2006 сыллаахха федеральнай 1-кы телеханаалга "Две звезды" бырайыак  аан бастаан эфиргэ тахсыбыта. "Саха" НКИК "Икки сулус" республикатааҕы көрүҥүн 4-с сылын ыытар. Манна биллэр-көстөр дьон идэтийбит ырыаһыттары кытары тэҥҥэ тахсан дуэтынан ыллыыллар.
Быйылгы "Икки сулуска" "Мисс Якутии" кырасаабыссатыттан саҕалаан, бырааска, учууталга уонна, биллэн турар, депутаттарга  тиийэ кытыннылар. 
Биһиги санаабытыгар, саамай соһуччу уонна букатын киһи үөйбэтэх өттүттэн СР Эргиэҥҥэ уонна Промышленноска палататын президенэ, Ил Түмэн депутата Владимир ЧЛЕНОВ көһүннэ.
Членов уһун хара париктаах, кухлянкалаах, этэрбэстээх... быһатын Членов-Бельды Сайыынаны туундараҕа дьиҥнээхтик илтэ. 63 саастаах депутат "Сахациркэ" аренатын биир гына аҕылаан көрбөккө тилийэ сүүрдэ, көннөрү да сүүрбэт, өссө үҥкүүлүүр!
Дьүүллүүр сүбэҕэ киирбит опера ырыаһыта Айталина АДАМОВА, Бэчээт департаменын салайааччыта Филипп ПЕСТРЯКОВ Членовы көрөн үөрэн, харахтарыттан уу-хаар ыгыллан тахсыар диэри күлбүттэрэ экраҥҥа көһүннэ. Кырдьык, Членов маннык уобараска киирэ сылдьарын көрбүт эрэ барыта настарыанньата көтөҕүлүннэ.  Центральнай быыбардыыр уокурук электората Владимир Михайловичка бу да үҥкүүтүн иһин куоластыахтарын сөп буолла. Оттон депутат хоту улуустарга бу кэннэ букатын  даҕаны "нацгеройга" кубулуйдаҕа.
***
Иккис депутат Елена ГОЛОМАРЕВА төрөөбүт улууһун Өлөөнүн олохтоохторун ахтан "Эбэҥки ырыатын" Синильганы кытары ыллаата. Бэркэ табылынна. Табалара диэн, кырсалара-саһыллара диэн, таҥастара-саптара, үҥкүүһүт арыалдьыттара - таһы быһа тахсыылаахтык бэлэмнэммиттэр. Патриотичнай, истиҥ нүөмэр буолла. 
***
"Көрөөччүлэр биһирэбиллэрин" Варя АМАНАТОВА уонна 3-с поликлиника кылаабынай бырааһа Светлана ДАВЫДОВА ыллылар. Кыайыылаахтарынан Анастасия ГОТОВЦЕВА уонна Чурапчытааҕы  физкультура институтун ректора Иннокентий ГОТОВЦЕВ ыллылар. Убайдыы-балыс ГОТОВЦЕВТАР, кырдьык, мааны  куоластаахтарын дакаастаатылар.
***
Ольга ВАСИЛЬЕВА,
Аартык.ру