Бу суолталаах докумуон чэрчитинэн Өймөкөөн улууһун дьаһалтатын баһылыга Михаил Захаров дьаһалынан тэриллибит хамыыһыйа тэрээһин мунньаҕар  бөрөнү бултуур анал биригээдэлэри тэрийдилэр. Булчуттар адьырҕа кыылы кыһыл илиилэринэн бултуулларын учуоттаан, улуустааҕы бюджеттан  бөрө тириитин иһин 10 тыһ. солк. (бөрө оҕотугар – 5 тыһ. солк.) төлөнүөҕэ. Республикаттан 20 тыһ. солк. көрүллүөхтээх. Бу сыл түмүгүнэн элбэх бөрөнү өлөрбүт булчукка улуустааҕы муниципалитет салалтата 50 тыһ. солк. бириэмийэни аныаҕа.

            Булчуттар бастакы биригээдэлэрэ улуус промышленноһа түөлбэлээн сытар сиригэр-уотугар -- улуус киинигэр Уус-Ньараҕа тэрилиннэ. Уопуттаах бөрөһүттэр, Төрүт нэһилиэгин олохтоохторо Валерий Кривошапкин уонна Гаврил Егоров бу нэдиэлэ саҥатыттан үс ыйы быһа Элги уонна Андыгычаан баһыттан саҕалаан Магадаан  уобалаһын кыраныыссатыгар тиийэ   адьырҕа кыылы анаан сонордоһон бултуохтара. Оттон нэһилиэктэргэ тэриллибит биригээдэлэр бөрөнү бэйэлэрин сирдэригэр-уоттарыгар  бултаһыахтара.

            Улуустааҕы айылҕа харыстабылын инспекциятын салайааччыта Виталий Кондаков бэлиэтииринэн, бөрө сүрүннээн хотуттан Муома улууһуттан, арҕааттан Томпо Тополинайыттан ааҥнаан кэлэр. Онон билиҥҥитэ улууска быһа холоон 100-чэкэ бөрө баара биллэр.

            Бу күннэргэ биригээдэлэр бэйэлэрин уматыктарынан, тэриллэринэн бултаан эрэллэринэн сибээстээн, улуустааҕы бөрөнү бултааһыҥҥа тэриллибит хамыыһыйа булчуттартан киирбит этиилэри учуоттаан, республикатааҕы штабка булт тэрилигэр, уматыкка сайаапка түһэриэҕэ.

 

 Елена ПОТОЦКАЯ.