Ол курдук, общественнай корреспондент Пантелеймон Дарбасов  "Харах далыгар" биэриини сөбүлээн көрөрүн туһунан санаатын үллэстэр. Кини Георгий Белоусов ыытар биэриилэрин темалара олус сытыытын уонна күннээҕи олоххо туһалаахтарын бэлиэтиир. Общественнай корреспондент соторутааҕыта омук тылын билиигэ анаммыт биэрии ис хоһоонун сиһилии ырыппыт. Пантелеймон Дарбасов: "Саха сиригэр олохсуйа кэлэр араас омук дьоно сахалыы билбэттэригэр бэйэбит буруйдаахпыт. 5-6-с кылаастартан саҕалаан нэдиэлэҕэ биирдии чаас сахалыы кэпсэтиигэ үөрэтии эйэлээх буолууга, өйдөһүүгэ эргиччи туһалаах буолуо этэ. Элбэх омук тылын билии олоххо олус наадалах, киһи олорор регионун тылын билиитэ кини үрдүк культуралааҕын көрдөрөр", -- диэн бэлиэтиир. Дьэ, бу маннык санааны биһиги ааҕааччыбытыгар үөскэппит Саха телевидениетын "Харах далыгар" биэриитэ. Оттон көрөөччүгэ бу курдук биэриилэр араас санааны, толкуйу үөскэтэр буоллахтарына, телевидениебыт норуотугар чахчы чугас эбит диир кыахтаахпыт.

            ДьааӨыттан Христина Сивцева Саха араадьыйатын "Сонуннар" биэриилэрин корреспондена Владимир Дордин  ааспыт субуотаҕа "Сиһилии" биэриигэ Булуҥ улууһуттан 7-с, 8-с, 9-с кылаас үс үөрэнээччитэ 10 чаас "Буранынан", Тиксииттэн Баатаҕайга диэри вертолётунан, Дьокуускайтан самолетунан "Инникигэ хардыы" научнай конференцияҕа кэлэн кыттыыны ылбыттарын туһунан иһитиннэриитэ кини болҕомтотун тарпытын туһунан кэпсиир. Христина Николаевна аныгы сайдыылаах үйэҕэ оҕолор барахсаттар, сырыы-айан ыарахаттарын аахсыбакка, баҕа санаалара күүһүттэн сөхпүтүн этэр.      -- Сэбиэскэй кэмҥэ, биһиги үөрэнэрбит саҕана оройуон нэһилиэктэригэр отучча да мүнүүтэлээх сирдэргэ самолёттар күн аайы көтөллөрө, -- диэн кэпсиир  араадьыйаны таптаан истээччи.

            Мэҥэ Хаҥалас Балыктааҕын олохтооҕо, учуутал идэлээх Ангелина Говорова бу күннэргэ Саха араадьыйатыгар чаас аайы Дьокуускай бириэмэтин биллэриэхтэрин иннинэ чыычаах саҥатын, үрүйэ устарын, кэҕэ этэрин, кус-хаас саҥатын иһитиннэрэр буолбуттарын сонургуу истибит. 

            -- Тохсунньу бытархан тымныыта түһэн турар кэмигэр Сахабыт сирин сайынын санатар айылҕа барахсан тыаһын-ууһун истэн, киһи санаата көнньүөрэр, көнөр. Бу маннык тымныы кэмҥэ киһи уйулҕата эмиэ тулуйбатын араадьыйа үлэһиттэрэ учуоттаабыттара хайҕаллаах суол, -- диэн бэлиэтиир Ангелина Николаевна.

            Ити курдук Саха араадьыйатын уонна телевидениетин сөбүлээн көрөөччүлэр уонна истээччилэр республика бары улуустарыгар "Саха" НКИК олоххо киллэрэр сонун сүүрээннэрин күннэтэ көрө-истэ уонна бэлиэтии олороллор.