Ол кэмҥэ норуот интэриэһин туруулаһыахтаах, "норуот кулута" диэн ааттаах социальнай араҥа президент ыйааҕын, бачыынын утары баран, санаатах аайы ресторан, аралдьытар-көрүлэтэр, итирдэр-иирдэр тэрилтэлэри тэрийэрэ төһө сиэрдээҕий?
Өссө уонча сыллааҕыта, Дьокуускай куорат муниципалитета оҕо, ыччат тэрилтэлэрин таһыгар 300 миэтэрэ иһинэн арыгы атыылыыр тэрилтэ суох буолуохтаах диэн балаһыанньа ылыммыта. Ол гынан баран бу ирдэбил "норуот кулуттарын" салалтатынан үлэлиир арыгыны, пиибэни иһэрдэр тэрилтэлэргэ тоҕо эрэ дьайбат.
Дьокуускайдааҕы тыа хаһаайыстыбатын государственнай академиятын таһыгар "Парадокс" диэн түүҥҥү кулууп тэлгэһэтин айаҕар турар. Кулуупка (үлэһиттэр кэпсииллэринэн) маннан сылдьан арыгылаан, үксүгэр кэриэтэ айдаарсар дьонунан - ДьГТХА устудьуоннара буолаллар. Соруммут киһи төкүнүйэн да тиийэр курдук ДьГТХА уопсайыттан чугас турар.
"Тыа сиринэн" биллэриллибит сылга академияҕа үөрэнэр тыа ыччата, тыаҕа үлэлии тахсыахтарыгар диэри төһө бааҥка пиибэни хантатан ааһалларын билбит суох. Үөрэх кыһатын аттыгар турар түүҥҥү кулуупка саарбах олоххо төһө ыччат уһуйуллара буолла...
ДьГТХА ректорынан Ил Түмэн депутата Леонид ВЛАДИМИРОВ быйыл төрдүс болдьоҕун талылынна. ВЛАДИМИРОВ депутатын бастаан куорат мунньаҕар онтон республика парламеныгар талыллыбыта. Академия ректорынан олоруоҕуттан депутааттаабыта, сыыспат буоллахпытына 20-ччэ сыл буолла. Биллэн турар, манна 3,5 тыһыынча академия үөрэнээччитэ, үлэһитэ - куолас хомуйар быйаҥнаах ходуһа буолар. 
Оттон бу "Олоҥхо" ресторан уонна "Парадокс" кулууп тэрийээччитэ - "Комдрагмет" ГУТ. Бу тэрилтэ куорат үрдүнэн элбэх саататар тэрилтэлээх: "Старый город", "Третья Линия",  "Вернисаж",  "Кружало", "Индигирка",  Pizza Land рестораннардаах, кафелардаах. "Комдрагмет" государственнай тэрилтэ, генеральнай дириэктэрэ - Карл ВАСИЛЬЕВ Ил Түмэн депутата. Депутат уонна государственнай тэрилтэ салайааччыта республика президенэ арыгыны утары ыытар хампаанньатын, чөл олоҕу пропагандалыыр политикатын  утарар буолан тахсарыгар тиийэр.  ВАСИЛЬЕВТААХ ВЛАДИМИРОВ - икки депутат кыттыһан анаан-минээн ыччаты арыгылатаары куомуннаөан бу кулуубу тэрийбиттэрэ дуо?
***
Аны ресторан уонна кулууп дьаһалтатыгар ДьГТХА ректора Л. Владимиров, СР дьиэ кэргэҥҥэ уонна оҕо аймахха государственнай кэмитиэтин (урукку) салайааччыта А.Сергучев, Гордума спикерэ А.Саввинов онтон да атын депутаттар уонна ситэриилээх былаас салйааччыларыттан араас араамкалаах кумааҕыларга махтал суруктара истиэнэҕэ кэчигирэччи ыйанан тураллар.
"Дракон" кулууп, бу "Парадокстан" итэҕэһэ суох ыччакка содур быһыыны иҥэрдэҕэ, ол да буоллар депутаттар көмүскэллэригэр киирэн өссө махтал ыла турар дуо?
***
Инна МАКАРОВА,
"Аартык.ру".