһитиннэрии этэ.
Кэбээйи-Дьааҥы 30-с №-дээх быыбардыыр уокуругун интэриэһин Ил Түмэҥҥэ Константин ИЛЬКОВСКАЙ туруорсуохтааҕа. Ол гынан баран иллэрээ күһүн ИЛЬКОВСКАЙ Госдумаҕа атын регионтан талыллан Москваҕа көспүтүнэн  сибээстээн, бу уокурук дьокутаата суох олордо.
Былаас аныгыскы быыбарга Кэбээйи-Дьааҥы уокуругуттан "СР ОДьКХ" ГУТ генеральнай дириэктэрин Александр НОГОВИЦЫНЫ өйүүр санаалаах. Ол иһин бу икки улуус баһылыктарын мунньан НОГОВИЦЫНЫ өйөөн ыҥыттарыы таһааттарбыттара. 
НОГОВИЦЫН бэйэтэ Сангаартан төрүттээх. Ааспыт сылларга улууһугар хочуолунай бөҕөтө туттарда. Дьааҥылары да умнубата. Онон нэһилиэк баһылыктара былаас талбыт кандидатын утарсыбакка өйөөн ыҥырыы таһаарбыттара. Дьааҥылар баһылыктара бары, этэргэ дылы, биир киһи курдук ыҥырыыга илии баттаабыт буоллахтарына, Кэбээйи улууһун баһылыга Семен ТЕРЕХОВ биир-икки нэһилиэк баһылыгын кытары ол мунньахтан "күрээн хаалбыттар".
Биллэрин курдук, ТЕРЕХОВ - Михаил ЭВЕРСТОВ киһитэ диэн ааттанар.  Ол иһин икки уот икки ардыгар киирэн биэримээри куоттаҕа. Ол да буоллар, күрүөйэх баһылыгы бэҕэһээ "туппуттар" быһыылаах, кулун тутар 18 күнүгэр "баҕа өттүнэн астаапкаҕа барарын" туһунан сайабылыанньа суруйан улуус мунньаҕар киллэрбит.
"Былааһы кытары дуогабар быһыытынан, биир мандаттаах уокуруктан Кэбээйи киһитэ туруохтаах, оттон партия испииһэгинэн Дьааҥы киһитэ мандаты ылыахтаах", - диэн аатын  эппэт сонуну тиһээччибит кэпсиир. Эмиэ кини саныырынан: "Коммунальщиктар быыбарынан оонньуу сылдьаннар, эһиилги  кыһыҥҥа бэлэмнэнэр үлэ атахтанара буолуо. Тиксии холобура, бүтүн республикаҕа тарҕанар кутталлаах", - диир.
***
Семен ТЕРЕХОВ астаапкаҕа барар төрүөтүн "атын үлэҕэ көһүү" диэн быһаарбыт.
НОГОВИЦЫНЫ утары Кэбээйи-Дьааҥы уокуругар Михаил ЭВЕРСТОВ турарын туһунан эрдэ бэчээккэ биллэрбитэ. Михаил ЭВЕРСТОВ Дьааҥыга уонна Кэбээйигэ сылдьан быыбар иннинээҕи балаһыанньаны билэн кэлбит дииллэр. 
***
Аартык.ру