Кистэл буолбатах, омук дьоно Саха сирин тымныытыттан чаҕыйбакка бары хонноҕор-быттыгар өтөн киирэн оҕо төрөтөн  олохсуйардыы оҥоһуннулар. Бэл, "дойду сахалара" хоту улуустарга барартан саллабыт. 
          Быйыл Тымныы полюһугар - Өймөкөөҥҥө 89 оҕо төрөөбүт. "Онтон 24 оҕо -- тыа сиригэр. Ордук элбэх оҕо Томторго төрөөн, чугас дьоннорун үөртүлэр. Оҕо төрөөһүнүгэр, ыал буолууга 50 сыыппара Өймөкөөн ЗАГСатын  2012 сыллааҕы историятыгар  өйдөбүллээх буолла. Ол курдук, 55 -- кыыс оҕо, 56 -- уол оҕо күн сирин көрдө. 57 саҥа ыал улуус киинигэр -- интернациональнай бөһүөлэккэ Уус-Ньараҕа эбилиннэ.
         СР ЗАГСаҕа управлениетын Өймөкөөн улууһунааҕы отделын салайааччыта Авдотья Кондакова иһитиннэрбитинэн, улуус үрдүнэн 69 уруу тэриммит саҥа ыалтан тыа сиригэр 12 эрэ саха ыала баар буолла. Тоҕо кэмчитэй диэн соһуйар буоллахха, ыччат аҕыйаан, онуоха эбии үксүлэрэ 2-3-түү көлүөнэнэн хаан-уруу аймах буолан, нэһилиэк сис ыалларыгар тиийэ ууһаан тэнийэн олороллор. 
         Сэбиэскэй кэм курдук хоту сиргэ биир нэһилиэккэ сыл аайы 4-5-тии учуутал кыыс тиийбэт буолбута сүүрбэччэ сыл буолла. Ол да иһин Өймөкөөҥҥө сахалыы ааттаах оҕо аҕыйаан, аны Карим, Эвелина, Есения диэн ааттар элбээн эрэллэр. Бу сылга Тымныы полюһугар төрүүр оҕо ахсаанын маҥнайгынан нуучча ийэлээх, лезгин аҕалаах Казимагомедовтар дьиэ кэргэттэригэр Мухамед уол күн сирин көрөн аста", диэн Елена ПОТОЦКАЯ суруйар.

  ***
Аартык.ру